Read lumasaaba Isaaya 39 Bible Online

Isaaya 39 - lumasaaba bible

Isaaya 39

¹Khu mbuka iyo, Merodaki-Baladani, umusooleli wa Baladani, uwaba nga niye umuyiinga wa Babulooni, waarumanisa buurume atweela ni biwaanwa isi Hezekiya. Shino aashikhola lwekhuuba aawulila ari Hezekiya aaba mulwaale, ne nga waawona.

²Aryo Hezekiya waakaanila bakyeni bano ni sangaalo ingali, kila atsya ni nabo waabokyesaka bye buyiindifu bibyaba mu mabiikhilo, nga nibyo ifeetsa, izaabu, bibiwunya buulayi, ni kamafura ke khukhwiyakha. Naluundi waabayila waabokyesa ni libiikhilo lye bye busoolo, ni bibiindu bibiindi swaa busa bibyaba mu mabiikhilo keewe. Mbaawo shishiindu na shitweela mu lubili lweewe, namwe mu buyiinga bweewe sheesi aakhabokyesa ta.

³Kila umuŋoosi Isaaya atsya isi umuyiinga Hezekiya, waamureeba ari, “Babaandu abo baalomile bari shiina? Babeele baama waheena?” Hezekiya waamwiilamwo ari, “Babeele baama mu shibala she aleeyi she Babulooni.”

⁴Isaaya waamureeba luundi ari, “Shiina sheesi baaboone mu lubili lwoowo?” Hezekiya naye welamwo ari, “Baaboone buli shiindu shoosi, lwekhuuba mbaawo shishiindu na shitweela mu mabiikhilo kaase sheesi ikhaabokyesile ta.”

⁵Lwanyuma kila Isaaya alomela Hezekiya ari, “Ari rekeeresa buulayi buurume bubwaama isi Umukasya uwe kamahe, Umunyali wa byoosi:

⁶‘Imbuka ikhoole isi buli shiindu shoosi shishiili mu lubili lwoowo; buli shiindu shoosi sheesi bakuuka boowo baabuusa baabiikha khukhwoolesa ni shaleelo shino, bikhaasutibwe biyilibwe i Babulooni. Mbaawo na shiindu na shitweela shishikhaaramewo ta.’ Shino Umukasya umweene niye ushilomile.

⁷‘Ni babaana boowo babeene, babasaalikha mu mafuki ni kameetsi koowo kameene, nabo bakhaayilibwe mu bubowe i Babulooni. Baryo bakheekyele babomole, babaakhaakaanisatsake mu lubili lw'omuyiinga wa Babulooni.’”

⁸Kila Hezekiya elamwo Isaaya ari, “Buurume bubwiitsile khukhwaama isi Umukasya buli buulayi.” Lwekhuuba eyambaasa mu mwoyo kweewe ari, “Kasita kane ibewo luukoosi ni buliindi buulayi khu mbuka yase nga umuyiinga.”