Read lumasaaba Isaaya 33 Bible Online

Isaaya 33 - lumasaaba bible

Isaaya 33

¹Nga kumutaambo kwaabanyoolile inywe babaahesa babaandi ate nga inywe mbaawo ubahesile ta. Mulya mu basheenywe tsimbomelo, ate nga mbaawo umuundu yeesi ubaliilemwo inywe tsimbomelo ta. Inywe nga mwaamalile khuhesa babaandi, nanywe bakhaabahesele ilala. Nga mwaamalile khuukhalila babaandi tsimbomelo, nanywe bakhaabalyemo tsimbomelo.

²O Umukasya khuwaambile ifwe shiisa, lwekhuuba ifwe khwaakhuliindiliile iwe. N'ube kumukhono kweefwe kwe kamaani buli mutikhinyi, naluundi ube buwonesi bweefwe mu mbuka iye biikosi.

³Iwe nga wenyusile likono lyoowo lye kamaani, babaandu batitukha. Iwe nga wenyukhile wemikhile angaaki, kamanaambo kasalanila busa.

⁴Nga n'ubona ikhuungu ni ikwa mu nimilo yoonakisa biilime, nanywe byeesi mwibuusiile bikhaafwaane biryo, nga tsiisike ni tsikwa mu mikuunda tsoonakisa biilime, nanywe babaandu bakhaabakwekho babafwaanise baryo.

⁵Abe yakhaba nga Umukasya ali angaaki luukali, lwekhuuba amenya mu ngaaki mwikulu, ne akhaakhole Sayuuni shiitsuulemo bwaŋali atweela ni bukwalaafu.

⁶Khu mbuka yeenywe iyo niye umweene akhaabe kumusiingi kweenywe kumuhangafu, libiikhilo lye buwonesi lye kamaani, ni kamakhula naluundi ni kamakyesi. Khuurya Umukasya nisho shishinyalisisa khukhwoola khu she buyiindifu sheewe shino.

⁷Ari bona basoolani beenywe be kamaani balikho batoloolela kamasika mu nguudo, ni baarume beenywe be lukoosi balikho baantsuwa luukali.

⁸Tsinguudo tseenywe tsimbalaayi tsoosi tsaaramile busa nga mbaamwo babaandu ta, mbaawo n'umuundu na mutweela uuli khukyeendelamwo ta. Baafuniaakile tsikwangwaani tsaabwe tsoosi, ni bajulisi babaabawo baabalekelesile. Sibalikho n'umuundu namutweela isi bawa lukoosi ta.

⁹Shiibala shoosi shilikho shilila luundi shetsuule kumutaambo; Lebanooni shaniaalile lwe khuuswaala khuukali. Shisiintsa sha Sharoni shekyelile busa nga kumusaaleela kwe mu kumubiimbi. Ni Bashani atweela ni Karumeeli bilikho bilakasa busa kamasaafu kaabyo.

¹⁰Umukasya aloma ari, “Ari kane ninyukhe khu ngaaki. Ari kane nisute nimikhe angaaki; Ari kane niyokesanise iniinisibwe angaaki.

¹¹Inywe muli busa nga babaahesa tsiinda tse likhuutsi busa, ni khuusaala mwasaala bunyaasi bubwoomu; nashiryo kumuukha kweenywe kweesi muheela kumweene kukhekyele kumulilo kuuboosha kubamalewo.

¹²Babaandu beenywe bakhaafwaane nga babokhebwele ni kumulilo bafwaane busa nga likokhe, bakhaafwaane busa nga kamakhwa keesi baarema kooma, lwanyuma baakoosha ni kumulilo.”

¹³Nimuwuliilise byeesi ikholile, inywe kamanaambo kakaali aleeyi; ni nanywe babaali ahaambi ano, mufukiiliise bunyala bwase.

¹⁴Abo babaali baboonaki mu Sayuuni balikho banikina lwe buuri buukali. Khuurya khuukali khwaawaambile abo babaakharya Wele ta. Belootsa bari, “Naanu unyala waabawo mulamu mu mulilo kukwoosha kuno? Ne naanu unyala wahaandalalila kumulilo kukwoosha kwaalekha khusima kuno?”

¹⁵Niye umuundu ukyeendela mu bukwalaafu luundi waakanikha bye bukwalaafu, uyo uwikaana khuukhola bye khuulyakhana, uyo uwisisakulila ilala waalekha khuulya iwoongo ta, niye ali umuundu ukhafukiilisa kamaru keewe khuwuliilisa bye khutsukha kamafuki ta, naluundi niye s'afukiilisa tsimoni tseewe khuulolelela bye bubwoonaki ta.

¹⁶Umweene uyo niye umuundu ulimenya mu bifwo bye angaaki. Lumako lwe buliindi bweewe lukhaabe kamabaale ke mu njiinji. Biilyo bikhaamuweebwe akhali khukhwikanakana ta, ni kameetsi ke khuunywa kakhaabewo buli mbuka.

¹⁷Tsimoni tsoowo tsikhaabone umuyiinga nga ali mu shiriifwa sheewe she kamaani, naluundi tsikhaabone shiibala shibalaayi luukali.

¹⁸Mu byambaaso byoowo ukhekhale ushebulile imbuka iye kumutaambo kuno nga yaabira khaale, nga wireeba uri, Umukhulu uwabalatsaka bibiindu ali waheena? Umukhulu uwakholatsaka khu bye kimisolo ali eena? Uyo uwabalatsaka kiminaala kye khukhwiliinda waatsya eena?

¹⁹Iwe s'ukheeleyo luundi khuubonakho babaandu baarafu bano ta, babaandu babaakanikha luulimi lukyeni lweesi ukhamanyile ta, naluundi babaandu babaakanikha nga bamiimikila, nga sibamanyikha byeesi baloma ta.

²⁰Ne yinyusa tsimoni ubone shiriimba Sayuuni, shiifwo shishareebwawo lwe kamayiiya kamakhosefu. Tsimoni tsoowo tsikhaabone Yerusalemu, shiifwo she khuumenyamwo she lukoosi lwonyene, lisari lilikhakhuulibwa ta, mbaawo unyala waakhuula kimibya kyalyo ta, namwe kimikosi kyakhwo sikinyala kyaakhalikha ta.

²¹Ibweene iyo, Umukasya akhaabe Umunyali weefwe. Akhaafwaane busa nga shiifwo she tsiintsitsi tse kameetsi tsitsasalanila buli aandu, isi umusiku akhanyala waambukha na khwaambukha ta, namwe abe yakhaba imeeri y'omusiku khuukhalisa yambukha ta.

²²Lwekhuuba Umukasya niye Umukayi weefwe, Umukasya niye ukhuwa ifwe kamakaambila, niye ali umuyiinga weefwe, naluundi niye ukhaakhuwonese ifwe.

²³Kimikosi ky'omusiku kikibowa ari kyakaangulukhile, ari sibanyala baabowa banyweesa kumulongooti kwaabwe ta, namwe sibanyala baabalaayisa shishitimisa imeeri ta. Lwanyuma bibiindu biikali abe byeesi bayaayile khu baandu bikhaakabananisibwemo, abe yakhaba ni babaandu baaleme nabo bakhaayilekho kumukabo kwaabwe.

²⁴Mbaawo na mutweela mu baandu ba Isiraeli ukhaalomekho ari, “Ise ndi mulwaale ta”; Lwekhuuba Umukasya akheyakhile bibyoonako byaabo boosi babaamenya ibweene iyo.