Read lumasaaba Isaaya 43 Bible Online

Isaaya 43 - lumasaaba bible

Isaaya 43

¹Umukasya aloma ari, “Ne ari, iwe Yakobo, reekeresa sheesi Umukasya uwakhubuumba aloma; Iwe Isiraeli, wuliilisa byeesi uyo uwakhurawo aloma: Ukharya ta, lwekhuuba ise samweene niye uwakhuwonesa. Ise nakhulaanga iwe ni lisiina lilyoowo lilyeene; iwe uli uwase umweene.

²Buli lweesi kane ubirire mu meetsi ke shisiba kamaleeyi kameene, ise kane imbaatsake ni nawe. Buli lweesi kane ubirire mu ntsitsi tse kameetsi tsitsitsuule, singene kakhumile kakhuyile ta. Abe waakhalikyeenda khuubirira mu mulilo, sikulikhwoosha ta; kumulilo kukuutindiima sikulikhuhesa ta.

³Lwekhuuba ise niye Umukasya Wele woowo, Umukhosefu wa Isiraeli niye Umuwonesi woowo. Ise nawaanayo Misiri khuuba nga she khuukhuwonesa iwe, Esiyopiya[12] ni Seba khuuyila mu shifwo shoowo.

⁴Lwekhuuba iwe uli uwe lisuno liikali mu moni tsase, naluundi lwekhuuba ise ikhukana naabi, nawaanayo babaandu babaandi khulwoowo, nawaanayo babaandu babaandi khuuwonesa buulamu bwoowo.

⁵Nashiryo iwe ukharya ta, lwekhuuba ise samweene indi atweela ni nawe. Kane ingobose lisaaye lyoowo khukhwaama i bwaamanyaanga, kane ikhubuusilise iwe khukhwaama i bukwanyaanga.

⁶Kane indakile kamanaambo ke khu lubeka lwe ngaaki indi, ‘Balekhuule,’ ni ke khu lubeka lwe mwaalo indi, ‘Ukhabehaambilisakho ta.’ Kobosaka basooleli baase khukhwaama mu bifwo bye aleeyi, ni bakhaana baase khukhwaama mu soonda tse aleeyi tse shiibala shoosi.

⁷Kobosa buli mutweela uwalaangibwa ni lisiina lyase, isi ise nabuumba lwe shiriifwa shase. Uyo isi ise samweene nabuumba luundi naarawo.”

⁸Rusa ibulafu babaandu babaali ni tsimoni ate nga baabofwaala, abo babaali ni kamaru ke khuuwulila ate nga baaminyaala!

⁹Kamanaambo koosi ke mu shibala kabuusibwe atweela, ni babaandu boosi be mu shibala babuusane mu shifwo shitweela. Naanu khu nibo uwanyala khuubuula shino, luundi waakhurumbulila bibiindu bibyanyoowa khuubawo? Lekha nibo bareere bujulisi bwaabwe khukhwookesanisa bari bali baŋali, naluundi lekha ibewo abo babaawulila nio balome bari, “Shili sha ŋali.”

¹⁰Umukasya aloma ari, “Inywe muli bajulisi baase. Naluundi Umwakaanisi wase isi samweene neroborera, nio umanye ise; ufukiilile musiise luundi umanye uri ise senyene niye Wele. Iburaangisi wase mbaayo wele ukuundi uwareebwayo ta, namwe abe yakhaba inyuma wase, mbaayo ukuundi uliyo ta.

¹¹Iseese, Ise samweene, Ise niye Umukasya, mbaawo umuwonesi ukuundi ta, khuurusakho ise senyene.

¹²Iseese khuunyoowa nashilaangilila, lwanyuma naawonesa, nakyelawo nashikuukuula isi kamanaambo. Mbaawo wele ukuundi akari musiinywe uwashikhola ta; Inywe mwabeene muli baajulisi baase, khuumanya muri ise niye Wele.” Bino Umukasya umweene niye ubiloma.

¹³Khukhwaama liina na liina, iseese niye Wele. Mbaawo umuundu yeesi unyala waarusa shishiindu shoosi khukhwaama mu mukhono kwase ta. Naluundi nga nakholile sheesi ikhola, mbaawo unyala waashuusamwo ta.

¹⁴Ne ari ndi sheesi Umukasya, Umuwonesi woowo, Umukhosefu wa Isiraeli, aloma nisho shino ndi: “Lwe buulayi bweenywe, intsya khurumanisa baasiku i Babulooni, baryo bareere babaandu baayo boosi nga baabowe, ni Bakaludaaya beene abo mu meeri tseesi bewulililakho.

¹⁵Iseese niye Umukasya, Umukhosefu weenywe, Umubuumbi wa Isiraeli luundi Umuyiinga weenywe.”

¹⁶Umukasya aloma ari, niye uwikulawo kumukhoosi mu kuyaantsa, luundi waakholawo intsila mu meetsi ke kamaani.

¹⁷Niye uwakila kamakaali ni tsiŋwaaŋwa bye Misiri, ni baselikhale atweela ni basoolani boosi, baakwa aasi, balekha khunyala khukhwinyukha luundi ta, buulamu baabwe bwaweetsekhelela busa, bwooma bwafwaana nga lutaambi lwe kha taala lulukhalimo kamafura ta.

¹⁸Umukasya alooselakho ari, “Mukhashebulila bibiindu biikhale, bitaayi bibyamala khuubira ibyo ta, mukhambaasa khu biindu bye khaale ibyo ta.

¹⁹Ari ise intsya khukholayo shishiindu shishaakha. Bonakho, ari shilikho shirura, mushiili khushibona ta? Ise ndi khuutsya khuupa kumukhoosi mu mubiimbi, naluundi indeerewo tsintsitsi tse kameetsi mu shibala shishoomu.

²⁰Tsisolo tse mwirome tsikhaantsisemo ise lukoosi, tsishipwe atweela ni kamanywiinywi maaya; lwekhuuba imbiwa kameetsi iyo mu mubiimbi. Indawo ni tsintsitsi tse kameetsi mu shibala shishoomu, nio babaandu baase baarobore babe ni kameetsi ke khuunywa.

²¹Nibo bali babaandu beesi samweene nebuumbila, nio banyale khulaangila bye khukhuumbuyilisa samweene.”

²²“Ne iwe Yakobo, wekaana khukhuuntsilootsela, ni nawe Isiraeli mwoola ni khukhuunduwa ise.

²³Inywe mwaakhundeererakho ise kamakheese lwe tsisaayilo tsintsoshe ta, namwe mwaantsisamo lukoosi ni tsisaayilo ta. Iseese naakhubaluwisakho inywe nga imbaloomba biwaanwa, namwe naabalokhela lwe khuubasabilisa bubaane ta.

²⁴Inywe mwaakhuraambisakho tsinusu tseenywe khukhuungulila ise tsikholo tsitsiwunya buulayi ta, namwe mwaakhuntsikusatsakakho ni kiminaawa kye tsisaayilo tseenywe ta. Ne shonyene ndi, muunduyisa ise ni bibyoonako byeenywe, muryo mwaandokhela lwe bumoyaani bweenywe.”

²⁵Umukasya aloma ari, “Iseese, Ise senyene Niye usyaangula bubwoonaki bweenywe lwe buulayi bwe lisiina lyase, indyo singene nileyo luundi khukhwaambaasakho khu byoonako byeenywe ta.

²⁶Ngana muukhebusekho ise khu biindu bibyamala khaale khuubira, khakhuteeselekho atweela khubone; Yikanikhakho mwabeene nio mwokesanise muri simulikho ni kumusaango ta.

²⁷Khukhwaama makiboole, kuuka weenywe uwanyoowa oneka, ni babaandu beenywe babaabakhiikhilila inywe boonakisa isiindi.

²⁸Isho shikhaakile ikhomyaasake basaayi babaakaanisa mu shifwo shikhosefu, naluundi ikhaawaaneyo Yakobo khuhelela ilala, ni Isiraeli awaambisibwe tsisoni tse kamaani.”