Read lumasaaba Isaaya 25 Bible Online

Isaaya 25 - lumasaaba bible

Isaaya 25

¹O Umukasya, iwe uli Wele wase; kane ikhuruuye, kane imbuyilise lisiina lyoowo; lwekhuuba iwe wakholile bibiindu bye kamaani naabi, tsiŋoonaŋoona tsoowo tseesi wakhola khukhwaama khaale, tsili tsaŋali, luundi tsiyikinikha.

²Lwekhuuba iwe wekyelisile shiriimba shoosi khuuba imuumbi iye kamawuumbu, shiriimba abe shishiilikho kutikiiyi shaaba nga shaafuniaakikhile, lumako lweesi abe banaambo bebuyililakho silushiiliwo ta, silulyoombekhebwa luundi nakhafwiiti khoosi ta.

³Nashiryo babaandu be kamaani bakhaakhuruuye iwe luukali; biriimba bye kamanaambo kamarafu bikhaakhurye iwe naabi.

⁴Iwe wabeelatsakile bubwilukhilo isi abo babaali bataambi, lumako lwe kamaani isi umuundu umutaambi uuli mu mutaambo, iwe uli bubwibisilo isi ikhuungu ingali, naluundi shishisiisa isi kumuumu kumukali; lwekhuuba imbewo isi baarafu baheela ifwaana nga ikhuminiilisila khwitikiiyi,

⁵naluundi bali busa nga bukhafu bwe mu mubiimbi. Iwe usilisa liyoombo lye banaambo, nga n'ubona shishiniini sha namufweeli nishiwosawosa bukhafu bwe kumuumu, musaambo niyo ndweela kumweenya kwe babaandu baarafu kuwetsekhelela.

⁶Khu lukiingi luno, Umukasya uwe kamahe, Umunyali wa byoosi, akhaaŋoonaŋoone kamayiiya ke biilyo biinule isi babaandu boosi, kamayiiya ke viini indule buulayi; tsinyama tsitsifuurayo khuunula ni viini ifuurayo buulayi.

⁷Khu lukiingi khuno niye akhaahese shishiindu shishabiimbilila khu baandu boosi, isuukha abe iyabiimba khu manaambo koosi.

⁸Akhaahese khuufwa khuweelewo ilala biilo ni biilo. Umukasya Wele umunyali wa byoosi, akhaakhuyake kamasika khukhwaama mu bikho bye babaandu boosi, akhenyusewo bukhomo bwe babaandu beewe khukhwaama khu shiibala. Shikhaabe shiryo lwekhuuba Umukasya umweene niye ushikanikha.

⁹Shifukhu isho nga sheetsile khwoola, bakhaalome bari, “Ilala uyo niye Wele weefwe, abe khwaamuliindiliila khuri kane akhuwonese. Oyu niye Umukasya, ifwe khwaamwiyikinila ilala; khakhwikhoye luundi khusangaalile mu buwonesi bweewe.”

¹⁰Kumukhono kw'Omukasya kukhaabe khu lukiingi luno; ne Mowaabu bakhaamukhaandakilile aasi nga ali mu shifwo sheewe mu bweene, nga n'ubona ikhaafu nikhaandakilila bunyaasi mu lilowo lye kamasiisye.

¹¹Baryo lwanyuma benyuse kamakhono kaabwe mu ngaaki nga bali mu lilowo ilyo, nga n'ubona umuundu ni enyusaka kamakhono keewe nga ali khuusuba mu meetsi. Wele aryo akhaamalewo khukhwiyiingayiinga khwaabwe, abe yakhaba nga bebona bari bali baamanyilifu naabi.

¹²Aryo afuniaakake kamatikiiyi keenywe kakaaleeha naabi mu ngaaki iko, koosi kaweele aasi abweene, ilala byoosi akhaabimalile aasi khwiloba khubweene.