Read lumasaaba Isaaya 26 Bible Online

Isaaya 26 - lumasaaba bible

Isaaya 26

¹Shifukhu isho nga sheetsile khwoola, babaandu ba Yuda bakheembe kumweenya kuno, nga kuloma kuri: Ifwe khuli ni shiriimba she kamaani; Wele waakhola buwonesi khuuba nga niko kamatikiiyi kaasho, luundi nibwo bubuukila khwaawula.

²Ni mwikulakewo biilibwa bye shiriimba, nio liinaambo liliili likhosefu isi Wele linjile mukari.

³Umukasya areerawo lukoosi lwelala isi abo babaamwiwaambilakho ilala, babaamwiyikina niye.

⁴Nimwiyikine Umukasya bifukhu byoosi, lwekhuuba Umukasya niye Umukasya uuli Lulwaanda lwe biilo ni biilo.

⁵Lwekhuuba Wele waakwiisile aasi abo abe babeyiingayiinga, nga bamenya khu njiinji tsitseyiinga angaaki. Lukiingi lwaabwe ilwo waalukwiisile aasi, luli aasi khwiloba khubweene.

⁶Ari abo abe babaali bataambi luundi abe babaakhalikho na khaandu ta, nibo babaali khukhaandakilila shiriimba isho.

⁷Intsila iy'omuundu umukwalaafu ili intsalaafu; O Umukhosefu, iwe ukhola intsila ye bakhosefu khuuba imiliwu.

⁸O Umukasya, ifwe ni khuba nga khukyeendela mu makaambila koowo, khuba khwaakhuliindiiliile iwe, lisiina lyoowo ni khuumanyikhana khwoowo nibyo byeesi khwikoomba mu myoyo kyeefwe.

⁹Buulamu bwase bukhwiwotooma iwe khuumalakho shiilo shoosi, ni kumwoyo kwase mukari kukhwikoomba iwe mu ŋali mubweene. Nga ikhala yoowo iye kimisaango yeetsile khu shibala, babaandu boosi be khu shibala beyika khuukhola bye bukwalaafu.

¹⁰Abe yakhaba nga bubweela bwookesanisibwile isi umuundu umwoonaki, niye s'eyika khuukhola bye bukwalaafu ta; mu shibala she bukwalaafu, umuundu ufwaana aryo, eloosela busa khuukhola bye bubwooni, niye s'abonelakho ilala shiriifwa sh'Omukasya ta.

¹¹O Umukasya, bona kumukhono kwoowo kwenyusibwile mu ngaaki kutsya khubawa shiitaambiso, ne nibo sibakubona ta. Balekhe babone khukhwiinaanayo khwoowo isi ifwe, nio nibo baswaale. Lekha kumulilo kukwoosha baasiku boowo, kubookhe kubamalewo.

¹²O Umukasya, iwe kane ukhureerewo ifwe lukoosi, lwekhuuba buli shiindu shoosi sheesi khunyalile khuukhola, khwaashikholile lwe buunyala bwoowo.

¹³Bakasya babaandi baamala khaale khuukhuwula ifwe, O Umukasya Wele, akhali iwe ta, ne lisiina lyoowo lyonyene nilyo lyeesi khwiyikina.

¹⁴Ne baasiku abo ari baafwa khaale, sibanyala baaba baalamu luundi ta; ari bali bisimu busa, sibanyala benyukha luundi ta. Iwe wabawa shiitaambiso, waabahesa waabamalawo; waabamalilawo ilala, mbaawo unyala waabashebulila luundi ta.

¹⁵O Umukasya, iwe waalooselekho liinaambo; waabalaayisile linaambo lwe shiriifwa shoowo; waabalaayisile liiswa, lyaabeele liikali khuufuurisa nga ni lyaba makiboole.

¹⁶O Umukasya, nga iwe ni wawa babaandu shiitaambiso, baakobola is'uli nga bakhuweentsa ni kumutaambo kumukali; beetsa nga baakhuloomba iwe.

¹⁷Nga n'ubona umukhasi uuli shisoombo uutsya khusaala, nga ni ekonioolola ni butsiina nga elootsa, nga imbuka yeewe iye khuusaala yoolile, nafwe khwafwaana khuryo mu moni tsoowo, O Umukasya.

¹⁸Khuryo khwaba mu butsiina bwe khuusaala buukali, ne ndi khwasaala imbewo busa. Mbaawo buuwonesi bwoosi bweesi khureerire khu shiibala ta, mbaawo babaandu beesi khulekhile khukhwiilawo mu shibala ta.

¹⁹Abo babaafwa, bakhaalamukhe babe baalamu! Kimibili kyaabwe kikhaalamukhe kibe kimilamu. Inywe babaali aasi mwiloba, ni mwinyukhe mwiimbe kimyeenya ni kumwikhoyo! Inywe muli busa nga liime lye kumutikhinyi lye buwaanga, muryo mukhaakobose buulamu isi abo babaafwa khaale.

²⁰Inywe baandu baase, ni mutsye mwingile mu biseenge byeenywe mukari, mwikalewo tsintsitsi; ni mwibise mukari imwo khuumalakho imbuka ifwiiti iri, khukhwoolesa lirima ly'Omukasya niikane libire liwewo.

²¹Ari bona Umukasya atsya khurura khukhwaama mu shifwo sheewe, eetse awe babaandu be khu shibala shitaambiso lwe bubwoonaki bwaabwe. Nga waashikholile aryo, shiibala shikhokesanise lubuula kamafuki kaabo boosi babeeribwilakho, ilekhe khuubawo luundi khuubiimbilila abo babeeribwa ta.