Read lumasaaba Isaaya 29 Bible Online

Isaaya 29 - lumasaaba bible

Isaaya 29

¹Nga she kumutaambo isi iwe Ariyeli, Ariyeli[6], shiriimba mweesi Dawudi aamenyatsaka; tubaasa kumwiiko khu mwiiko kukuundi, mwikhoyele kamayiiya keenywe keeloosele mu moni nga sikaakama ta.

²Ne iwe Ariyeli, intsya khukhureerera buukosi buukali, ikhaabewo khukhwaantsuwa ni khukhwiwunamila khuukali. Ilala shikhaabeele ilala Ariyeli sheesi shimanyisa, shisheeso shishitsuulekho kamafuki.

³Ise ikheekyele umusiku woowo ikhwibotokhelele tsimbeka tsoosi, ikhaakhwibotokhelesekho bye busoolo, lwanyuma ikhwibwakale ikhuhese.

⁴Lwanyuma nga uliiyo aasi mwiloba ukhaakanikhe; nga uli aasi mwifukhuulu, biilomo byoowo bikhaarure biitse. Liikono lyoowo likhaarure nga lyaama aasi mwiloba lifwaane nga liikono lye kumusaambwa, liikono ilyo likhaarure nga limoonya busa khukhwaama mwiloba.

⁵Ne baasiku boowo babetsulana abo, bakhafwaane busa lifukhuulu lilyanosekha. Baasiku boowo baarafu abo bakhataamusibwe busa nga likhuutsi mu mbewo. Mu khaangu naabi, lubaluba,

⁶nio Umukasya uwe kamahe, Umunyali wa byoosi eetse ni khukuula, ni shinikino she shiibala, ni khuuwaaliila khuukali, nga mulimo imbewo iye khuungu, ni khuungu, atweela ni kumulilo kukuhesa.

⁷Nio karyo kamanaambo koosi abe kakaasoolanisa Ariyeli, kakhaakoraanewo busa kafwaane nga kamarooro! Kamanaambo koosi kakebwakala kamatikiiyi kaasho, kaaba kashitsiinisa bakhaakorewo busa nga kamarooro ke mu shilo.

⁸Shikhaafwaane busa nga umuundu uuli ntsala, n'aroora ari ali khuulya biilyo, ne waasisimukha mwiilo nga intsala imuli buubi. Namwe umuundu uuli bulesa, n'aroora ari ali khuunywa kameetsi, ne waasisimukha kumutikhinyi nga aeetsaeetsa busa nga bulesa bumuli buubi. Nasho shikhaafwaane shiryo isi kamanaambo ke busiku iko, kakaasoolanisa Lukiingi Sayuuni.

⁹Ni muliindekho mwiyaange naabi, mubofwaase tsimoni tseenywe mube baabofu! Ni munywe mumeele, ne ikhaba lwe viini ta! Mutilyaate, ne ikhaba lwe shishimeesa ta!

¹⁰Lwekhuuba Umukasya waabatsukhiliile khusiinywe umwoyo we liilo liikali naabi. Aryo waabofwaasile tsimoni tseenywe, baŋoosi; naluundi waabiimbiliile kimirwe kyeenywe, baaboni.

¹¹Isi inywe she khuubonekhelwa shino shafwaanile busa nga biilomo bibiili mu shitabo sheesi babowelesile. Nga Baashiweele umuundu unyala khuusoma, baamuloma bari soma, umuundu uyo abalomela busa ari, “Ise siinyala khuusoma shiitabo shino lwekhuuba baashibowelesile.”

¹²Ne ndi nga baashiweele umuundu ukhamanyile khuusoma baamulomela bari soma, naye kane alome ari, “Ne ise siinyala khuusoma ta.”

¹³Umukasya aloma ari, “Lwekhuuba babaandu beetsa aambi isiindi nga bekanikhisaka busa biilomo khukhwaama mu khanwa khaabwe, ne nga kimyoyo kyaabwe kiindi aleeyi naabi. Ni khukhwisaaya khweesi baantsisaaya ise, khuli busa khwe mu biilomo byeesi baalekebwela ni babaandu.

¹⁴Ni lwe lomo yino, ikheyaangise babaandu babemunyakasa bano ni bye khukhwiyaangisa bye kamaani. Ni kamakhula kaabo babelaanga bakyesi kakhaawewo, ni khuumanya khwaabo babaaboola bye khuumanya khukhaakorewo.”

¹⁵Nga kumutaambo kwaabanyoolile abo babaabisa khuumanya khwaabwe isi Umukasya! Nibo bakhola tsiŋoonaŋoona tsaabwe mu shimoonyo busa nga bambaasa bari mbaawo umuundu yeesi unyala waamanya namwe waabona sheesi bali khuukhola ta.

¹⁶Nibo bashuusanisa bibiindu byoosi baabyoonakisa! Ari shiina shishifuura buukhulu, umubuumbi, namwe liloba? Manya shishiindu sheesi umuundu ali khuukhola shaaloma umukholi washo shiri, “Iwe s'uuli niye uwaamuumba ise ta”? Namwe shiri, “Iwe uli khuukhola shiina”?

¹⁷Nga ni shilomebwa shiri imbuka yaaramayo ifwiiti iri isi shisaali sha lebanooni shikhekyelele kumukuunda kwe khuulimamwo, ni kimikuunda kye khuuliimamwo kikyele shisaali.

¹⁸Nga shifukhu isho sheetsile khwoola, babaandu bamiinyi be mu maru bakhaawulile biilomo bibisomebwa mu shitabo, ni baabofu abe babaamenya mu shilima balibiimbukha tsimoni tsaabwe, babone.

¹⁹Abo babaali baawolu ni bataambi bakhaafune kumwikhoyo kumushaakha, kweesi Wele Umukasya wa Isiraeli akhaabawe.

²⁰Iyo niyo ikhaabe intsakamwo iyaabo babaamiinilisa babaandi, naluundi bookesanisa khuutsekhelela Wele. Buli umwoonaki yeesi akhaahele.

²¹Wele umweene akhaahese abo babaakanikha bye bubeeyi khu bashaabwe, abo babaakhiingilisa khuuwa baboonaki shitaambiso, ni naabo babaakanikha bubeeyi nio bakhaasise babaandu ba ŋali khuukhalilwa kumusaango mu ŋali.

²²Ari Umukasya Wele wa Isiraeli, uwawonesa Iburayimu mu biwaangafu byeesi aabamo aloma ari, “Baandu baase sikane mwiileyo luundi muswaale ta, ni mu moni mweenywe simukhaabonekho tsisoni ta.

²³Nga mweetsile khubona lisaaye lye babaana liikali, abweene awo nio isi mukhaamanyile muri ise ndi Wele, Umukhosefu wa Isiraeli. Abweene awo mukhaambe ise shiriifwa, muruuye lisiina lyase.

²⁴Abo boosi babaaborokha mu myoyo kyaabwe, bakhaafune khuumanya, ni naabo babekhala nga beluŋuunya buli mbuka, bakhaafukiilise khuboolelelwa.”