Read lumasaaba Isaaya 27 Bible Online

Isaaya 27 - lumasaaba bible

Isaaya 27

¹Shiifukhu isho nga sheetsile khwoola, Leviyatani[4], nga nikwo kuuremu kwe kamaani kukwikalusila mu nyaantsa, kukhaakhakeho bari kutitukhe, ne Umukasya akhaaraambise lurima lweewe, akuhese ni buurafu buukali.

²Khu shiifukhu isho, muli ni khukhwiimba kumweenya kukuwaamba khu kumukuunda kukwikhoyesa.

³Ise Umukasya, niye umuliindi we kumukuunda ukwo, buli imbuka imba nga ingutsukhiilila kameetsi. Ise samweene kane inguliindatsake shiilo ni kumuusi, nio ilekhe khuubawo umuundu yeesi unyala waakukhola buubi ta.

⁴Ari ise siindikho ni lirima lyoosi ta, ne iba nga kumukuunda ukwo kukwabamwo kamawa ni kamarakalu, khali intsiile isoolana ni nako! Khali intsiile ingebwakala, ingookha koosi ni kumulilo ingamalila aasi.

⁵Namwe siinga kumukuunda ukwo kuntsiyikina ise lwe buuliindi, khayo beetse bareerewo lukoosi ni nase, ilala beetse bareerewo lukoosi ni nase.

⁶Mu mbuka iyiitsa mu moni, Yakobo akhekhise kimili kyeewe mwiloba afwaane nga kuusaala, Isiraeli akhaabalaahe luundi anekho kamatuunda, kakaakhaamalatane mu shiibala shoosi.

⁷Manya Umukasya waakhupa ba Isiraeli nga n'akhupa baasiku baabwe? Namwe waakhoonya baalala ni khu nibo nga n'akhoonyaka abo babaakhakakho khuubakhoonya nibo?

⁸Waatsya waapimila Isiraeli shitaambiso, waabayila mu bubowe nga nisho shitaambiso shaabwe, wabasiindikhilisa waabayila aleeyi nga uraambisa imbewo indafu iye bwaamanyaanga khuubatamuusa.

⁹Nashiryo shino nisho shishikane shikile bibyoonako bya Yakobo birusibwewo, shookesanisile ilala shiri bumoyaani bweewe burusibwilewo ilala: nga bakhupakile kamabaale ke bibyeeso bya wele Ashera, kekyele buufu busa, nio ilekhe khuubawo ni shisheeso sheewe na shitweela shishinyala sharama nga shemikhile ta.

¹⁰Ari bona shiriimba shishiilikho ni kuseenge kukuukhiinga, shaaramile awo shonyene busa, babaandu babaashimenyamwo bashaantsukha, shaaraŋaala busa nga kumubiimbi, tsikhaafu tsikyeendamwo nga tsaaya bunyaasi, tsaakona ni mu bweene, naluundi tsaaba nga tsiwululaka ni bisaala byamwo byoosi.

¹¹Nga tsisakya tse khu bisaala tsoomele, tsifunikha tsakwaka aasi, bakhasi beetsa baatsireenya nga tsiikhu, khuutsya khwaasila kumulilo. Ne babaandu bano bali baasilu sibamanya ta, nashiryo Umubuumbi waabwe uwababuumba singene abekho ni shiisa isi bali ta, uyo uwababuumba singene abokesanisekho bubweela bwoosi ta.

¹²Shifukhu isho nga sheetsile khwoola, Umukasya akhateengaase shiibala shishiili akari a Luluutsi Efurati ni luluutsi lwe Misiri, ni nanywe babaandu ba Isiraeli, mukheetse mutweelatweela mubuusane atweela.

¹³Naluundi khu shifukhu isho, bakhaafuure ikhoombi iye kamaani iwulilikhe. Ni babaandu ba Isiraeli abe babaakoraanila mu shibala sha Asiriya, ni naabo abe beesi baayila mu shibala she Misiri, bakhaakobole, beetse besaaye Umukasya khu lukiingi lweewe lukhosefu luluuli mu Yerusalemu.