Read lumasaaba Isaaya 22 Bible Online

Isaaya 22 - lumasaaba bible

Isaaya 22

¹Buno nibwo buurume bubuwaamba khu Litila lye Khuubonekhelwa: Shiina ari sheesi muli khuukhola? Mumanyisa shiina ni muba nga mulikho mutima muniina khu ngaaki khu bisuli khwe tsiintsu?

²Imbona shiriimba shoosi shili mu luwuungu lwe kamaani, nga mulimwo khuyenguukhana khuukali, ni khukhwilikuusa. Kimilaambo kye baafu kikisalaniilemwo kino, sikili bari babaandu bano beeribwa ni lurima, namwe bari beeribwila mu busoolo ta.

³Baaraangilisi beenywe boosi baatitukhile. Boosi bawaambibwile akhali khukhwiisoolanakho ta. Ni nanywe babaandu, abe yakhaba nga mwakhakakho muri mutitukha, ne babaatimisa babaanyoola babawaambaka.

⁴Isho nisho shishakila naaloma ndi, nimuundureyo, nimundekhe imbe mu ngunyi yase. Nimundekhe indilile babaandu baase babaali khuuhela.

⁵Lwekhuuba Umukasya uwe Kamahe, Umunyali wa Byoosi, waakhalilewo shiifukhu she khuyengukhana, ni khuusambakana ni khuyumbaala mu Litila lye Khuubonekhelwa! Bona kamatikiiyi koosi baakakhupakile baakamaliile aasi, ni khukhwaantsuwa khuukali khuli khuwulilikhanila mu njiinji.

⁶Babaandu be mu shibala sha Elamu bali baalasi be buyiingo, atweela ni kamakaali kaabwe ni babaakakyeendelakho. Ni basaani be mu Kiri baawaambile tsingabo tsaabwe.

⁷Kamatila keenywe kakaafuura buulayi keetsuulemwo kamakaali, ni basaani babaakyeendela khu ŋwaaŋwa beemikhakile khu bilibwa.

⁸Bye khukhwiiliinda khwa Yuda babyoonakisiile ilala. Khu mbuka iyo, muba nga mutimaka khuutsya mu mabiikhilo keenywe ke bye busoolo.

⁹Muryo mwabona tsinuma mu matikiiyi ke mu shiriimba sha Dawudi nga tsili tsingali. Mwaareera kameetsi nga mukaamisa mu litibo liliili lubeka lwe mwaalo.

¹⁰Muryo mwaabala buukali bwe tsiintsu tsitsiili mu Yerusalemu, lwanyuma mwatsisambulaka muri mufunekho kamabaale ke khukhwombekhela kamatikiiyi ke shiriimba keesi baafuniaakaka.

¹¹Akari e kamatikiiyi kabili mwombekha kamalowo ke khubuusilamwo kameetsi, khukhwaama mu litibo liikhale. Ne shonyene ndi simwereebakho khuufuna buyeeti khukhwaama isi uyo uwashikhola ta. Inywe simwenaanayo isi uyo uwashiŋoonaŋoona khukhwaama makiboole ta.

¹²Khu mbuka iyo, Umukasya nga niye Umukasya uwe Kamahe Umunyali wa Byoosi, aabakuukuula ari mwantsuwe luundi mukhupe luwuungu. Abakuukuula ari mwibekekho litsuune lyeenywe, naluundi mukwaare tsisawu tsa makoongwe nga mwokesanisa kumutaambo.

¹³Ne ari bona inywe muli busa mumwikhoyo ni khuushina; mukhoonya tsiikhaafu ni kamasheese. Bona mulikho mulya tsinyama luundi munywa iviini. Mulikho mwilomela busa, “Khakhulye luundi khunywe, lwekhuuba kumukaamba khukhaafwe.”

¹⁴Umukasya uwe Kamahe, Umunyali wa Byoosi, waashilomakho nga ise imbulila, nga aloma ari: “Simukheyakhilwe shishoonako shino nakhafwiiti khoosi ta, khukhwoolesa ni mukhaafwe.” Shino Umukasya Umunyali wa Byoosi umweene niye uwashikanikha.

¹⁵Umukasya, nga niye Umukasya uwe Kamahe, Umunyali wa Byoosi, waanomela ise khukhwinyukha intsye nga mbila buurume buno isi Shebuna, umuloleleli we lubili, nga imuboolela ndi,

¹⁶“Shiina shisheene sheesi iwe uli khuukhola ano? Naluundi, naanu niye uwakhufukiilisa iwe khukhwibeetsela wamweene iŋani mu lwaanda, waakimiliisa buulayi bubweene, nga ukikhola khuuba she khuukhebulililakho?

¹⁷Ne ari bona Umukasya atsya khukhutuuma ibulafu buubi naabi, iwe umusaani uwe kamaani. Umweene atsya khukhukulukhila iwe,

¹⁸akhuwuumbawuumbe, akhwibotokhelese wikyele nga kumupiila, nio lwanyuma akhukholowe mu shibala she aleeyi, she kumubiimbi. Ibweeneyo isi ukhaafwiile, ni kamakaali koowo ke shiriifwa kakhaafunikhakileyo, kalekhe khukhuyeeta ta. Iwe wekyelile she kamaŋaanyu isi babaandu b'omukoosi woowo, beesi waakaanisa.

¹⁹Ilala Umukasya atsya khukhutimisa khukhwaama mu buraambi bwoowo, akhuwanule akhukwiise aasi khukhwaama mu shifwo shoowo she shiiriifwa.”

²⁰Umukasya waalomela Shebuna ari, “Khu shifukhu isho, indilaanga umwakaanisi wase Eliyakimu, umusooleli wa Hilukiya.

²¹Indimukwaarisa niye biikwaaro byoowo bye buwuli, imuwe niye shiifwo shoowo, indyo imuwaambise niye buunyala bweesi uli nabwo.

²²Intsya khumuwaambisa shifuungo shishikulawo kimilyaango kye ntsu ya Dawudi. Niye nga wekuulewo, mbaawo na mutweela ulinyalisa khukhwiikalawo ta. Naluundi nga niye wekaalewo, mbaawo umuundu ulinyalisa khukhwiikulawo ta.

²³Indimurawo abe nga intseko iye kamaani naabi, indyo imwikyelise niye khuuba shiitsoloŋo she shiriifwa isi be mu ntsu ya paapa weewe.

²⁴Ikifunisi iye khulolelela be muungo boosi ikhaabe khu niye. Boosi bakhaamwiwaambekho bafwaane nga tsifuruuya, ni tsimuka, ni tsinyuungu, ni biwanikhibwa khu ntseko.”

²⁵Naluundi Umukasya uwe Kamahe, Umunyali wa Byoosi alooselakho ari, “Imbuka nayo ikhoole, isi ise ikhaakhuulilemwo kumusumaari abe kukwawaamba intseko iyo buulayi. Intseko iyo ikhaasookhemwo ikwe aasi, ni bibiindu byoosi abe byeesi yatiila, biweele aasi ni nayo. Bino ise Umukasya samweene, niye ubikanikhile.”