Read lumasaaba Isaaya 34 Bible Online

Isaaya 34 - lumasaaba bible

Isaaya 34

¹Ni mwiitse aambi, inywe kamanaambo koosi, murekeerese; ni muwuliilise buulayi inywe babaandu mweesi! Lekha shiibala shirekeerese, khuuyililamwo ni babaandu babaashiilimwo; liloba atweela ni neebyo bibilyaamamwo.

²Lwekhuuba Umukasya wetsuule lirima liikali lwe kamanaambo koosi; waabakhalaliile naabi nibo atweela ni kamahe kaabwe. Nashiryo atsya khubahesela ilala boosi, atsya khuubawaanayo batsye babasalake.

³Kimilaambo kyaabo babeeribwa kikhaatuumibwe busa nga kyaakhusiikhibwa ta, ni bubolo bwe kimilaambo kikiili khuubola bukhetuukhe mu shibala. Kamafuki kaabwe kakherurukukhe khu njiinji.

⁴Liiye lye bye mwikulu lyoosi likhaayengukhake liwewo, ni likulu lilyeene likhaafunyibwe busa nga lupapula. Tsinieniesi tsikhaakwe khukhwaama mwikulu, nga n'ubona kamasaafu ni kakwa khukhwaama khu musabibu, namwe nga n'ubona lituunda liliniaalile nilihanukha khukhwaama khu kuusaala kufigi.

⁵Nga lurima lwase lwaamalile khuukhola kumulimo kwalwo mwikulu, bona ari lulikho lwiikha nga lwiitsa khuukwa khu Edomu, nilyo linaambo lye babaandu beesi namala khaale khuukhalila kumusaango kwe khuhela.

⁶Lurima lw'Omukasya lwetsuulekho kamafuki, naluundi lwetsuulekho kiminaawa, lulikho kamafuki ke kamasheese ni tsimbusi, lwetsuulekho kiminaawa kye khu mbiko tse kamamiiku. Ilala Umukasya waakholile isaayilo mu shiriimba sha Bozira, ikhaabewo khuuhesa khwe baakali mu shibala sha Edomu.

⁷Tsiyeeyi tse mwirome natso tsikhaafwiile atweela ni natso, tsiwuunwa tsisoleeli atweela ni tsiwuunwa tse kamaani. Shibala shaabwe shoosi shikheetsulekho kamafuki, liloba lyaabwe litsulemwo kiminaawa.

⁸Lwekhuuba Umukasya ali ni shifukhu sheewe she khukhwiliyasilakho, ni kumwiiko kwe khuusasula lweebyo bibyakholebwa khu Sayuuni.

⁹Tsintsitsi tsa Edomu tse kameetsi tsikhekyele shiisaawe shishoomu shisheene, ni lifukhuulu lyakhwo likhaabe likhafu naabi nga kumulilo, shibala shoosi shikhaafwaane nga kumulilo kumweene.

¹⁰Shitaambiso sha Edomu sishikhaawewo ta, mu shiilo namwe kumuusi, lisuusi lilituukha khuushaamamwo likhaaniine biilo ni biilo. Shiibala shoosi shikhaarame busa nga mbaamwo umuundu ta kimiboolo ni kimiboolo. Silibawo umuundu ulishimenyamwo ta biilo ni biilo.

¹¹Kiminywiinywi nga kisiilili nikyo kikikhaamenyemwo, tsikhiikhi ni bakikhoolo nikyo kikiikhekhalemwo. Wele akhaarure eetse abalaayile khu Edomu, akhaaruse kumukosi kukupima kwe khuyumbaala, ni shishipima she khuuhela.

¹²Baakhulu baayo sibaakhabekho na shoosi sheesi bakhalaange bari buyiinga ta, ni baawuli baayo sibakhaabewo ta.

¹³Kamawa kakhaasiimbe mu bifwo bye lubili byoosi, ni kamarakalu kakhaatsowe mu bifwo abe byeesi baasirakililila byoosi. Biifwo ibyo bikhekyele buukono bwe tsishipwe, ni buumenyo bwe tsinyoofwe.

¹⁴Bisolo bye mu mubiimbi bikheetse bimenye atweela ni namuunyu, ni tsisolo tse mwirome tsitsifwaana nga tsimbusi tsikhaameeleele buli ndweela isi iyashe. Mu bweene imwo bisolo bye shiilo bikheetse nga biweentsa e khuukona, binyoole buukono mu bweene umwo.

¹⁵Kiminywiinywi tsikhiikhi kikhombekhe biiswi, kireereremwo kamaki, lwanyuma kyaalule bubwaana, kibubiimbekho ni tsindaaha tsakyo. Ni kisilili naye akheetse abusanemwo, buli mutweela nga ali n'uwashe.

¹⁶Entselesa mu shitabo sh'Omukasya lwanyuma usome. Mbaawo na shitweela khu biindu bino shishikhaataambemwo ta, mbaawo na shitweela shishikhaataambekho shashe ta. Lwekhuuba Umukasya umweene niye uulakiile ari bikholekhe, n'Umwoyo weewe niye uubibuusanisa byoosi atweela.

¹⁷Niye waalambuulile liiswa waalibaweele, ni kumukhono kweewe, waalikhalanisilemwo bisiintsasiintsa. Liryo likhaabe lilyaabwe biilo ni biilo, bakhaamenyatsake mu bweene umwo kimiboolo ni kimiboolo.