Read lumasaaba Isaaya 35 Bible Online

Isaaya 35 - lumasaaba bible

Isaaya 35

¹Abe yakhaba kumubiimbi atweela ni shiibala shishiili shishoomu bikhaasangaale, shiibala shishikhalimwo kameetsi ta, shilikhoya luundi shilase biimuli, shifwaane busa nga shimuli shishiwuunya buulayi.

²Shikhaalase biimuli bibe mu bukali; ibeyo kumwikhoyo ni sangaalo atweela ni khukhwiimba kimyeenya. Shiriifwa abe shishaba sha Lebanooni shikhaaweebwe shiibala shishoomu shino, shikhaabonekhe buulayi, shikhaafwaane busa nga Karumeeli ni Sharoni. Umukasya akhookesanise shiriifwa sheewe shibonekhele ibweene iyo, lubuyi luukali lwa Wele weefwe.

³Ni muhangase abo babaali ni kamakhono kamatoro, mwiisemo kamaani kameesikamo abe kakaafwiliile.

⁴Mulomele abo babaali ni kimyoyo kikiiriire naabi muri, “Nimwiilemo kamaani, mukharya ta! Lwekhuuba bona Wele weenywe ali khukhwiitsa khukhwiiliyaasa, akheliyaase baasiku beenywe nga Wele. Ilala alikho eetsa khuubawonesa inywe.”

⁵Nio isho shinyalise tsimoni tsaabo babaali baabofu tsibimbukhe, ni naabo abe babaafuundila mu khuru mwiikukhe.

⁶Ni nooyo abe uyikila anyale khuuruukaruuka nga ikhisi, n'umumiinyi abe ukhakanikha ta, eembe kimyeenya lwe kumwikhoyo. Kameetsi kakhaarubukhe katsukhiilile mu shibala shishoomu, ni tsintsitsi tse kameetsi tsikhaatimile mu mubiimbi.

⁷Kumuyekhe kukwaba kwookhelela busa kukhekyele kwe mu meetsi, ni shiibala abe shishooma busa shikheetsulemo kameetsi. Kamakhalaamba ni bunyaasi, ni tsindeeka bikhaatsowe mu biifwo abe mweesi bisolo bye mu mubiimbi bimenya.

⁸Ibweene iyo ikhaabeyo kumukhoosi kumubalaayi kumweene, kumweene ikwo kukhaalaangibwe kuri KUMUKHOOSI KWE BUKHOSEFU. Babaandu banyaalu sibakhaakukyeendelekho ta. Kukhaabe kwaabo babaakyeendela mu mukhoosi kwa Wele bonyene. Abo babaali basilu sibalikyeendelakho na khakyeekhe khari ta.

⁹Ibweene iyo sikhaabonekheyo tsitalanyi ta, namwe bari isolo yoosi iye kumuluungo sikheetseyo ta. Bisolo bino byoosi sibikhaanyoolikheyo ta. Khuurusakho babaawonesebwa bonyene nibo babaalikyeendelakho

¹⁰Abo beesi Umukasya umweene eroborera bakhaakobole. Bakheetse benjile mu Sayuuni nga beemba kimyeenya; Bakhetsusibwe ni kumwikhoyo kukuukhawawo ta. Nibo bakhaafune kumwikhoyo atweela ni sangaalo, kumutaambo ni khusisiinya khwoosi bikhaatitukhe biweelewo ilala.