Read lumasaaba Isaaya 4 Bible Online

Isaaya 4 - lumasaaba bible

Isaaya 4

¹Imbuka iyo nga yeetsile khwoola, bakhasi musaafu bakhaatsye bewaambe khu musaani mutweela, lwanyuma bamulomele bari, “Ifwe kane khwiiliise, luundi khwikwaarise fabeene. Ne khuyeete busa ube umuseetsa weefwe, khuulaangibwe khuuba bakhasi boowo, nio khulekhe khuwaambibwa tsisoni bari lwekhuuba sikhuli ni baseetsa ta.”

²Ne shifukhu isho nga sheetsile khwoola, lusakya lw'Omukasya lulibalaaha, lwitsule shiiriifwa shiikali. Ni babaandu ba Isiraeli babaaliramawo boosi bakhekanile naabi mu bilime byeesi shibala shikhaasaale.

³Buli muundu yeesi ukhaarame mu Sayuuni nga umulamu, akhalaangibwe ari umukhosefu; uyo yeesi ukhaabe nga waawonile mu Yerusalemu, nga ali khu luruungo lwe baalamu.

⁴Awo Umukasya akhaabe waamalile khaale khuusiinga buubi bwe bakhasi ba Sayuuni, nga waapyeeluusiile ilala bumoyaani bwa Yerusalemu, naluundi nga waarusilewo shiibi she kamafuki keesi baatsukha ibweene iyo, nga raambisa umwoyo we khuukhala kumusaango, ni mwoyo we kumulilo.

⁵Nio lwanyuma Umukasya akhaabiimbekho khu lukiingi Sayuuni, ni khu baandu boosi babaabuusanila ibweene iyo, shishiniini she lifuumbi kumuusi, ni khuuwa buwaanga bwe kumulilo mu bwiile bwe shiilo. Shiiriifwa sha Wele shikhaabe nisho shishibiimbakho luundi shibe nisho shishikhiinga shiriimba shoosi.

⁶Shiriifwa shino shikhaabe nisho shishiniini nga kumuumu kwaarafuyile, naluundi shibe nibwo bubwiilukhilo luundi isi bekama nga ikhuungu ni ifula nga byeetsile.