Read lumasaaba Isaaya 23 Bible Online

Isaaya 23 - lumasaaba bible

Isaaya 23

¹Buno nibwo buurume bubweetsa nga buwaamba khu Tuulo, nga buloma buri: Ni musole inywe tsimeeri tse Tarushishi, lwekhuuba tsiintsu tse mu Tuulo tsoosi tsoonakisibwile! Kamakhuuwa keesi mwawulilila i Sayipuraasi kali kaŋali.

²Ari nimwiwunamile nga mwaasilile busa, inywe babaandu babaamenya khu ndulo khwe nyaantsa, ni nanywe babaakhola bye khuusubula babaama i Sidoni. Baasubusi beenywe baakhalisa tsinyaantsa tsimboofu,

³nga baseyeeyela khu meetsi kakesiikha naabi aasi. Baryo baaba nga babareerera inywe biilyo bibulungule khukhwaama i Misiri, ni liikyesa liikali khukhwaama khu luutsi Nayilo. Inywe mwaba liikulaanilo lye kamanaambo.

⁴Ari iwe shiiriimba sha Sidoni, waaswaalile naabi, lwekhuuba shiifwo shoowo she khukhwikhiinga she khu ndulo khwe nyaantsa shili khuuloma shiri, “Ise bona ishiili khusaalakho babaana ta; ise naakhutsowesatsakakho baasooleli namwe bakhaana ta.”

⁵Isi Misiri kane bawulilile khu makhuuwa kakawaamba khu Tuulo, kane kumutaambo kumukali kubawaambe.

⁶Ari ni mukhalise mutsye kwe Tarushishi! Ni musole naabi inywe babaandu babaamenya i aleeyi khu ndulo khwe nyaantsa.

⁷Ilala shino nisho shishabatsaka shiiriimba she kumwikhoyo khaalekho? Babaandu baasho baasalanilaka baatsya baamenya mu bibala bye aleeyi.

⁸Naanu umweene uwareerire buukosi buno khu Tuulo, shishabatsaka nga nisho shiiriimba shishirakikhisa buyiinga? Babaandu baasho babaakhola bye khuukulaana nibo baawuli, abo babaatsya khuukulaana babaabatsaka babaandu be shiiriifwa.

⁹Umukasya uwe Kamahe, Umunyali wa Byoosi, niye uwashikholile khuumalawo khukhwiyiinga khwoosi, ni khukhwiikhisa aasi babaandu be shiiriifwa be khu shiibala.

¹⁰Inywe babaandu be Tarushiishi, ni musalanile khu liswa lyeenywe, mufwaane nga luluutsi Nayilo, lwekhuuba sishiiliyo khuukhingililwa luundi ta.

¹¹Umukasya waatsanuusile kumukhono kweewe khu nyaantsa, waanikinisile buyiinga bwoosi bwe khu shibala. Waarusile ilomo yeewe iwaamba khu Kanaani, khufuniaakaka tsimako tsayo tsoosi.

¹²Umukasya waaloma luundi ari, “O Iwe umukhaana wa Sidoni, singene wiileyo luundi wiikhoye ta, lwekhuuba baakhusiindakiliile khaale. Abe waakhenyukha uri utitukhile i Sayipuraasi, singene unyooleyo shiwolelo ta.”

¹³Bona no! Shiibala she Babulooni; babaandu babaakhaliwo ta! Babaandu ba Asiriya baabawaanileyo isi tsiisolo tse mwirome tse mu mubiimbi. Boombakhile kiminaala kikyokesanisa khukhwiibwakala, baafuniaakakile buli lubili lwoosi, baatsikwiisile aasi, baatsikyelisile kamawuumbu busa.

¹⁴Ari nimusole naabi, inywe tsimeeri tse Tarushiishi, lwekhuuba shiifwo sheenywe abe sheesi mwiyikina lwe buliindi shoonakisibwile.

¹⁵Imbuka ikhoole iye kimiiko kamakhumi musaafu, nga nibwo buuleeyi bwe kimiiko ky'omuyiinga, Tuulo bakhaashiibilile. Ne lwanyuma lwayo nga kyaaweelekho, Tuulo shikhaafwaane busa nga umukhasi malaaya isi beembakho kumweenya bari,

¹⁶“Bukula liituungu lyoowo, ukyeende nga wibotokhelela mu shiriimba, iwe malaaya abe isi beebilila. N'uweembe kumweenya kukwikhoyesa, naluundi weembe kimyeenya kimikali, nio manya baakhushebulila.”

¹⁷Ilala lwanyuma lwe kimiiko kamakhumi musaafu nga kyaweelekho, Umukasya atsya khwiisawo Tuulo bushaakha. Ne singene ibewo injawulo ingali nga ni shaba maakiboole ta. Shitsya khwikyela luundi malaaya isi buyiinga bubukhali butweela ta mu shibala shoosi.

¹⁸Ni tsinusu tsitsikhaamemwo, tsikhaabe shishiindu shiikhosefu isi Umukasya. Buyiindifu bwasho sibakhaabubuunge ta, ne bye buyiindifu ibyo byoosi bikhekyele biilyo biikali, ni bye khuukwaara biilayi, bibikhaabe bye babaandu babesaaya Umukasya.