Read lumasaaba Isaaya 31 Bible Online

Isaaya 31 - lumasaaba bible

Isaaya 31

¹Nga kumutaambo kwaabanyoolile abo babaatsya i Misiri bari batsya khuufuna buyeeti, nga beyikina tsiŋwaaŋwa tsaabwe, ni kamakaali atweela ni naabo babaakyeendelakho. Batsya beyikina kamakaali kaabwe, lwekhuuba kali kamakali naabi naluundi lwekhuuba babaandu babekhala khu ŋwaaŋwa bali be kamaani naabi, ne baalekha khulolelela isi Umukhosefu wa Isiraeli, namwe khuutsya khwiireebakho isi Umukasya ta.

²Ate nga mu makyesi keewe, Umukasya akhaabasiindikhile buukosi; niye s'ashuukhakho bibyambaaso byeewe waakobosayo tsilomo tseesi aba waalomile ta. Nashiryo kane enyukhe asoolanise abo babaakhola bye bumoyaani, atweela ni naabo babaabayeetakho khuubikhola.

³Ba Misiri bano bali babaandu buundu busa, sibali Wele ta; ni tsiŋwaaŋwa tsaabwe tsili ni kumubili busa ni kamafuki, sitsili kumwoyo ta. Nashiryo nga Umukasya wenyusile kumukhono kweewe khuubasoolanisa, abo boosi babaabayeetakho bakhaafulyatsame busa, ni naabo beesi balikho bayeeta bakhekhupe aasi kumuwuulo, baryo boosi bahelele atweela.

⁴Umukasya umweene ambooleele ise ari, “Nga italanyi isoleeli iye kamaani nibuutsa nga ilikho ni saanyi isi iwaambile, sinyala yaarya lwe liyoombo lyeesi babaayi babaabusaane baba bali khuukhupa ta. Ni musaambo niyo ndweela, Umukasya uwe kamahe umunyali wa byoosi, akheekhe aasi asoolanile khu lukiingi Sayuuni ni khu bikoongo byawo.

⁵Umukasya uwe kamahe, Umunyali wa byoosi akhebotokhelele Yerusalemu ashikhiinge, afwaane nga binywiinywi bye mu ngaaki ni biibotokhelela. Umweene akhaakhiinge luundi awonese shiriimba, Umweene akhaashibirirekho aryo ashiikobosele umweene.”

⁶Inywe babaandu ba Isiraeli, ni mushuukhe mukobole isi Umukasya, isi mwabeene mwamiinyaalila luukali.

⁷Lwekhuuba khu shifukhu isho, buli mutweela khusiinywe akhaatuume aleeyi bifwaani bye feetsa byoosi, ni bibiindi bibiili bye zaabu, byeesi kamakhono keenywe kaakholela mu bwoonaki.

⁸Ba Asiriya bakhaahele nga beeribwa ni lurima lulukhali lwe babaandu ta, lurima lulukhali lwe babaandu ta nilwo lulukhaabahese. Nashiryo bakhaaryaryamukhe batime belukhe, ne basaani baabwe basooleli bakhaabawaambe babayile baraambe kimilimo kimisiro.

⁹Kutikiiyi kwaabwe kukhewuule kumuwuulo lwe khuunikina khuukali, ni bawuli baasho bakhaaryaryamukhe batime batsye lwe khuurya busoolo. Bino Umukasya umweene niye ubikanikha, kumulilo kweewe nikwo kukwaburukhila mu Sayuuni, kumulilo kweewe kutindiimila mu Yerusalemu.