Read lumasaaba Isaaya 38 Bible Online

Isaaya 38 - lumasaaba bible

Isaaya 38

¹Mu mbuka iyo, Hezekiya walwaala, woola aambi khuufwa. Umuŋoosi Isaaya, umusooleli wa Amozi, weetsa khuumubonakho nga amureerera buurume, nga buloma buri: “Shino nisho sheesi Umukasya ali khuuloma: ‘Ŋoonaŋoona bye ango owo; lwekhuuba utsya khufwa, singene uwone buulwaale buno ta.’ ”

²Aryo Hezekiya n'awulila biilomo bino, aashuukha waalola ibwitikiiyi, waalomba isi Umukasya,

³waaloma ari, “O Umukasya, naakhwikoontseleele, n'ushebulile isaambo isi injeendatsakilemo nga ndi umwiiyikinwa is'uli, naluundi imbeele ikhwakaanisatsaka iwe ni kumwoyo mutweela kwonyene, nga ikhola byeesi ukana.” Aryo Hezekiya waalila kamasika ni kumutaambo kumukali naabi.

⁴Kila buurume buno bwiitsa isi Isaaya nga bwaama isi Umukasya, nga buloma buri:

⁵atsye aboolele Hezekiya nga amuloma ari, “Sheesi Umukasya Wele wa kuuka woowo Dawudi aloma nisho shino ari: Naawuliile khuuloomba khwoowo, naluundi naboone kamasika koowo. Ari naakhulooselekho khu buulamu bwoowo kimiiko kikiindi likhumi na kiraano.

⁶Ise samweene inakhuwonesa iwe atweela ni shiriimba shino, khukhwaama mu mukhono kw'omuyiinga wa Asiriya. Ilala samweene kane ikhiinge shiriimba shino.”

⁷Isaaya waalooselakho ari, “Khano nikho khakhakane khabe khaabonelo is'uli khukhwaama isi Umukasya, khakhokesanisa khari Umukasya kane ashikhole nga n'asuubisile:

⁸Bona ise intsya khukobosa inyuma shishiniini shishireerebwa ni nyaanga iili khuukwa, kimiluundi likhumi khu madala ka Ahazi.” Iryo inyaanga yaakobolayo inyuma kimiluundi likhumi khukhwaama isi ibeele nga itsya khukwa.[11]

⁹Hezekiya umuyiinga wa Yuda, waarona burone buno, nga waamalile khuuwonesebwa butsiina bweesi aaba nabwo:

¹⁰Ise naloma ndi, “Mu bifukhu byase bye akarikari, naakha khuururawo intsye, intsye mu shibala she makoombe, imbe nga naarusibwile mu buulamu bwase kimiiko kyase kyoosi.”

¹¹Ise nambaasa ndi siindibonakho luundi Umukasya, nga ishiili mu shibala she babaandu baalamu ta. Siindibonakho luundi khu basaale baase, namwe imbekho luundi atweela ni babaandu be mu shibala shino ta.

¹²Bumenyo bwase bwaasambukhile bwaandusibwilekho, bwafwaanile busa nga lisari ly'omwaayi nilisaambulibwa. Buulamu bwase bwakhalikhile bwembiyisibwile busa nga n'ubona umuruungi we tsingubo n'akhala ingubo khu shisaala sheesi aruungilakho. Kumuusi ni mu shilo, iwe wamalawo buulamu bwase mu khaangu naabi.

¹³Ise naliindiilila lwe buyeeti khukhwoolesa kumutikhinyi; ne waafuniaakaka kamakuumba kaase, waafwaana busa nga italanyi. Kumuusi ni mu shilo, iwe wamalawo buulamu bwase mu khaangu naabi.

¹⁴Ise nalila kamasika nga nibororaka busa, nafwaana nga ŋooli, naalenyaka busa nafwaana nga liwuusi. Tsimoni tsase tsaasitowa lwe khuulola nga iniindilila buyeeti khukhwaama mwikulu. O Umukasya, naamiinilisibwile naabi, yiitsa unjeete!

¹⁵Ne ise kane inome ndyeena? Umweene waanganikhileyo, naluundi umweene niye ushikholile. Ari ise kane injeende nga indi umuwolu kimiiko kyase kyoosi, lwe butsiina buno bubuuli mu mwoyo kwase.

¹⁶O Umukasya, lwe bibiindu nga bino, babaandu babawo nga baalamu; ni nase kumwoyo kwase kubinyoolamwo buulamu. Ilala iwe wangobosela buulamu bwase, waafukiilisa ise naaramawo nga ndi mulamu!

¹⁷Ilala lwe buulayi bwase, iwe waandeerera ise khuutsiinikhana khuno. Mu khukana khwoowo, wakobosa buulamu bwase khukhwaama mu lilowo lye khuufwa, uryo waantsiyakhila bibyoonako byase byoosi.

¹⁸Lwekhuuba imakoombe s'inyala yaakhuruuya iwe ta, khuufwa sikhunyala khwakhweembela iwe kimyeenya kye khukhubuyilisa ta. Ni naabo babeekha mu ŋani imakoombe sibanyala baaba ni kumwiyikino mu bweela bwoowo ta.

¹⁹Ne abo babaali baalamu, babaali baalamu nibo babaakhuruuya iwe, nga nase niindi khuukhola shaleelo shino. Paapa niye uboolela babaana beewe bibiwaamba khu bweela bwoowo.

²⁰Umukasya kane ambonese ise, ni nafwe kane khweembe kimyeenya nga khuraambisa kamatuungu, bifukhu byoosi bye buulamu bweefwe, nga khuli mu Lisaayilo Likhulu ly'Omukasya.

²¹Ari Isaaya aaba waalomile ari, “Nimureere kamatuunda ke kuusaala kufigi nga mwaakarokile, mukahakhe khu libiimba, nio manya waawona butsiina.”

²²Ni Hezekiya naye aaba nga wereebile ari, “Ne khaabonelo shiina kheesi kane ifune, khakhaakane khantsokese khari, ise kane iniine intsye mu Lisaayilo Likhulu ly'Omukasya?”