Read lumasaaba Isaaya 28 Bible Online

Isaaya 28 - lumasaaba bible

Isaaya 28

¹Nga she kumutaambo isi liyabi lye angaaki, mweesi bameesi ba Efurayimu beyiingayiingila, ni shimuli shilikho shiwululukha, shilikho shiwakho bumiliwu bwasho. Shiriimba isho shaayimikha khu ndulo khwe litila lye liiloba liilayi, shiriimba isho nimwo mweesi abo babaanywa iviini beyiingayiingila.

²Ne bona Umukasya ali n'uweewe uuli uwe kamaani luundi ni bunyala. Akheetse nga ali busa nga ikhuungu luundi imbewo iye kamaani, nga ifula iili khukhwisaakikha ni kamaani luundi nameyiriira inyene, nio abakhupe abamalile aasi luukali lweene.

³Buli muundu yeesi umumeesi eyiingayiinga lwa Samariya shiriimba sha Efurayimu shiikhulu, ne bakhaashikwiise aasi bashikhaandakilile mu bikyele.

⁴Samariya niye shiimuli shishiili khuwululukha isho, abe shishibonekha buulayi, nga shayoombekhebwa khu ngaaki khwe liiloba liilayi liliili mu litila, shikhaafwaane busa nga kimifigi kikiroba nga imbuka ishiili khwoola ta, aryo khu mbuka isi umuundu akibonela, abuta waakilya.

⁵Shiifukhu isho nga sheetsile khwoola, Umukasya uwe kamahe umunyali uwa Byoosi, akhaabe busa nga liyabi lye shiriifwa, nga ikuutwa imelamela buulayi isi babaandu beewe babaakhaaramewo.

⁶Umweene akhaawule nga okesanisa bwaŋali mu misaango kyeesi akhala, naluundi niye akhaabe iseebele iye khuufuna kamaani ke khukhwikhiinga khu bilibwa bye biriimba byaabwe.

⁷Bano nabo bateengaala, luundi baatilyaata lwekhuuba baba baameelile lwe viini: Basaayi atweela ni baŋoosi boosi batilyaata lwekhuuba baba bameelile indali, luundi bakoraanisibwa lwe khuumeela; batsya baatilyaata busa lwe ndali nga sibanyala ni khuufuna buurume bwa Wele ta, namwe baaba ni khuukhalawo mu buulayi ta.

⁸Lwekhuuba tsimeetsa tsoosi tsiba tsetsuulekho kamalusi, nga buli aandu oosi etsuule byeesi balusakile.

⁹“Ne ari naanu isi kane niye aleekele bye bilomo bye kamakyesi, naluundi naanu isi kane niye asontsoole buurume bweewe?

¹⁰Lwekhuuba shifwaana busa shiri: Khukhwaama khu shiilakilo khukhwoola khu shilakilo, shilakilo khu shilakilo, [5] lunyilili khu lunyilili, lunyilili khu lunyilili, ano bikyeekhe biri, ni naawo bikyeekhe biri.”

¹¹Aryo Umukasya akhaakanikhe isi babaandu beewe nga araambisa biilomo bye lulimi lulukhamanyikha ta, luulomo lwe kamanaambo kakaandi busa.

¹²Aabasuubisa nga aloma ari, “Shino shili shiifwo she khuuwolelamwo, lekha abo babaaluwile bafune khuuwolakho, ilala shiifwo shino shili she khuuwola.” Ne nibo bekaana khuwuuliilisa.

¹³Ni nashiryo Umukasya akhabakaanise Ilomo yeewe luundi, ikhaabe busa shiilakilo khu shilakilo, shiilakilo khu shilakilo, lunyilili khu lunyilili, lunyilili khu lunyilili, ano bikyeekhe biri, ni naawo bikyeekhe biri; nio banyale khuutsya betuye lwanyuma bakwe aasi shinyumanyuma. Bakhaatsiinisibwe naabi, bawaambikhile mu mureko, lwanyuma babawaambe.

¹⁴Nashiryo, ni muwuliilise buurume bw'Omukasya, inywe mweesi baawuli be mu Yerusalemu babaalekelesaka babaandi.

¹⁵Inywe mwiyiingayiinga busa, nga muloma muri, Ifwe khwaakholile indakaano iye khuufukiilisana ni khuufwa, khwaafukiilisaane ni kamakoombe, nga khuuhela khweetsile khwoola, sikhukhaakhwoolekho ta, lwekhuuba ifwe khweyombekheele bubwiilukhilo bweefwe bwe kamaani, nga nibwo khuwombesa ni bubeeyi bubuundi bwoosi.

¹⁶Nashiryo Umukasya Wele ali khuuloma ari, “Ari bona, ise samweene indi khuukhwiikha libaale lye kumusiingi mu Yerusalemu, libaale liliili lihangafu luundi lyeesi namala khaale khuutsema. Lili libaale lye lisuno naabi lye musoonda, lyeesi umwoombakhi yeesi eyikina khukhwombekhakho, na buli muundu yeesi ufukiilisa, s'alitengaasibwa ta.

¹⁷Ise samweene ikhaabatseme inywe nga inaambisa shishipima she bwaŋali, ni shiipimwo she bukwalaafu.” Nga bubwilukhilo bweenywe ni buli bwe bubeeyi, ise intsya khuuraambisa kamararara khuubumalilawo ilala; nga bubwibisilo bweenywe ni buli bwe khuwombesa khwonyene, intsya khuraambisa khuusalasala khwe kameetsi khuubweeyelawo ilala.

¹⁸Ise ndi khuutsya khukhalamwo indakaano iyakholebwa ni khuufwa, ishuusemwo khuufukiilisana khweesi inywe mwakhola ni kamakoombe. Nga biikosi bye kamaani byeetsile khwiitsa, bikhaabeeye bibamalilewo ilala.

¹⁹Nga khuusalasala khwe kameetsi ikhwo khwoolile, kakheetse kabayile inywe; kakhaasalasale buli mutikhinyi, kasalasale buli kumuusi ni mu shilo; khukhwoolesa nikakhaabamalewo mweesi. Khuumanya buurume buno khukhaareere khuurya khuukali naabi mu baandu.

²⁰Lwekhuuba shitaanda shoowo shayiimbiya naabi, s'ukonakho woolakho ta, ni she khukhwibiimba nasho shaboomba naabi sishikhwoola ta.

²¹Lwekhuuba Umukasya akhenyukhe eetse ashikhole nga n'ashikhola khu ba Firisitiya khu Lukiingi Perazimu, naluundi nga n'ashikhola khu ba Amori mu litila lye Gibiyoni. Naluundi akheetse akhole shishiindu shishiyaangisa naabi, akhaakhole shishiindu abe shishikhakholikhatsakakho ta!

²²Nashiryo mukheelayo mwaaba baalekelesi luundi ta, siinga mukhola muryo, kiminyololo kyeesi babaaboyile kitsya khuba kimisiro khuufuurisakho. Shino Umukasya Umunyali wa byoosi, umweene niye ushimbooleele ise ari waakhaliilewo ilala khuuhesa shiibala shoosi.

²³Ari ni mureke khukhuru mundekeerese buulayi, nimwirekekhe buulayi muwuliilise byeesi ise inoma.

²⁴Umuundu ulima kumukuunda kweewe alima busa waalekha khumiitsa ta? Alima lusoniyoolo busa aryo waalekha khubyaala biilimwa ta?

²⁵Nga waamalile khuulima aryo, lwanyuma s'abyaalamwo bumiitso bweewe? S'alakasakamwo bumiitso nga kumini buumali, kumini, iŋaano, ni seyiri? Nga bumiitso bwa buli saambo ubwo abulakasa musaambo yabwo iyaakhila ni mu lunyilili lwabwo lulweene?

²⁶Umulimi yuno aba waamanyile bye khuukhola, lwekhuuba Wele weewe aba waamuleekeele buulayi bye khuukhola.

²⁷Lusisi luusiro shiili nilwo lweesi baraambisa khuusya kumini umumali ta, ne njeeba baraambisa imiimbo khuumukhupaka. Libaale liisiro shiili nilyo lyeesi baraambisa khuuminaka kumini ta, ne njeeba baraambisa kumutsuungilo kumwaangu.

²⁸Iŋaano isi basya nio baamisamwo kumukaati ili inyaangu khuusya, nashiryo umuundu s'akisya walobelakho ta. Aryo akisya nga araambisa bibyuuma bye kimipiila kye shikaari sheewe sheesi tsiŋwaaŋwa tsikhweesa, ne ndi s'abuunosela ilala ta.

²⁹Bino nabyo byaama isi Umukasya uwe kamahe, Umunyali wa byoosi: khuuboolelela khweewe khuli khuukhulu naabi, naluundi niye uwa umulimi kamakhula ke kamaani.