Read lumasaaba Isaaya 36 Bible Online

Isaaya 36 - lumasaaba bible

Isaaya 36

¹Mu mwiiko kwe likhumi na kine kwe buwuli bwa Hezekiya nga umuyiinga wa Yuda, umuyiinga Senakyeribu uwa Asiriya, eetsa khukhwibwakala biriimba bya Yuda abe bibiilikho tsimako, waabiwaamba.

²Lwanyuma umuyiinga wa Asiriya waarumana umukhulu weewe uwe liiye lye basoolani[8] khukhwaama i Lakishi, nga ali ni liiye lye kamaani, khuutsya isi umuyiinga Hezekiya mu Yerusalemu. Aryo niye atweela ni liiye lyeewe baatsya bebuusila amufureeki kwe kameetsi abe kukutsukhiilila mu litibo lye angaaki, khu mukhoosi kukuutsya mu mukuunda isi baasiingatsakila tsingubo.

³Nga bali abweene awo, Eliyakimu, umusooleli wa Hilukiya, uwaba umukhulu we lubili lw'omuyiinga, nga ali atweela ni Shebuna, uwaba umuroni umukhulu, ni Yowa umusooleli wa Asafu, nga abe niye uwaba umuroni we bibyaamayo; beetsa khuubakaanana.

⁴Kila umukhulu we liiye lino, abarumana khuutsya baboolele Hezekiya bari, “Umuyiinga uwe kamaani uwa Asiriya alikho ereeba busa ari: Shiina shisheene sheesi iwe ulikho wiyikina, shiikila waaba ni khuhandalala khukhufwaana khuri?

⁵Iwe wambaasa uri tsilomo tse munwa tsonyene tsinyala tsaakhola nga bye busoolo, ni kamaani ke khuusoolana? Iwe uli khukhwiyikina naanu umweene, shishikhwoolisile khukhuuminyaalila ise?

⁶Iwe ubonekha wiyikina Misiri, ne Misiri isho shili busa nga lukholo lulumalile khaale khuufunikha, lwaashuukha lwakhalaka mu khono mwooyo ukhakakho khulwiyikamililakho. Shimanye buulayi uri Faraawo, umuyiinga wa Misiri seyikinikha ta!

⁷Ari iwe unyala waanomela uri, ifwe khuli khukhwiyikina Umukasya Wele weefwe! Ne s'ali niye umweene uyo isi Hezekiya aakhoomyaasaka nga n'aafuniaakaka biifwo byeewe bye angaaki bye khukhwisaayilamwo, ni bibyeeso byeene, lwanyuma waalakila babaandu boosi mu Yuda, ni mu Yerusalemu mwoosi, khuutsya khwisaayila khu sheeso shishiili mu Yerusalemu mwoonyene?

⁸Ne ari ise sheesi ikhuboolela shili ndi, yiitsa ufukiilisane n'umukoosi wase, umuyiinga wa Asiriya. Ise kane ikhuwe tsiŋwaaŋwa bikana bibili (2,000), siinga nga iwe kane unyalise khuufuna basaani babanyala khuutsitimilakho.

⁹Iwe kane unyale uryeena khuuwula umuselikhale mutweela ufuurayo khuuba uwe aasi naabi mu liiye ly'omukoosi wase, abe yakhaba nga wiyikina Misiri lwe buyeeti bwe kamakaali, ni naabo babaatimila khu ŋwaaŋwa?

¹⁰Ni khuulooselakho, iwe wambaasa uri ifwe khwiitsile khukhwiibwakala shiibala shino nga Umukasya waakhukhulakila ta? Umukasya umweene niye ukhulakiile ifwe khuutsya khukhwibwakale shiibala isho, khushihese!”

¹¹Lwanyuma kila Eliyakimu, Shebuna ni Yowa balomela umukhulu we liiye lya Asiriya yuno bari, “Khwaakhwikoontseleele, n'ukhukanikheyo mu lulomo lu Aramayiki, lwekhuuba khwaalumanya buulayi. Ne ukhakhukanikhayo mu lu Heburaniya ta, lwekhuuba babaandu babaali khu matikiiyi khu ngaaki kane bawulile.”

¹²Ne umukhulu we liiye lino weelamwo ari, “Mwambaasa muri umukoosi wase andumanile ano khuureera buurume buno isi iwe n'umukoosi woowo mwenyene? Niye akana ni babaandu boosi babuwulile, lwekhuuba nga khweetsile khwiibwakala shiriimba shino, nabo bakhataambisibwilemwo. Nabo intsala ikhaabalye, ni buulesa bubalye, nabo boole ni khuulya bye musiru byaabwe nga biilyo, naluundi banywe ni kamasunguluula kaabwe nga kameetsi.”

¹³Kila umukhulu we liiye lye ba Asiriya yuno, emikha khu ngaaki, waakuukuula ni likono liikali mu lulomo lu Heburaniya nga aloma ari, “Ni murekeerese buurume buno bubwaama isi umuyiinga uwa Asiriya uwe kamaani!

¹⁴Buurume bw'omuyiinga buno buloma buri: Mukhafukiilisa Hezekiya waabawombesa inywe ta. Niye singene anyale khuubawonesa inywe ta.

¹⁵Mukhafukiilila niye khuubawombesa ari mwiyikine mu Mukasya, nga abalomela ari, Umukasya kane abawonese, ni khuubalomela ari shiriimba shino singene shikwe mu mikhono ky'omuyiinga wa Asiriya ta.

¹⁶Mukhaloondelela byeesi Hezekiya ababoolela ta! Sheesi umuyiinga wa Asiriya ali khuuloma nisho shino ndi: Ni mukhole ikwangwaani ye lukoosi ni nase, mwikulewo biilibwa byeenywe, murure ibulafu. Nio lwanyuma buli mutweela eloosele khuulyatsaka khukhwaama khu misabibu kyeewe umweene, ni khuulya khukhwaama khu misaala kimifigi, naluundi anywatsake khukhwaama mu luutsi lweewe lwe kameetsi.

¹⁷Nio nase ndyo kane niitse nga neŋoonaŋoonile buulayi, imbayile mu shibala shishifwaanila ilala nga shisheenywe shino, shiibala shishitsuulemo biilyo biikali, ni iviini, atweela ni kimikaati ni kimikuunda kye kimisabibu.

¹⁸Ni mwitsiliilise buulayi, Hezekiya akhabawoombesa nga aloma ari kane Umukasya abawonese inywe ta! Manya iliwo wele na mutweela uwawonesakho linaambo lyeewe khukhwaama mu mukhono kw'omuyiinga uwa Asiriya?

¹⁹Ari, ba wele ba Hamasi ni Arupadi bali waheena? Ne ba wele ba Shefarivayimu nabo bali waheena? Manya iliwo ni wele na mutweela khu nibo uwawonesakho Samariya khukhwaama mu mukhono kwase?

²⁰Inywe mwaamanyakho wele shiina mu manaambo kano koosi, uwawonesakho babaandu baabwe khukhwaama mu bunyala bwase? Ari mwambaasa muryeena muri Umukasya kane anyalise khuuwonesa Yerusalemu khukhwaama mu bunyala bwase?”

²¹Ne babaandu baasila busa tsu, balekha khulomakho ilomo yoosi ta, lwekhuuba umuyiinga Hezekiya aabalomela ari, “Mukhaŋamulakho shoosi is'ali ta.”

²²Lwanyuma kila Eliyakimu, uwaba umukhulu we lubili; Shebuna, uwaba umuroni umukhulu; atweela ni Yowa, umusooleli wa Asafu, uwaba umuroni we bibyaamayo, beelayo isi Hezekiya. Baatsya nga boonuulakile bikwaaro byaabwe lwe kumutaambo kumukali, baatsya baabona umuyiinga, baamuboolela byoosi byeesi umukhulu we liiye lya Asiriya aabakanikhila.