Read lumasaaba Isaaya 40 Bible Online

Isaaya 40 - lumasaaba bible

Isaaya 40

¹Wele weenywe aloma ari, “Woleelesa babaandu baase, woleelesa babaandu baase.”

²Ni mukanikhe biilomo biiwolu isi Yerusalemu, mushiboolele muri, bifukhu byasho bye khuutaambisikha byaweelekho, ni bibyoonako byasho byasiingibwile. Naluundi mushimanyise muri shafuna shitaambiso she kimiluundi kibili lwe bibyoonako byasho khukhwaama isi Umukasya.

³Iliwo liikono lilikuukuula liri, “Ni muŋoonaŋoone kumukhoosi kw'Omukasya mu mubiimbi! Mukwalaase tsintsila tsa Wele weefwe khu musaleela kwe mu mubiimbi.

⁴Buli aandu aali litila lyoosi, litsusibwe ni liloba, na buli lukiingi ni lukoongo lwoosi lukwalaasibwe, na buli aandu oosi aaborokha atsalaasibwe, ni biifwo bibiilimwo kamatikwi bikwalaasibwe buulayi.

⁵Nio lwanyuma shiriifwa sh'Omukasya shiiyokesanise lubuula, ni babaandu boosi atweela bashibone. Lwekhuuba Umukasya umweene niye ushikanikhile ni kumunwa kweewe.”

⁶Liikono liloma liri, “Kuukuula!” Ne nase nareeba ndi, “Shiina sheesi inakuukuula?” “Kuukuula uri babaandu boosi bali busa nga bunyaasi, ni buulayi bwaabwe buli busa nga shimuli she mwiirome.

⁷Bunyaasi buniaala, ni shimuli shaawululukha, nga imbewo y'Omukasya yaashiwutsilekho. Ilala babaandu bali busa nga bunyaasi.

⁸Bunyaasi buniaala, ni shimuli shiwululukha, ne Ilomo ya Wele weefwe ibawo biilo ni biilo.”

⁹Niina imurwe we lukiingi luleeyi lulweene, iwe Sayuuni, umurume we kamakhuuwa kamalayi. Yinyusa liikono lyoowo ni kamaani keene, iwe Yerusalemu umubooleli we kamakhuuwa kamalayi. Kuukuula ni liikono lye angaaki, ukharya ta. Boolela biriimba bye mu Yuda uri, Bona Wele woowo uyushiina ali khukhwiitsa!

¹⁰Bonakho, Umukasya Wele eetsa nga ali ni kamaani. Aryo kane awule ni kumukhono kwe buunyala. Bonakho, ali khukhwiitsa nga waasutile shiwaanwa sheewe.

¹¹Umweene akhaayise kamakheese keewe nga umwaayi. Akhaabuuse kamakheese kamaana akasutile mu makhono keewe, nga akasutila mu shifuba sheewe, aryo araangilile ni buwolu kamasheese kakaali ni bumeeme.

¹²Naanu abe uwanyalisakho khuupima kameetsi ke mu kuyaantsa waakahaambila mu mukhono kweewe? Namwe naanu uwapiimakho buubalaayi bwe liikulu nga araambisa kumukhono kweewe? Naanu abe uwabuusilakho lifukhulu lye khu shibala mu shiipo, namwe waapima busiro bwe tsinjiinji ni tsingoongo nga araambisa iminzaani?

¹³Naanu manya uwawakho Umwoyo wa Wele kamakyesi? Naanu ulikho ni byeesi amanyile naabi nio waanyalisa khuumuboolelela nga amuleekela?

¹⁴Ne manya naanu isi Umukasya atsyayo khukhwiireebakho nio afune khuumanya. Namwe iliwo uwamuleekelakho khuukhola byaŋali? Iliyo manya uwamuleekelakho bye kamakyesi, namwe waamwokesa intsila iye khuumanya?

¹⁵Ilala kamanaambo ke mu shibala kali busa nga khaatoondo khe kameetsi mu ndoowo. Naluundi kafwaana busa nga lifukhulu liliili khu minzaani. Ilala waasuta bikyelemeesi byoosi, byafwaana busa nga uyoolaka kumuyekhe.

¹⁶Shisaali sha Lebanooni sishiilimwo kimisaala kikiimala lwe kumulilo ta, naluundi bisolo byamwo sibimala lwe tsisaayilo tse khukhwoosha ta.

¹⁷Kamanaambo koosi ke mu shibala mbaawo sheesi kamanyisa is'ali ta, umweene nga waakaloleleele, akabona nga sikalimo shiindu ta, naluundi sikalimo kumukaso ta.

¹⁸Ari naanu isi munyala mwafwaananisa ni Wele? Namwe shifwaani shiina sheesi munyala mwaalekhaanisa ni naye?

¹⁹S'unyala waamulekhaasa khu shibuumbe sheesi babuumba busa ta, lwekhuuba umubuumbi washo nga waamalile khuushibuumba, niye aashiwakhakho izaabu khu ngaaki, lwanyuma waashimiliisakakho ni feetsa.

²⁰Namwe nga umuundu ali umutaambi naabi, ukhanyalisa khuukhola isho ta, akhalawo waheentselesa kuusaala kukhukhabola ta, waheentsa n'umubeetsi unyala wabeetsa shifwaani shishikhanyala shaakwa aasi ta.

²¹Inywe mushiili khumanya ta? Mushiili khuuwulilakho ta? Bashiili khubaboolelakho khukhwaama makiboole ta? Inywe mushiili khumanyatsakakho shoosi khukhwaama nga shiibala ni sharakikha ta?

²²Wele uyo niye uwikhala khu ngaaki khwe shiibala shishebotokhelela, ni babaandu babaashiilimwo bafwaana busa nga kamateete. Niye aabaamba likulu lyafwaana nga ingubo, naluundi alibalaayisa lyafwaana busa nga iweema iye khuuwolelamwo.

²³Niye ukhola bawuli baaba shiindu twa, naluundi akila baaraangilisi be shiibala bataambamwo kumukaso.

²⁴Nibo baaba nga balibyaalibwile bari, nga nio baliibaamalile khuubamiitsa nga bumiitso, nga bashiili ni khukhwiikhisa tsiindi tsaabwe mwiloba ta, waabafuurakho imbewo yeewe, baaniaalilawo khaangu kharyo. Imbewo iye khuungu ibayoola yabataamuusa busa nga likhuutsi.

²⁵Shikila Umukhosefu areeba ari, naanu isi munafwaananisa ni naye? Naanu umweene isi munalekhaanisa ni naye?

²⁶Ari yinyusa tsimoni tseenywe mu ngaaki mubone: Naanu uwabuumba tsinieniesi itso? Niye umweene urusa ibulafu tsinieniesi itso indweelatweela, nga alaanga buli ndweela lisiina lyayo. Lwe buunyala bweewe bwe angaaki, ni kamaani keewe kamakali, mbaawo na ndweela ikoraanakho ta.

²⁷Iwe Yakobo, lwashiina wiilomela, luundi iwe Isiraeli, shiina kila uloma uri, “Umukasya waakhumanya buulamu bwase nga ni bufwaana ta?” Namwe uri “Wele s'enaanayo lwe buulayi bwase ta?”

²⁸Iwe ushiili khuumanya ta? Ilala iwe ushiili khuwulilakho ta? Umukasya niye Wele uwe biilo ni biilo, niye Uwabuumba shiibala shoositsana. Niye s'aluwatsakakho ta, namwe bari waaremela ta. Mbaawo n'umuundu na mutweela, unyala waheentselesa naluundi woola khu khumanya khweewe ta.

²⁹Niye uwaangasa abo babaweetsekheleele, luundi esamwo kamaani abo boosi babaatorwaalile.

³⁰Ni basooleli babashiili be kamaani nabo bakhaawetsekhelele, luundi baremelele ilala, ni basaani babaashiili baahele baliluwa bekhupe aasi.

³¹Ne abo boosi babeyikina Umukasya, bakheelemwo bushaakha kamaani, bakhaaseyeeye beyiinge mu ngaaki ni tsindaaha, nga n'ubona kunywiinywi waasu. Bakhaatiikhule tsiindimo, ne nga sibakhaaluwe ta. Bakhaakyeende luukali ne nga sibaakhaweetsekhelele na khafwiiti khoosi ta.