Read lumasaaba Isaaya 32 Bible Online

Isaaya 32 - lumasaaba bible

Isaaya 32

¹Bonakho, umuyiinga ukhaawule nga araambisa bukwalaafu, ni bawuli babaali aasi eewe, bakhaawule nga baraambisa bwaŋali.

²Buli mutweela khu nibo akhaabe busa nga she khukhwikhiinga isi imbewo ingali, naluundi babe bubwilukhilo isi ikhuungu, bakhafwaane nga tsintsitsi tse kameetsi mu mubiimbi, ate babe nga shishiniini she lulwaanda luboofu mu shibala shishoomu.

³Lwanyuma tsimoni tsaabo babaabona sitsikhaafunyikhilile ta, ni khumaru khwaabo babaawulila khukhaarekeerese buulayi.

⁴Ni khukhwaambaasa khwaabo babaayuubakilisaka, khukhaabemo kamakyesi, ni naabo babaakanikha nga bamiimikila, bakhaakanikhe buulayi naabi.

⁵Umuundu umusilu s'alilaangibwa luundi khuuba uwe angaaki ta, namwe khuukhwisamwo shiriifwa umuundu ukhalimwo ta.

⁶Lwekhuuba babaandu baasilu bakanikha bye busilu, ni mu myoyo kyaabwe baayitsulamwo buubi bwonyene. Bakhola bibiindu bibikhali bye bwa wele ta, luundi basalanisa indeekela iye bubeeyi iwaamba khu Mukasya. Balyakhana umuundu ukhali ni biilyo baamulekha ntsala, ni nooyo uuli bulesa, sibamuwakho kameetsi ta.

⁷Ikhola iy'omuundu ukhalimwo ta, ili imbi yonyene, niye ekhala nga akhola tsiŋoonaŋoona tse bumoyaani tsonyene. Biilomo byeesi akanikha biba bye bubeeyi khuuhesa bataambi, abe yakhaba nga khukhwilootsa khw'omutaambi khuli khwa ŋali.

⁸Ne umuundu umwilama akhola tsiŋoonaŋoona tse bubwilama, naluundi bibiindu bye bubwilama nibyo byeesi akanikhilila.

⁹Inywe bakhasi babaali buulayi, nimwinyukhe aasi murekeerese byeesi inoma, inywe bakhaana babewulila muri muli ni lukoosi, reka khumaru muwuliilise byeesi ise inganikha.

¹⁰Mu bifukhu bikyeekhe biri mu mwiiko, inywe bakhasi babewulila muri muli buulayi, mutsya khuwaambibwa kumutaambo; kimisabibu kyeenywe sikikhaamekho ta, ni likyesa lye bibyaamo silikhaabewo ta.

¹¹Ari ni mwiyembelele munikine, inywe bakhasi babewulila buulayi; ni munikine luukali inywe bakhaana abe babaali buulayi. Ni mwifuule biikwaaro byeenywe murame bukhuna busa, muryo mwibowe tsisawu tse makoongwe mu bikuute byeenywe.

¹²Ni mwikhupe mu bifuba byeenywe mu mutaambo lwe kimikuunda kyeenywe kikitsuule biilayi, ni lwe kimisabibu kyeenywe kikyaama luukali.

¹³Lwekhuuba liiswa lye babaandu baase likhaatsowemu kamawa ni kamarakalu, ni lwe tsiintsu abe tsitsitsulamwo kumwikhoyo, mu shiriimba she sangaalo, sibikhaabewo ta.

¹⁴Lubili lukhaaraŋaalile awo busa, ni shiriimba sishikhaabemo babaandu ta; lukoongo ni kumunaala kwe khukhwiitseeta bikhaarame awo busa, mweesi tsisikilya ni bibyaayo bibiindi byaayila bunyaasi,

¹⁵khukhwoolesa Umwoyo nakhaatsukhibwe khuusiifwe khukhwaama mwikulu. Lwanyuma liiswa abe liliili kumubiimbi liikyele inimilo iye biilime, ni liiswa liilayi lyeene ilyo lyaamemwo biilime biikali bifwaane busa nga shisaali.

¹⁶Nio lwanyuma bwaŋali bumalatane mu mubiimbi, ni bukwalaafu bumenye khu mikuunda kikiilimwo biilime.

¹⁷Ni bukwalaafu bukhaamemwo lukoosi. Ilala bibikhaame mu bukwalaafu ikhaabe khuuwoleela ni buliindi buulayi, biilo ni biilo.

¹⁸Babaandu baase bakhaamenye mu bumenyo bwe lukoosi, biifwo bye khuumenyamwo bibiilimwo khukhwiwulila buulayi, naluundi biifwo bye khuwolelamwo bibikhalimwo khutumbuukha khwoosi ta.

¹⁹Ne abe yakhaba nga kamararara kakhaabe makali kakhupe shisaali kashimalile aasi, ni shiriimba shoosi shiweele aasi khwiloba,

²⁰inywe muli ni tsikhabi! Inywe mukhaamiitse bumiitso bweenywe khu ndulo khwa buli luutsi lwe kameetsi, mulekhuule tsikhaafu atweela ni tsisikilya tseenywe tsikyeende nga tsaayila buli aandu oosi.