Read lumasaaba Isaaya 42 Bible Online

Isaaya 42 - lumasaaba bible

Isaaya 42

¹ Umukasya aloma ari, “Bonakho umwakaanisi wase isi nisamwo kamaani, umurobore wase isi buulamu bwase bwikhoyela. Umweene uyo niye isi narakho Umwoyo wase, niye ukane areerere bwaŋali mu manaambo.

²Niye s'alinyusakho likono lyeewe angaaki, namwe bari akhupe liyoombo ta. Niye s'alinyusa likono lyeewe liwulilikhe mu mikhoosi kye mu shiriimba ta.

³Niye s'alifuniaaka luukholo lulutengaala busa ta, namwe s'alisimisa itaala iwetsekhelela ta. Umweene uyo niye ukhaareerewo bwaŋali mu baandu abe bababirisibwa buubi.

⁴Niye s'alihendukha, namwe bari awemo kamaani ta, khukhwoolesa nga waamalile khureera bwaŋali khu shibala. Ni bikyelemeesi bibiili khu kuyaantsa bikhaaliindilile khuuleekela khweewe.”

⁵Shino nisho sheesi Wele, Umukasya, uwabuumba liikulu, waalitsaanuula waalibalaayisa, naluundi umweene uyo niye uwabuumba shiibala, na buli shiindu shoosi shishiilimwo, ate nga niye uuwa babaandu kumuukha kweesi baheela, naluundi waawa buulamu isi abo babaakyeendelakho, aloma ari:

⁶“Iseese Umukasya, nakhulaanga iwe khukhwookesanisa bukwalaafu bwase. Kane samweene ikhuwaambe kumukhono, ikhuliinde buulayi. Kane ikhuliinde buulayi luundi ikhwikyelise iwe khuuba ikwangwaani isi babaandu baakali. Naluundi ikhaakhwikyelise iwe khuuba buwaanga bwe kamanaambo.

⁷Iwe niye ukhaabikule tsimoni tsaabo babaali baabofu, khuukaangulula baabowe babaali mwipuusu, ni khuulekhuula abo babekhala mu shiilima shiikali.”

⁸“Iseese niye Umukasya; ilyo nilyo lisiina lyase! Mbaawo yeesi ukabananakho khu shiriifwa shase, namwe khuukabanana lubuyi lwase ni bifwaani ta.

⁹Bibiindu byoosi bibyakanikhibwakho khaalekho byooleleele, ari indi khuulaangilila bibiindu bishaakha; nga bishiili khuubawo ta, indi khuubikanikhakho mubimanye.”

¹⁰Nimwiimbile Umukasya kumweenya kumushaakha! Nimwiimbe khuumubuyilisa khukhwoolesa isi shiibala shoosi shaakama. Nimumubuyilise inywe mweesi babaaseyeeya khu mayaantsa, ni neebyo byoosi bibiili mu mayaantsa keene, atweela ni bikyelemeesi byoosi ni babaandu babaabimenyakho.

¹¹Lekha kimibiimbi ni biriimba byamwo byoosi binyusile kamakono kaabwe atweela; lekha ni babekhali babaamenya mu Kedari nabo bekhoye! Ni babaandu babaamenya mu Sela nabo beembe ni kumwikhoyo, baniine khu njiinji khu ngaaki balookhe luukali!

¹²Khayo babaandu boosi baweese Umukasya shiriifwa; ni lubuyi lweewe lubonekhele mu bikyelemeesi bibiili khu mayaantsa.

¹³Umukasya umweene arura waakhuumba nga umusaani uwe kamaani kamakali; nga umusoolani urura ibulafu nga wetsuule buurafu. Umweene eetsa nga akuukuula luundi nga akhupa liyoombo lye busoolo, aryo wokesanisa kamaani keewe khu baasiku beewe boosi.

¹⁴Umweene akhaalome ari, “Imbuka yaabirawo ingali nga samweene naasila busa, naliinda luukoosi lwase; ilala abe samweene naayiliinda. Ne ari ingana khuupa liyoombo nga umukhasi utsya khusaala, ari inalila, imbeelaeele luundi inikine.

¹⁵Ikhaalimake tsinjiinji atweela ni tsingoongo tsoosi intsikwiise aasi, ibyo byoosi bibyatsowakho bikhaaniaale. Biifwo bibyaba abe tsintsitsi tse kameetsi bikhekyele bibyoomu busa, ni biifwo bibyaba kamatibo bikhoomelele.

¹⁶Ise samweene ikhaaraangilile babaandu baabofu be tsimoni, imbayile khu ntsila ishaakha abe isi bakhaamanyatsakakho ta. Samweene ikhaabalakilile intsila abe isi bakhaakyeendatsakilakho ta. Ikhaashuuse shishiilima shikyele buwaanga isi bali, ni biifwo bye kamatikwi bibe biitsaalaafu. Ilala bibiindu bino samweene niye ukhaabikhole; siindilekhakho babaandu baase ta.

¹⁷Ne abo babeyikina bifwaani, abo boosi babaalomela bifwaani bari, ‘Inywe muli ba wele beefwe,’ balishuusibwa bakobosebweyo inyuma mu khuswaala khwe kamaani.”

¹⁸“Inywe babaandu babaaminyaala mu maru, ni murekeerese, luundi munyukanyuke mubone, inywe babaabafwaala tsimoni!

¹⁹Naanu uuli umubofu we tsimoni, akhali umwakaanisi wase ta? Naanu uwaminyaala mu maru akhali umurume wase isi indumana? Naanu uwabafwaala tsimoni nga umwakaanisi wase umurobore? Namwe umubofu nga umwakaanisi w'Omukasya?

²⁰Ubona bibiindu biikali naabi, ne waalekha khuubimenieelesa ta. Kamaru koowo kaayikukha buulayi, ne s'ukana khuuwulila ta.”

²¹Shamwikhoyesa naabi Umukasya, lwe buulayi bwe bukwalaafu bweewe umweene, khuubona ari aniinisa kamakaambila keewe kabe ke angaaki, ni khuukeesamwo shiriifwa.

²²Ne ate nga bano bali babaandu beesi baanuulakho luundi babayaayakho bibiindu bibyaabwe, boosi baababowela mu malowo, namwe baababisa mu mapuusu. Baayikyela babaandu babayaayibwa busa, nga sibalikho n'umuundu unyala waabawonesa ta, bali nga bibiindu byeesi banuulile, nga sibalikho n'umuyeeti unyala waaloma ari, “Bakoboseyo ingo ta.”

²³Naanu khusiinywe unyala waawuliilisa bino byoosi, lwanyuma waamanya buulayi imbuka iyiitsa mu moni?

²⁴Naanu uwafukiilisa Yakobo khunuulibwa aryo, ni Isiraeli khuuba isi bayaaya busa baryo? Yaba Umukasya umweene isi ifwe khwonekayo, lwekhuuba babaandu sibaakyeendatsakila mu ntsila tseewe ta, naluundi sibaaloondelela kamakaambila keewe ta.

²⁵Isho shaakila waabatsukhakho lirima lyeewe lilitindiima nga kumulilo, waabahesela mu busoolo bwe kamaani. Baryo boosi babowekhela akari mu mulilo kukuutindiima, ne shonyene baalekha khumanya ta. Boosi bookhebwa ni kumulilo, ne baalekha khukhwiyika ta.