Read lumasaaba Isaaya 41 Bible Online

Isaaya 41 - lumasaaba bible

Isaaya 41

¹Ni musile busa mundekeerese ise, inywe biibala bibiili khu ndulo khwe nyaantsa. Lekha babaandu beelemwo bushaakha kamaani, besyeende beetse aambi lwanyuma bakanikhe. Ari lekha ifwe fweesi khwiitse atweela lwe kumusaango.

²“Naanu umweene uwafukurisa umuyiinga khukhwaama i bwaamanyaanga, nga amulaanga mu bukwalaafu khuukhola kumulimo kweewe? Naanu umweene uwaanayo kamanaambo kamakali mu bunyala bweewe, naluundi waamufukiilisa khukhaandakilila bayiinga baako aasi e bikyele byeewe? Niye araambisa ilomo yeewe waabekyelisa busa nga lifukhuulu. Araambisa buyiingo bweewe waabasalanisa busa nga imbewo nitaamuusa likhuutsi.

³Niye abatimisa baatsya, ne niye waarama nga s'alikho ni shishimutaambisa ta, abe yakhaba nga ali khuukyeendela khu mukhoosi kweesi akhaakyeendatsakilakho ta.

⁴Ne naanu umweene ukholile shino khuubawo, waashikyeesa waashoolisa ano, nga alaangilila kimiboolo kikikhali mitweela ta khukhwaama makiboole? Ise niye, ise Umukasya, Umukiboole luundi Uwakamayo, Ise niye Umweene.”

⁵Bikyelemeesi bibiili khu nyaantsa byaashiboone luundi byaariire luukali, ni kamanaambo kakaali ibwakaamilo we shiibala kalikho kanikina lwe khuurya khuukali, karyo kebuusile, kalikho keetsila atweela.

⁶Babaandu buli mutweela alikho ayeeta umwesanwa weewe, balikho beesanamwo kamaani, nga buli mutweela alomela uwashe ari, “Yiilamwo kamaani!”

⁷Umubeetsi alomela uyo ukhola khu bye zaabu, ni nooyo ukhola khu bye khuumiliisa ni nyoondo ayeeta uyo ukhomaka. Buli mutweela nga alomela uyo uwoosha bibyuuma ari, “Byoosi bili biilayi.” Baryo baakhupa shifwaani ni kimisumaari, nio shilekhe khusabukha ta.

⁸“Ne iwe Isiraeli, uli umwakaanisi wase, Yakobo isi samweene narobora, umwitsukhulu wa Iburayimu, uwaba musaale wase.

⁹Iwe niye isi ise nalaanga khukhwaama ibwakaamilo we shiibala, nga ikhuloma ndi, ‘Iwe uli umwakaanisi wase.’ Ise samweene nakhurobora iwe, siinyala naakhutuuma ibulafu ta.

¹⁰Ukharya ta, lwekhuuba ise ndi ni nawe. Ukhawamwo kamaani ta, lwekhuuba ise ndi Wele woowo. Ise samweene kane ikhwiisemo kamaani, naluundi kane ikhuyeete. Kane ikhusute angaaki nga inaambisa kumukhono kwase kumulayi kwe kamaani.”

¹¹“Bonakho, baasiku boowo boosi babaakhukhalaliile, bakhaawaambibwe tsisoni, baswaale busa. Abo boosi babaakhukhaabisanisa iwe bakhaawewo, luundi bahelele ilala.

¹²Imbuka ikhoole uweentse baasiku boowo abo, ulekhe khubanyoolakho na mutweela ta, abo boosi babaakhusoolanisa, baliweelawo ilala, balekhe khubonekhakho ta.

¹³Lwekhuuba ise samweene, Umukasya Wele woowo, kane ikhuwaambe kumukhono kwoowo kumulayi, ikhulomele ndi, ‘Ukharya ta, kane ikhuyeete.’”

¹⁴Ise Umukasya, Umuwonesi woowo, Umukhosefu wa Isiraeli, indi khushilaangilila ndi, “Iwe Yakobo abe yakhaba nga uli lukhanu busa, ukharya ta, ni nanywe babaandu ba Isiraeli mweesi; lwekhuuba ise samweene intsya khubayeeta.”

¹⁵Ne ari bona, ise intsya khukhwiikyelisa iwe kumuwulilo kumushaakha, kukuulikho kameeno kamayaakha luundi kamameme luukali. Iwe ukhaawuule tsinjiinji, utsisye tsinosikhe, ni bikoongo ubifwaanise busa nga likhuutsi.

¹⁶Ukhaatsiseese uryo utsihaanye mu ngaaki, imbewo itsitaamuuse, imbewo iye luwuutse itsisalanisake. Nio lwanyuma iwe wikhoyele mu Mukasya, ni nawe uryo ukhebuyilile mu Mukhosefu mweene uwa Isiraeli.

¹⁷“Isi bataambi atweela ni naabo babetsuule kumweekho bakheetsile khuweentsa kameetsi ne kataambawo, ni lulimi mu khanwa mwaabwe lwaaba nga lwoomile busa, ise Umukasya samweene ikhaabakobolemo. Iseese Wele wa Isiraeli, sikhaabalekhekho na khafwiiti khoosi ta.

¹⁸Ise ikhaabekulilewo tsintsitsi tse kameetsi khu njiinji tsindeeyi, ikhaabawe tsisebele mu matila. Ikhaashuuse kumubiimbi kwitsulemo tsintsitsi tse kameetsi. Liloba liliili lilyoomu likheekyele tsisebele tse kameetsi.

¹⁹Ise ikhaabyaale mu mubiimbi imwo kimisaala nga kimi kedali, kasiya, kumusiita ni kimisaala ki olivu. Naluundi ikhebyaalile mu liloba lilyoomu ilyo sayipuraasi, ni kimisaala kikiindi kikikhawululukha kamasaafu ta.

²⁰Shino ikhaashikhole nio babaandu babone luundi beyike, baryo bemenielese luundi bamanye shiina sheesi shimanyisa, bamanye bari kumukhono kw'Omukasya kumweene nikwo kukukholile shino, naluundi bari, Umukhosefu wa Isiraeli umweene niye ushireerewo.”

²¹Umukasya aloma ari, “Ari inywe ba wele be kamanaambo, ni mureere she khukhwiwotsakho sheenywe.” Umuyiinga wa Yakobo aloma luundi ari, “Ni muntsokese khukhwiwotsakho khweenywe.

²²Ari ni mureere bifwaani byeenywe ibyo bikhuboolele shiina shishiili khuutsya khukholekha. Luundi bikhuboolele bibiindu bibyanyoowa khuubawo, nio manya nafwe khwaabimenielesa shikile khumanye binaanu bibiili khukhwiitsa ibweeni, namwe bibyeene bikhukuukuulile binaanu bibiitsya khubawo.

²³Ilala bikhuboolele ifwe binaanu bibiitsya khubawo mu bifukhu bibiitsa, nio nafwe khumanye khuri nibo bali ba wele ilala. Ingana ba wele bano bakholeyo shishiindu shiilayi namwe shihangafu, nio manya shaakhwiyaangisa naluundi shaakhuriisaka.

²⁴Ne ari mubonekha nga simulimo shiilayi ta, ni bikholwa byeenywe mbaawo sheesi byaamamwo ta. N'umuundu yeesi ukhalawo waabaloondelela inywe eyonakisa busa umweene.”

²⁵“Ne ise naasuuluusile umuundu mutweela ukheetse khukhwaamila kwe ngaaki, ali aambi woolile, uyo uwaama ibwaamanyaanga ukhaakuukuule lisiina lyase. Umweene uyo akheetse akhaandakilile baawuli abafwaanise busa nga ukhaandakilila liloba, namwe nga umubuumbi n'asaamba liloba.

²⁶Naanu umweene uwalaangilila shino khukhwaama makiboole nio khwaashimanya? Namwe naanu uwashiboola nga bushiili nio nafwe khwaaloma khuri, ‘Aaba mutuufu.’? Ne mbaawo na mutweela uwashikuukuulakho ta, namwe mbaawo uwakhuboolelakho ta, nashiryo mbaawo umuundu uwawulilakho ilomo yoosi ta.

²⁷Khuunyoowa ise Umukasya samweene nashiboolela Sayuuni indi ‘Bona babaandu boowo abashiina balikho bakobola ingo!’ Naluundi naarumanisa i Yerusalemu umurume we kamakhuuwa kamalayi.

²⁸Neendi indola, simbonakho na mutweela unyala waashikhola ta, nga mbaawo na mutweela uwanyala khuubakaambilila ta. Nga nareebile, mbaawo na mutweela unyala khuuwa she khukhwiilamwo ta.

²⁹Bona ari boosi bubeeyi bwonyene. Buuraambi bwaabwe sibulimwo shiindu ta. Bibuumbe byaabwe byoosi bili busa nga imbewo itaamuukha busa.”