Read lumasaaba Isaaya 3 Bible Online

Isaaya 3 - lumasaaba bible

Isaaya 3

¹Ari bona Umukasya Wele Umunyali wa byoosi ali khuutsya khurusa khu Yerusalemu ni khu Yuda, buli shiindu shoosi sheesi beyikina. Ali khuutsya khubarusakho biilyo byaabwe byoosi ni kameetsi keene koosi,

²atweela n'umuundu umukhulu ubafuurakho kamaani, n'umusoolani mweene, abarusekho baakayi ni baŋoosi beene, balyuuli atweela ni naabo babaakanikha bibiitsya khuubawo iburaangisi,

³ni baakhulu be mu mahe atweela ni babaandu baakhulu babaandi, baawi be kamakhula, babaakhola bibiindu bye kamakhono, atweela na buli muundu uwikholakhola mu bye kamakyesi bibikhali bitweela ta.

⁴Indikhola nikyelise basooleli khuuba baaraangilisi baabwe, ni babaana baŋaalye khuuba baawuli baabwe.

⁵Babaandu balimiinikhilisa bashaabwe, umuundu mutweela amiinikhilise uwashe, umwesanwa mutweela isi umwesanwa washe. Bahele balinyukhila basaakhulu, babaandu be bunywaanywa balikhomyaasa babaandu be biriifwa.

⁶Mu bifukhu ibyo, umuundu mutweela aliwaamba waandaaye, nga bali muungo mwa paapa waabwe, amulomele ari, “Iwe nga n'ulikho ni twaati, n'ube umuraangilisi weefwe! Uryo ube umuwuli we kamakubili kakaafuniaakikhaka kano.”

⁷Ne naye alikobolamwo ari, “Taawe, ise sinyala nayeeta nakhafwiiti khoosi ta. Lwekhuuba ise siindikho ni biilyo bibiimala, namwe tsingubo tsoosi ta. Nashiryo, mukhaamba ise buufunisi buno bwe khuuraangilila ta.”

⁸Lwekhuuba Yerusalemu shilikho shitaalataala busa, ni Yuda shitsya khukwa, lwekhuuba bakanikha bye bubeeyi byonyene khu Mukasya, ni buraambi bwaabwe bwokesanisa bumiinyi bwonyene isi niye. Shino shaaba nga shikhomyaasa shiriifwa sha Wele.

⁹Imbonekha iye mu moni mwaabwe ibokesanisa iri bali baryo. Nibo baayanikhila busa bibyoonako byaabwe nga babaandu be Sodomu ni baakhola, sibaabitsisakho ta. Nashiryo kumutaambo kwaabanyoolile! Lwekhuuba babeene bereerere khuuhela khuno.

¹⁰Ari boolela babaandu babaali bakwalaafu muri nibo kane babe buulayi. Kane bekhoyele mu biindu biilayi lwekhuuba baabiraambiliile babeene.

¹¹Ne isi baboonaki kumutaambo kwabeetsiile! Kane bibyaabwe bibe biibi naabi, lwekhuuba batsya khuufuna ibyo bibibakhila nibo.

¹²Baaraangilisi babaakhola bye bubwaana bamiinikhilisa babaandu baase, ni bakhasi bukhasi nibo babaabawula nibo. O inywe babaandu baase, baaraangilisi beenywe balikho bababorosa, nga babakosaasa khuubayila khu ntsila ikhali iyaŋali ta.

¹³Ari Umukasya umweene weeyiliile shiifwo sheewe khukhwiwotsakho, weenyukhile khuukhala kumusaango kwe babaandu beewe.

¹⁴Umukasya umweene eetsa khuukhalila baasakhulu atweela ni baaraangilisi be babaandu beewe kumusaango, nga abalomela ari, “Inywe nibo baboonakisile Isiraeli inimilo yase. Ni muntsu tseenywe mwaayitsulamwo bibiindu byeesi mwayaaya khukhwaama khu baandu bataambi.”

¹⁵Umukasya uwe kamahe, Umunyali wa byoosi areeba ari, “Shiina ilala sheesi mulikho mumanyisa ni mutsya nga mufooraka babaandu bataambi, nga mubamiinila kimirwe kyaabwe aasi mwifukhuulu?”

¹⁶Umukasya waaloma ari, “Bakhasi be mu Yerusalemu, bakyeenda balolela angaaki busa, nga baleeyisile kamakosi kaabwe, nga bamiinamiina tsimoni tsaabwe akhali tsisoni ta. Bakyeenda nga bebweyile birere bye mu bikyele bibikhoonyana, bari nio babaandu babalolelele nga ni bakyeenda.

¹⁷Aryo Umukasya, akhaabareerekho bihara, ababekekho liitsuune lyaabwe, nio bakhaana ba Sayuuni bakyeende nga bali ni bibyoole busa.”

¹⁸Shifukhu isho shikhoole, isi Umukasya akhaabulilemo bakhasi be mu Yerusalemu biikwaaro, ni neebyo byeesi besaaha nio baaba baamiliwu shaakila bakyeendela khu ngaaki busa, nga nibyo: tsindeekwe tse khu bikyele, biitambaala bye murwe, ni bubuuma bwe mu milo,

¹⁹bubuuma bipalakasi bweesi basabikha khu maru, ni bweesi bakwaara khu makhono, ni neebyo byoosi byeesi babiimba imurwe;

²⁰nga tsikofwiira, byeesi basabikha mu khuumbo, kimisipi, bibiwunya buulayi, ni byeesi bebowelela;

²¹ni tsintsiyi tsoosi tseesi basabikha khu ntsala tsaabwe atweela ni kamoolu keene;

²²ni bikwaaro byeesi bakwaara lwe kamayiiya, bikwaaro bye kamayeeye, byeesi bebiimba khu ngaaki, ni busawu bwe mukhono;

²³ni tsindolelo, ni bikwaaro bibimelamela buulayi, bubuuma bwe tsisaambo tsoosi bweesi besaaha, atweela ni bitaambaala bye tsisaambo tsitsikhali ndweela ta, byeesi babowa khu murwe.

²⁴Mu shifwo sheebyo bibiwunya buulayi, ilibawo khuuwunya buubolo. Ni mu shifwo she kumusipi, ilibawo kumukhaandaala, ni mu shifwo she liitsuune liilayi, liliwululukha yikyele shishoole busa. Mu shifwo she khuukwaara biikwaaro bibimelamela, balikwaara bitsina busa. Buumiliwu bwaabwe bulikyelamwo tsisoni tsonyene.

²⁵Basaani be mu shiriimba balikhoonyebwa ni lurima, ni baaliindi be shiriimba be kamaani balifwiila mu busoolo.

²⁶Biilibwa bye shiriimba bilyaantsuwa, luundi bisole. Shiriimba shoosi shikhaafwaane busa nga umukhasi uuli ni ngunyi ingali, nga weyabuulemo bikwaaro, wekhaale aasi khwiloba busa.