Read lumasaaba Isaaya 21 Bible Online

Isaaya 21 - lumasaaba bible

Isaaya 21

¹Buno nibwo buurume bubweetsa bubuwaamba khu Babulooni, nga nikwo kumubiimbi kukuuli aambi ni nyaantsa imboofu: Buukosi bulikho bwiitsa buyilila busa khukhwaama mu mubiimbi, buli busa nga shishafuusi khukhwaama mu Negevu.

²Iliwo khuubonekhelwa khweesi ise ndi khuubona nga khuuriisa naabi: Uyo ulyamwo luwomelo nga alyamwo luwomelo, ni nooyo uhesa nga ali khuuhesa. Ari yinyukha mwiloosele, inywe babaandu ba Elamu, ni ba Medi. Tsya mwiibwakale luundi mwibotokhelele. Umukasya weetsubile ari atsya khwaakamisa khutaambisibwa khweesi babaandu ba Babulooni baareera.

³Inda yase ilikho yintsiina, luundi ilikho yookhelela busa mukari. Butsiina bwangwiilekho, bwafwaanile busa nga biisa bibiilya umukhasi utsya khusaala. Ise ndi khuuweetsekhelela busa kamaani, shaakila naalekha khuwulila ta; naariire luukali naabi ni khuubona naalekha khubona ta.

⁴Kumurwe kwase kulikho kwibotokhelela busa, ni kumwoyo munda mwase kulikho kundyeemuukha busa. Ise naba nga naliindiliile indi angoloobe oola liina, ne ari bona andereere khuurya khwonyene.

⁵Bona balikho baŋoonaŋoona imeetsa lwe kamayiiya. Balikho basalanisa bikutu bari babaandu bekhalekho. Balikho balya luundi banywa. Ari inywe baaraangilisi, yinyukha khaangu naabi! Ni mubukule tsingabo tseenywe, mwiŋooneŋoone lwe buusoolo.

⁶Lwekhuuba Umukasya anomela ise ari, “N'ure umuliindi khu litikiiyi lye shiriimba. Lwanyuma umweene uyo akuukuule byeesi aboone.

⁷Niye nikane abone kamakaali ke tsiŋwaaŋwa, ni babaakakyeendelakho, ni babaakyeendela khu sikilya ni tsiŋamila, niye narekereese buulayi luundi emenielesile ilala.”

⁸Lwanyuma umuliindi uyo akuukulile angaaki ari, “O Umukasya, ise buli shiifukhu naayimikha mu shifwo mweesi niitseetelamwo. Buli shiilo, inama nga nemikhile mu shifwo shase.”

⁹Lubaluba, indyo naabona babaakyeendela khu ŋwaaŋwa nga beetsa babili babili. Lwanyuma ndi umuliindi tsana waaloma ari, “Babulooni shaakwiile, ilala shakwiile! Biifwaani bye ba wele baamwo byoosi baabikhupakiile aasi, baabiminiaangulakile.”

¹⁰Lwanyuma ise naaloma ndi, “Inywe babaandu baase, babaamiinikhakiile aasi khwiloba isi bawuulila iŋaano. Ise naababooleele byoosi byeesi Umukasya uwe Kamahe, Umunyali wa Byoosi, uuli Wele wa Isiraeli, ambooleele khuukuukuula.”

¹¹Buno nibwo buurume bubweetsa isi indi nga buwaamba khu Duma: Nga iliwo umuundu mutweela khukhwaama i Seyiri uwakuukuula ari, “Iwe umuliindi, shiilo sharamileyo shishoola shiryeena khukhwoola kumutikhinyi? Umuliindi, shiilo shinawakho liina?”

¹²Nase nga umuliindi nelamwo ndi, “Kumutikhinyi kuli aambi khukhwoola, ne nga kwaweelekho, shiilo kane shikobole. Iwe siinga nga ukana khureeba luundi, yiitsa ureebe luundi, lwanyuma ndi wiitse ureebe luundi.”

¹³Buno nibwo buurume bubweetsa nga buwaamba khu Buwarabu: Inywe kumukhweende kwe babaandu be Dedani, ni mwibise mu mubiimbi kwa Buwarabu.

¹⁴Ni mureere kameetsi mukawe abo babaali bulesa; inywe babaamenya mu Tema, ni mureere biilyo muwe babaandu baamuli.

¹⁵Balikho batitukha lwe lurima, lurima lweesi bamalile khaale khusowolayo, batitukha khukhwaama isi buyiingo bweesi bamalile khaale khuufuumba nga batsya khulasa, ni khukhwaama isi busoolo bubuyiindiile luukali.

¹⁶Kila Umukasya anomela ise ari, “Mu mwiiko mutweela kwonyene, nga utsya ubala shifukhu khu shifukhu, nga umuraambi we kumukheemba, shiriifwa sha Kedari shitsya khwakama.

¹⁷Batsya khuramakho bakyeekhe bari khu basoolani baabwe babalasa buyiingo nga baalamu. Ise Umukasya Wele wa Isiraeli umweene, niye ushikanikhile.”