Read lumasaaba Isaaya 24 Bible Online

Isaaya 24 - lumasaaba bible

Isaaya 24

¹Khu mbuka iyo, Umukasya atsya khwoonakisa shiibala shirame nga sharaaŋaalile busa, atsya khuushiborora, asalanise babaandu baakhwo boosi.

²Shikhaabe shiryo isi buli mutweela; nga ni shikhaabe isi babaandu ba busheele, nga ni shikhaabe isi umusaayi; nga ni shikhaabe isi umukulwa nasho shiryo nga ni shikhaabe isi umukoosi weewe; nga ni shikhaabe isi umukyelema we muntsu, nga ni shikhaabe isi umukyeesa weewe; nga ni shikhaabe isi umukuli, nasho nga ni shikhaabe isi umukulisi; nga ni shikhaabe isi uwikhoopesa, nga nasho ni shikhaabe isi uwikhoopa; naluundi nga nishikhaabe isi uwaana, nasho nga ni shikhaabe isi uyo uwakaanila.

³Shibala shikhaarame nga shaaraŋaalile awo busa, shoosi shikhaabe nga shaasakukhiile ilala busa; lwekhuuba Umukasya umweene niye ulomile ilomo iyo.

⁴Shiibala shoosi shoomeele ilala, luundi shaniaalile; shiibala sheetsuule lulokho, luundi shiniaaliile ilala; babaandu be angaaki be mu shiibala beekhisibwile aasi atweela ni shiibala shaabwe sheene.

⁵Babaandu babeene baakilile shiibala shaabwe shaanyalutikhile, lwekhuuba baaminyaaliile kamakaambila, baalekelesile biilakilo, baafuniaakile indakaano ikhawawo ta.

⁶Ni nashiryo shiitsubo shaamilile shiibala shoosi, ni babaandu baasho boosi bakwaarire bubwooni bwe shiibi. Nashiryo babaandu be khu shiibala baashiile baaweelewo, babaaramilekho baaramile baakyeekhe bari.

⁷Iviini yoomeleele, ni kuusaala kweesi yaamakho kwaniaalile, ni naabo babaakinywa beekhoyesebwa mu myoyo kyaabwe, ari beetsuule kumutaambo.

⁸Khuusakaya khwe bibiisakaya khwaakamile, liyoombo lye babaandu babekhoya lyaasilile, kumwikhoyo kukureerebwa ni lituungu kwaweelewo.

⁹Singene babaandu banywe iviini nga beemba kumweenya ta; indali ikhaaluluwile abo babaakinywa.

¹⁰Shiriimba she bumoyaani shekalibwilewo; kimilyaango kikinjila mu buli ntsu baakikhomekhele.

¹¹Iliwo luwuungu mu shiriimba lwe khutaambawo iviini; isangaalo yoosi ari yeekyelile kumutaambo; kumwikhoyo kwaweeleelewo ilala khu shibala.

¹²Baafuuntsakiliile shiriimba, shaaramile awo busa; ni shiilibwa shasho baashikhupakile shekyelile bipatu busa.

¹³Shiryo nga ni shikhaabe khu shibala, ni mu manaambo koosi, shifwaane nga kuusaala ku olivu kweesi bakhupakile baawululaka, namwe nga bibutakila byeesi balekhile inyuma nga bakyesa kimizabibu.

¹⁴Baryo benyusa kamakono kaabwe angaaki, beemba kimyeenya lwe kumwikhoyo kumukali; khukhwaama ibwaamanyaanga bakuukuula bukhulu bw'Omukasya.

¹⁵Nashiryo mu bifwo bye bwaamanyaanga, nimuwe Umukasya shiriifwa; nimuwe lisiina ly'Omukasya Wele wa Isiraeli shiriifwa, mu bifwo bibililaanile kuyaantsa.

¹⁶Khukhwaama ibwakamilo we shiibala, khwaawuliile khukhweemba khwe kimyeenya; kimyeenya kye khuruuya Umukhosefu. Ne ise samweene nelomela ndi, “Ise naweeleele! Ise naweeleele! Nga kumutaambo kwanyoolile! Lwekhuuba babaandu be tsimbomelo bekholisa ni tsimbomelo tsaabwe; babaandu be tsimbomelo bakhola ni tsimbomelo naabi naabi!”

¹⁷Ingunyi ni liilowo atweela ni kumureko byaabaaliindiilile, inywe babaandu babaamenya khu shiibala!

¹⁸Buli mutweela yeesi utitukha lwe lutiri lwe ngunyi, kane akwe mu lilowo; ni nooyo ukhakakho khuuniina khukhwaama mu lilowo, kane awaambikhile mu mureko. Lwekhuuba kimiluwu kye mwikulu kyekukhile, ni kimisiingi kye shiibala kyilikho kitengaasibwa.

¹⁹Shiibala shaatikhakiile ilala, shiibala shaasiisakukhiile ilala, shibala shaanikinile shaaweelelekho ilala.

²⁰Shiibala shilikho shitilyaata busa nga umuundu unyweele indali waameela, shilikho shiwuuba busa nga shisisira sh'omuliindi mu mbewo; bubwoonaki bwasho bwashikoneele ni busiro buukali naabi, nga shakwiile aasi sishinyala ni khukhwinyukha luundi ta.

²¹Nga shifukhu isho sheetsile khwoola, Umukasya akhaawe bye kamaani bibiili mwikulu byoosi shitaambiso, ibyo byoosi bibiili angaaki, ni bayiinga be shiibala babaali aasi khu shibala.

²²Boosi bakhaabuusanisibwe atweela, bafwaane nga baabowe mu lilowo; bakhaabekalile mwipuusu, lwanyuma lwe bifukhu biikalikho beetse baweebwe shitaambiso.

²³Kumweesi kukhaafule, ni nyaanga ilekhe khukhwaaburukha ta; lwekhuuba Umukasya uwe kamahe umunyali wa byoosi, akhaabe nga awula ni buunyala khu lukiingi Sayuuni, ni mu Yerusalemu, ni isi baasakhalu baasho akhokesanise shiriifwa sheewe.