Read lumasaaba Isaaya 37 Bible Online

Isaaya 37 - lumasaaba bible

Isaaya 37

¹Ne nga umuyiinga Hezekiya n'awulila biilomo bino, woonuulaka bikwaaro byeewe, waabiyabulamwo, aryo waakwaara isawu ya makoongwe, lwanyuma waatsya mu Lisaayilo Likhulu ly'Omukasya.

²Kila arumana Eliyakimu, umukhulu we lubili, Shebuna, umuroni umukhulu, atweela ni basaayi baasakhulu, nga boosi bakwaarire tsisawu tsa makoongwe, khuutsya isi umuŋoosi Isaaya, umusooleli wa Amozi.

³Baatsya baamuboolela bari, “Umuyiinga Hezekiya aloma ari, ‘Shifukhu she shaleelo shino shili she kumutaambo kumukali, shili she khukhwiikiitsibwa, naluundi shili she khuuswaala khuukali. Shifwaana busa nga umwaana uwoolile khuusaalikha, ne nga maayi weewe s'ali ni kamaani ke khusiindikha ta.

⁴Manya lukanile shinyala shaaba ndi, Umukasya Wele woowo, waawuliile biilomo byeesi umukhulu we liiye lya Asiriya, uwarumanibwa n'umuyiinga weewe, khuuloma nga afootsola Wele Umulamu, nio manya Umukasya Wele woowo waamuwa shiitaambiso lwe biilomo byeewe ibyo. Nashiryo, ari n'ukhuloombele ifwe bakyeekhe khukhuramilewo.’ ”

⁵Baryo babaakaanisi b'omuyiinga Hezekiya ni boolesa buurume buno isi Isaaya,

⁶Isaaya waabalomela ari, “Tsya muboolele umukoosi weenywe muri, ‘Sheesi Umukasya aloma nisho shino: Ukharya lwe biilomo ibyo byeesi muwuliile byeesi babaakaanisi b'omuyiinga wa Asiriya, bakanikhile bibiikhomyaasa ise ta.

⁷Ari wuliilisa buulayi, Ise samweene kane imuremwo umwoyo wase, isho shikile umuyiinga uyo awulile buurume bubumukanisa khuukobolayo ingo mu linaambo lyeewe. Aryo nga waakobooleyo, ikhaareerewo shishikhaakile akhoonyebwe ni lurima.’ ”

⁸Ne umukhulu we liiye lya Asiriya n'awulila bari umuyiinga wa Asiriya wenyukhile waarurire i Lakishi, waarurayo waatsya, ne waanyoola nga umuyiinga tsana ali khuusoolanisa Libuna.

⁹Lwanyumakho umuyiinga Senakyeribu waawulila bari, umuyiinga Tiruhaka uwa Esiyopiya[9] waaraangiliile liiye lyeewe khukhwiitsa khuumusoolanisa. Nga n'ashiwulila aryo, waarumanisa baarume khuutsya isi Hezekiya ni buurume buno:

¹⁰“Tsya muboolele Hezekiya umuyiinga wa Yuda muri: Wele woowo uyo, isi wiyikina, akhakhuwombesa nga akhusuubisa ari, Yerusalemu sishikhaawaambibwe n'umuyiinga wa Asiriya ta.

¹¹Ilala, iwe wamweene waamanya buulayi shiina sheesi bayiinga ba Asiriya bakhola mu buli linaambo lyoosi isi batsya. Batsya bahesela ilala buli shiindu shoosi. Ne ari iwe, iliyo ukane akhuwonese?

¹²Manya ba wele be kamanaambo keesi bakuuka baase baatsya bahesa, baanyala khuukawonesa? Shebulila kamanaambo nga Gozani, Harani, Rezefu, ni babaandu ba Edeni, abe babaamenya i Telasari.

¹³Aluno, ali waheena umuyiinga wa Hamasi, n'umuyiinga wa Aripadi, n'umuyiinga we shiriimba sha Sefarivayimu, n'umyiiinga wa Hena atweela n'umuyiinga wa Iva?”

¹⁴Lwanyuma nga Hezekiya waamalile khuufuna buurume buno khukhwaama khu baarume beewe, waabusoma, aryo waabusuta, waatsya ni nabwo mu Lisaayilo Likhulu ly'Omukasya, waabukaangululila mu moni ts'Omukasya.

¹⁵Kila Hezekiya aloomba isi Umukasya nga aloma ari,

¹⁶“O Umukasya uwe kamahe ke mwikulu, umunyali wa byoosi, Wele wa Isiraeli, iwe uwikhala khu shitsoloŋo shoowo she angaaki akari e ba Keruubi! Iwe wenyene niye Wele, uwula buyiinga bwoosi bwe khu shiibala. Iwe niye uwabuumba Likulu ni shiibala.

¹⁷O Umukasya, reeka khukhuru khwoowo ureekerese! Biikula tsimoni tsoowo, O Umukasya, ubone! Wuliilisa biilomo byoosi bya Senakyeribu, byeesi arumanisile khuukhulekelesa iwe, Wele umulamu.

¹⁸“O Umukasya, shili shaŋali shiri, bayiinga ba Asiriya baayoonakisa kamanaambo atweela ni liiloba lyako lyeene.

¹⁹Naluundi bawaamba ba wele be kamanaambo keene kano, baabatuumaka mu mulilo, baboosha, lwekhuuba ilala sibaaba ba wele ta, ne baaba kimisaala ni kamabaale. Bino byaba biifwaani bibyakholebwa ni kamakhono ke babaandu, shaakila byoonakisibwa biryo.

²⁰Nashiryo ari, O Umukasya Wele weefwe, n'ukhuwonese ifwe khukhwaama mu bunyala bweewe; nio buyiinga buburamile bwe khu shiibala bumanye buri, iwe wenyene, O umukasya, niye Wele.”[10]

²¹Lwanyuma kila Isaaya, umusooleli wa Amozi, arumanisa buurume buno isi Hezekiya, nga aloma ari sheesi Umukasya Wele wa Isiraeli aloma nisho shino ari: Lwekhuuba iwe waaloombile bino byoosi, bibiwaamba khu Senakyeribu, umuyiinga wa Asiriya,

²²bino nibyo biilomo byeesi Umukasya ali khuukanikha bibimuwaambakho niye: “Umukhaana wa Sayuuni, ukhaabatsakakho n'umuseetsa yeesi ta, alikho akhulekelesa iwe luundi akhutsekhelela busa. Umukhaana wa Yerusalemu alikho atengaasa busa kumurwe kweewe nga akhubona iwe utikhula tsiindimo wilukha utsya.

²³Naanu isi iwe ubeele nga ukhomyaasaka luundi waalekelesa uryo? Naanu isi ubeele winyusila likono lyoowo musaambo iyo? Naanu isi ubeele uloolelela ni tsimoni tse khukhwiyiingayiinga uryo? Abeele niye Umukhosefu wa Isiraeli!

²⁴Iwe waaraambisile babaakaanisi boowo khuukhomyaasa Umukasya. Wamweene webuyila nga uloma uri, ‘Inaambisatsaka kamakaali kaase kamakali naawula tsinjiinji tsindeeyi naabi, ni khuutsya khwoolela ilala mu bifwo bya Lebanooni abe bibiikhoolekhamwo ta. Naremaka luundi naakwiisaka aasi kimisaala kimi seda abe kikifuura buuleeyi, ni kimisaala sayipuraasi kikifuurayo buulayi. Natsya naaniina noola khu ngaaki imisya we tsinjiinji, naatsya nenjila ni mu shisaali mukari isi kimisaala kifuura khusiindaana naabi.

²⁵Ise nalima tsintsitsi tse kameetsi, lwanyuma naanywa kameetsi kaamwo. Naraambisa biikhaandakilo bye bikyele byase, naakamisa tsintsitsi tse kameetsi tse Misiri!’”

²⁶“Ne iwe ushiili khushiwulilatsakakho ta? Ise shino nashikhalawo khaale naabi. Khukhwaama khaale ise abe naashiŋoonaŋona, ari indi khushoolelesa busa. Ise abe naarekekha khaale ndi iwe ufuniaakake biriimba bibiilikho kamatikiiyi, kakwe aasi kebuuse tsinduumi.

²⁷Isho nisho shishakila babaandu baamwo baawamo kamaani, baaryaryamukha busa bawaambibwa kamaŋaanyu. Baryo bekyela busa nga bisaala bibyaana bye mu mukuunda, bafwaana busa nga bunyaasi, nga bunyaasi bubuutsowa khu ntsu khu ngaaki, bubuufwa nga bushiili khuutsowa ta.”

²⁸“Ne ise naamanya buulayi nga niwikhala aasi, naluundi naamanya khuurura ni khuukobola khwoowo. Ise naamanya lirima lyeesi untsokesanisile ise.

²⁹Uryo lwekhuuba waayintsokesanisa ise lirima liikali naluundi ise naawuliile khukhwiyiingayiinga khwoowo, ise inakhura iwe kumulobo mu moolu mwoowo, ni shiibya mu khanwa mwoowo ikhukhweese wileyo khu ntsila isi weetsilakho.”

³⁰Nashiryo khano nikho khakhaakane khabe khaabonelo is'uli: “Kumwiiko kuno kane mulye ibyo bibiitsowa byonyene busa, ni kumwiiko kukwiilakho, mukhaalye ibyo bibiiruruna khubweene ukhwo. Ne kumwiiko kukuukhola khataru, mwabeene mukhaamiitse luundi mukyese, mubyaale kimikuunda kye kimisabibu lwanyuma mulye bibyaamo byakhwo.

³¹Ni naabo khusiinywe babaakharameyo nga baalamu khu baandu ba Yuda, bakhekhise kimili kyaabwe aasi mwiloba, ni kimisaala kikikhaatsowe mu ngaaki kikhaamekho bibyaano biikali.

³²Lwekhuuba babaandu baase babaakhaaramewo, bakhaabalaahe khukhwaama mu Yerusalemu, ni khukhwaama khu lukiingi Sayuuni, ikhaabewo abo babaakhaawone. Ni khuutsiinikhana khuukali khw'Omukasya uwe kamahe, umunyali wa byoosi, niye ukhaanyalise shino khuukholikha.

³³“Nashiryo shino sheesi Umukasya ali khuukanikha shishiwaamba khu muyiinga wa Asiriya: Umuyiinga uyo s'akheetse oolekho khu shiriimba Yerusalemu shino ta. Namwe liiye lyeewe silikhaanyalise ni khuulasa khaayiingo na khatweela khu nisho ta. Liiye lyeewe silikheetsekho aambi ni biilibwa bye shiriimba nga baasutile tsingabo ta, namwe bari beetse babuuse tsinduumi tse liiloba ibulafu we kamatikiiyi kaasho ta.

³⁴Intsila ikhaamureere, niyo inyene ikhaamwiiseyo; aryo umuyiinga uyo s'akhenjilekho mu shiriimba shino ta.” Umukasya umweene niye ushiloma aryo.

³⁵Umukasya aalooselakho ari, “Ise samweene ikhaakhiinge luundi imbonese shiriimba shino, khulwe shiriifwa shase samweene, nilwe buulayi bw'omwakaanisi wase Dawudi.”

³⁶Lwanyuma malayika w'Omukasya weekha mu kaambi iye ba Asiriya shiilo sheene isho, waakhoonya baselikhale kumweeka mutweela, kimikaanda shinaane, ni biikana biraano (185,000). Babaandu ni baasisimukha kumutikhinyi bari balola, baabona kimilaambo kyaasalaniile buli aandu oosi.

³⁷Lwanyuma umuyiinga Senakyeribu uwa Asiriya wenyukhawo waatsya. Aryo weelayo ingo weewe Nineve, waamenya iyo.

³⁸Shiifukhu shitweela, niye aaba nga alikho esaayila mu lisaayilo likhulu lya wele weewe Nisiroki, basooleli beewe Adurameleki ni Sharezeri beetsa baamukhoonya ni tsiindima. Lwanyuma belukhila mu shibala sha Ararati. Umusooleli weewe Esari-Hadoni waamwiilila mu bikyele byeewe waawula nga umuyiinga uwa Asiriya.