Read lumasaaba Isaaya 30 Bible Online

Isaaya 30 - lumasaaba bible

Isaaya 30

¹Umukasya alaangilila ari, “Nga she kumutaambo isi babaana baase babaali banabumiinyi. Bekholela tsiŋoonaŋoona tsitsikhafwaanana ni tsitsase ta. Bakhola tsikwangwaani tse khuukholakana ni kamanaambo kakaandi ne nga Umwoyo wase waakhubaraaangilila ta, isho shaakila bakhola bibyoonako biikali.

²Bekhuula busa baatsya i Misiri nga baakhuntsireebakho khusiise ta, baatsya beebisa iyo nga beyikina buliindi bwa Faraawo, batsya beheentsela e khukhwiibisa mu shiniini she Misiri.

³Ne mu khwiyikina Faraawo uyo muryo, mutsya khuswaala busa, khuutsya khwiheentsela e khukhwibisa mu shiniini she Misiri, mutsya khutsangalaala busa.

⁴Ne abe yakhaba nga buuwuli bweewe butsya bwoola i Zowani, ni baakhulu beewe babaamukhiikhilila batsya boola i Hanesi,

⁵abo boosi babaamwiyikina niye batsya khuswaala busa, lwekhuuba nibo bali babaandu babaakhanyala baayeeta ta. Mbaawo buyeeti bweesi banyala bawaanayo ta, khuurusakho bareera busa khuuswaala ni tsisoni.”

⁶Buurume buno bweetsa nga buwaamba khu solo tse mu Negevu: Khuukyeenda nga babirira mu shibala shishitsuule bikosi ni kumutaambo kumukali, shishiilimo tsitalanyi tsiseetsa ni tsitalanyi tsikhasi, naluundi shishiilimwo tsindemu tsikhilakhima ni nalwoowo, baarume batsya nga baasutile bye buyiindifu biikali nga baabimemisile tsisikilya, ni bibiindu bye lisuno bibiindi nga baabisutisile tsiŋamila, khuutsya khuubiwaanayo isi shiibala she Misiri isho, ne nga mbaawo sheesi batsya khufunayo ta.

⁷Buyeeti bweesi Misiri ibasuubisa ubwo mbaamwo shiilayi ta, nashiryo imbulaanga busa ndi “Rahabu ukhanyala waakhola shishiindu shoosi ta.”[7]

⁸Ari tsya urone tsilomo tsino khwibaale lye khuuronakho. Tsirone mu shitabo, nio tsibewo khukhwoola khu bifukhu bibiitsa iburaangisi, tsilomo tsino tsibe nga umujulilwa biilo ni biilo.

⁹Lwekhuuba babaandu bano bali banabumiinyi luukali, bali babaana be bubeeyi, naluundi bali babaandu babaakhakana khuwuliilisa byeesi Umukasya abalomela ta.

¹⁰Batsya isi baaboni baabalomela bari, “Mukheelayo luundi khuubonekhelwa kamarooro ta!” Naluundi baalomela baŋoosi bari, “Mukhakhuboolelakho bibiindu bibiili byaŋali ta, khukana mukhuboolele ibyo bibiwulilikha buulayi byonyene. Ni mulakule mukhuboolele bye bubeeyi.

¹¹Ni murure khu mukhoosi kumweene, muborokhe murure khu ntsila. Mukheelayo luundi mwaakhukanikhayo bibiwaamba khu ‘Mukhosefu wa Isiraeli’ ta.”

¹²Nashiryo Umukhosefu wa Isiraeli umweene naye aloma ari, “Lwekhuuba inywe mwaalekelesile buurume buno, mwaatsya mweyikina khuumiinilisibwa ni bubeeyi, mwaabimalilakho ilala;

¹³isho shinakila buukosi buno bwiitse bubatundubikhe, bufwaane busa nga luufwa luluuli mu liitikiiyi lileeyi naabi lilinamilile, nga likana khukwa. Lubaluba kane liruure aasi, likhupe aasi kumuwulo kumuboofu naabi.

¹⁴Kane likhupe aasi lisalanile lifwaane busa nga inyuungu y'omubuumbi, isi bakhupile aasi yaatikhaka yaasalanila yoosi; nga mbaawo ni shikholontsyo shalyo na shitweela shishikane shituyikhane ta, nio manya wanyala khubukulilakho kumulilo khukhwaama mu mayika ta, namwe waatayilakho kameetsi khukhwaama mu luutsi ta.”

¹⁵Ari sheesi Umukasya Wele, Umukhosefu wa Isiraeli aloma nisho shino ari, “Mu khushuukha mwaakobola isi ndi, ni khuufuna khuuwola musiise, kane muwonesebwe. Mu buwolu ni bubwiyikinwa, nimwo mweesi kane munyoolele kamaani.” Ne inywe mwaalekha khufukiilila ta.

¹⁶Ne inywe mwaloba, mwaaloma muri, “Taawe, kane khwikwaabe khu ŋwaaŋwa khulabate khutsye.” Muryo kane mutime mutsye. Inywe mwaaloma luundi muri, “Kane khutimile khu ŋwaaŋwa tse kamaani tsitsilabata naabi.” Ne baasiku beenywe babaakane babatimise inywe nibo kane babe babaalabata naabikho.

¹⁷Babaandu shikana shitweela musiinywe mukhaatitukhe lwe khuurya umuundu mutweela yenyene. Ne baraano khu nibo nga berusile, mweesi mukhaatitukhe muwewo. Inywe mukhaafwaane busa nga kumulongooti kukuuli khu lukiingi khu ngaaki, naluundi mufwaane busa nga ibendela iramile khu lukiingi.

¹⁸Ni nashiryo, Umukasya waabaaliindiilile inywe mwiitse abawaambile shiisa, umweene wenyukhile aasi khuubokesanisa inywe bubweela bweewe. Lwekhuuba Umukasya ali Wele uwe bwaŋali. Nga bali ni tsikhabi abo babaamuliindiilila lwe buyeeti!

¹⁹Inywe babaandu be mu Sayuuni, inywe mweesi babaamenya mu Yerusalemu, simukheeleyo luundi khuulila kamasika ta. Ilala niye akhaabawaambile inywe shiisa nga mwaamuliliile lwe buyeeti. Khu mbuka nyene isi awulilila khuulila khweenywe, kane awulile abayeete.

²⁰Abe yakhaba nga Umukasya akhuwa iwe kumukaati kwe ngunyi khuuba biilyo is'uli, ni khuutaambisibwa khuuba nga she khuunywa, ne shitweela busa kane abe aambi ni nawe khuuba Umuleekeli woowo. Iwe wamweene kane ubonatsake Umuleekeli woowo ni tsimoni tsoowo.

²¹Oba ushuukha utsya khu lubeka lwe kumukhono kumulayi, namwe kumunyeletsi, khukhuru khwoowo khukhaawulile ilomo yeewe; khukhaawulile likono nga likanikhila imukoongo nga liloma liri, “Kuno nikwo kumukhoosi, tsiila khubweenekhwo.”

²²Nio nawe abweene awo ufuniaakake bifwaani bye feetsa, ni bifwaani abe bibiilikho izaabu. Uryo ukhaabimwaatake ubisalanise bifwaane nga bitsina busa; nio ubilomele uri, “Rurawo mutsye!”

²³Nio lwanyuma Umukasya akhaabawe ifula khu mbuka isi mubyaalila biilime byeenywe mwiloba. Ni likyesa lye biilyo khukhwaama mu liloba, likhaabe liilayi naabi luundi nga liikali. Khu mbuka iyo, bibyaayo byeenywe bikhaayile mu maayilo kamaboofu kameene.

²⁴Ni tsiyeeyi atweela ni tsisikilya tsitsibalimila kimikuunda kyeenywe tsikhaalye bunyaasi buulayi bubuulimwo kumuunyu, bweesi baamala khuusisakula buulayi baarusamo bibikhaliibwa ta.

²⁵Imbuka iyo nga yeetsile khwoola, shikhaabe shifukhu she khuusala baasiku beenywe boosi, ni kiminaala kyoosi kikhaakwe aasi, nio lwanyuma ibewo tsisebele tsitsitsukhiliila kameetsi, keekhe khu njiinji tsindeeyi atweela ni bikoongo byoosi.

²⁶Khu mbuka iyo, kumweesi kukhaakhose kuruse buwaanga bubufwaana nga bwe nyaanga, ni buwaanga bwe nyaanga bukhaakhose kimiluundi musaafu khufuurisakho, bufwaane nga buwaanga bwe bifukhu musaafu bubwiitsa kumuluundi mutweela. Imbuka iyo niyo isi Umukasya akhaarakikhile khuuwonesa babaandu beewe, ni khuukaanga kamakoontsyo keesi umweene aabakhupa.

²⁷Bonakho! Lisiina ly'Omukasya liitsa nga lyaama i aleeyi, nga lyaaburukha ni lirima liikali, nga liituukha lisuusi liimali tii. Ni khu minwa kyeewe khweetsuule buurafu, ni biilomo bibirura khukhwaama mu lulomo lweewe byoosha nga kumulilo.

²⁸Ni kumuukha kweewe kweesi aheela kurura kwafwaanile busa nga kameetsi kakaasalasala, keetsula khukhwoola mu milo mwe baasiku beewe. Umweene akhaaraambise khakyukyuungo khe khuuhesa akyukyuunge kamanaambo. Akhaabowe lukhoba mu minwa kye babaandu be kamanaambo ababorose.

²⁹Inywe mukheembe kimweenya kye khukhwikhoya, mufwaane nga babeembela khu bifukhu bye kamayiiya kamakhosefu. Kimyoyo kyeenywe kikheetsule isangaalo, shifwaane busa nga umuundu ufuura kumulele n'araangilila babaandu khuuniina khu lukiingi lw'Omukasya, khuutsya isi Lulwaanda lwa Isiraeli.

³⁰Abweene awo Umukasya akhaaruse likono lye bunyala liwulilikhe. Akhaakolole kumukhono kweewe kwe kamaani babaandu bakumanye, kukhaame mu ngaaki kwiikhe ni lirima liikali, nga kuli ni kumulilo kukuutindiima luundi kukuuhesa, nga kwiitsa ni khuulomakhana khwe mu namufweeli, khuukuula khwe fula, atweela ni kamararara ke kamaani.

³¹Nga Umukasya waakhookhile ni likono lyeewe lye kamaani, ba Asiriya bakhaanikine bawekho busa. Akhaabakhupe abaruure aasi nga raambisa imiimbo yeewe.

³²Buli lweesi Umukasya enyusila imiimbo yeewe iwa shitaambiso khuubakhupa, shikhaawulilikhe busa nga bibisakayisa bye kimyeenya ni kamatuungu. Nga niye wenyusile kumukhono kweewe kwe kamaani mu ngaaki, Umukasya akhaabe asoolanisa ba Asiriya.

³³Shiifwo she khukhwoosha shaarekekhebwa khaale, ilala shaarekekhebwa khaale khulw'omuyiinga wa Asiriya; iliwo umuundu uwalima lilowo waalileeyisa luundi waalibalaayisa, bapaangamwo tsiikhu. Kumuukha kweesi Umukasya aheela, kweetsa nga kwafwaanile busa nga shibiriti ni kamafura, kwaaburusa kumulilo kwaatindiima.