Read lumasaaba Isaaya 44 Bible Online

Isaaya 44 - lumasaaba bible

Isaaya 44

¹“Ne ari iwe Yakobo umwakaanisi wase, rekeeresa buulayi, Iwe Isiraeli isi samweene narobora.

²Aryo Umukasya uwa khubuumba iwe, aloma ari, niye uwakhurawo iwe, naluundi waakhubuumbila mu shisoombo sha maayi woowo, niye ukane akhuyeete: Ukharya ta, iwe Yakobo umwakaanisi wase, Yeshuruni[13] isi samweene narobora.

³Lwekhuuba ise kane intsukhiilile kameetsi khu liloba lilyoomu, ni tsintsitsi tse kameetsi mu liloba lilyekhalaanga; Kane intsukhiilile Umwoyo wase khu betsukhulu boowo, ni tsikhabi tsase khu lisaaye lyoowo.

⁴Bakhaatsowe buulayi bafwaane nga bunyaasi bweesi baatsukhiilila kameetsi, namwe bisaala bibitsowa khu ndulo khwe tsintsitsi tse kameetsi.

⁵Ilibawo mutweela uliloma ari, ‘Iseese ndi uw'Omukasya.’ N'ukuundi alitwiikha umweene lisiina elaange ari, ‘Ise ndi uwa Yakobo.’ Ibewo n'ukuundi ukheronekho khu mukhono kweewe ari, ‘Iseese ndi uw'Omukasya,’ aryo ayile lisiina lya Isiraeli libe nga lisiina lyeewe litwiikha.”

⁶Umukasya, niye Umuyiinga wa Isiraeli, luundi niye Umuwonesi weewe, niye Umunyali wa Byoosi, uwe kamahe ke mu ngaaki, aloma ari, “Iseese niye Unyoowa luundi Niye uwakamayo, mbaawo wele ukuundi akhali Ise ta.

⁷Naanu niye uuli nga ise? Ni eruseyo eetse iburaangisi wase, ashilaangilile lubuula nga ni bitsya biloondekhana. Aryo okesanise ibyo bibyabawo khukhwaamila khu mbuka iyanyoowa isi nareerawo babaandu baase babaanyoowa, naluundi akhusontsoole ibyo bibiili khukhwiitsa iburaangisi.

⁸Inywe mukharya, namwe mweyembelela ta. Khukhwaama khaale ise sinababoolelakho bitsilililwa byase? Inywe mwabeene muli bajulisi baase. Manya iliwo wele ukuundi akhali ise ta? Mbaawo ta! Mbaawo Lulwaanda luluundi lweesi ise imanyilekho ta.”

⁹Abo boosi babekholela bifwaani sibalimo kamakyesi ta, ni bibiindu byeesi bekhoyela byoosi sibilimo kumukaso ta. Babaandu boosi babaabikanikhilila luundi baabisaaya baabofwaala tsimoni, sibamanya ta. Nashiryo baliwaambisibwa tsisoni.

¹⁰Naanu umweene unyala wekholela wele, wemiliisila shifwaani, nga waamanyile ari mbaawo sheesi atsya khufunamwo ta?

¹¹Umweene uyo atweela ni basheewe boosi bakhaawaambibwe tsisoni, abo boosi babaabuumba bibiindu bino bali babaandu buundu busa. Ari lekha boosi beetse atweela, luundi beemikhe mu butweela, boosi bakhaarye, luundi bawaambibwe kamaŋaanyu.

¹²Umubasi we bibyuuma asuta iyaywa, waakira mu maanda ke kumulilo kakeseŋeŋile, lwanyuma waakikhupa ni tsinyoondo, waakyamisamwo sheesi akana, nga araambisa kamaani kamakali. Aryo akyelawo intsala yaamulya, waawamwo kamaani, nga waakhunywakho kameetsi ta, buulesa bumulya waayengukha.

¹³Umubeetsi naye araambisa luukhoba lweewe waapima shikyeenga, aryo waraambisa ikalaamu waapimaka bibinaamamwo; lwanyuma waaraambisa kumusa khuushibeetsaka, waaraambisa bibyuuma bibiindi khuupima abone. Lwanyuma waashibeetsamwo shifwaani sh'omuundu, shifwaani sh'omuundu shisheene ni shiriifwa sheewe, waakyelawo waashira mu lisari lye khukhwisaayilamwo.

¹⁴Umweene aatsya weremera kimisaala kimi kedali, namwe waaroboramwo sayipuraasi namwe kumuruumba. Niye khunyoowa aakulekha kwatsowela atweela ni kimisaala kikiindi kye mu shisaali, waabyaala ni kimi kedali kikyatsowa nga ifula ikitsukhiilila.

¹⁵Nio lwanyuma waabukulakho kimilala khu nikyo waakiraambisa nga tsiikhu tse kumulilo, tseesi awaambisa khuukhwoora afune bukhafu, tsitsiindi waatsiraambisa khukhwikyeleesa lwe khuteekha biilyo. Ne bikyeenga bibiiramile waabibeetsamwo wele isi atsya khukhwisaaya, abikholamwo bifwaani byeesi atsya khufukhamila aasi wesaaya.

¹⁶Biryo bitweela khu bikyeenga bye kimisaala abira khu mulilo, waabyookhelakho tsinyama tseesi alya wekura. Naluundi wekhala aambi ni buukhafu wekhafuyisa, kila aloma ari, “Aha! Ari newulila buukhafu buulayi, kuno kumulilo kumweene!”

¹⁷Ne bikyeenga bibiiramile waabikholamwo wele, shishiili shifwaani sheewe busa! Lwanyuma waakwa aasi iburaangisi washo, wewunamila aasi waashilomela ari, “Iwe imbonese ise! Lwekhuuba iwe uli wele wase.”

¹⁸Babaandu bano sibali ni kamakyesi, luundi sibamanya ta! Tsimoni tsaabwe tsaabiimbibwakho, nashiryo sibabona ta. Ni bibyambaaso byaabwe byayikalikha, sibambaasa baamanya ta.

¹⁹Mbaawo na mutweela khu nibo uwiimikha weyambaasa mu mwoyo kweewe ta. Namwe yaabayo na mutweela uuba ni kamakyesi waashebulila waaloma ari, “Ne bitweela khu bikyeenga bino nabiraambisa khu mulilo, naabiraambisa nga kamaanda khuuteekha biilyo, bibiindi naabiraambisa khukhwoosha tsinyama naalya. Ari inyala indyeena khuuraambisa bino bibiramile khuukhola shishiindu she mbikho nga shino? Ari inyala naakwa aasi khukhwisaaya kuutsikhi kuno?”

²⁰Umuundu ufwaana aryo alya khwikokhe, kumwoyo kweewe kukwaborokha kumuwombesa. Niye s'anyala wewonesa umweene namwe waaloma ari, “Ise siindi khuwombesebwa ni shifwaani shino sheesi ikholile ni kumukhono kwase kumulayi ta?”

²¹Umukasya waaloma “Iwe Yakobo, bibiindu bino n'ubikhebulile, lwekhuuba iwe Isiraeli, uli umwakaanisi wase. Ise Umukasya samweene, niye uwakhurawo, iwe uli umwakaanisi wase. Isiraeli, ise singene ikhwiibilile iwe ta.

²²Ari nasyaanguule bibyoonako byoowo byafwaanile nga namufweeli utaamuukhile. Nataamuusile bibyoonako byoowo, byafwaanile nga namufweeli we kumutikhinyi. Nashiryo kobola isiindi, lwekhuuba ise naakhukaanguluule uli umulekhuule.”

²³Iwe liikulu, yeemba kimyeenya, lwekhuuba Umukasya umweene niye ukholile shishiindu shiikhulu shino! Lookha luukali lwe kumwikhoyo, inywe bisiintsa bibiili aasi e shiibala! Ni mweembe kimyeenya, inywe tsinjiinji, ni nanywe bisaali atweela na buli kuusaala kwoosi kukuulimwo. Lwekhuuba Umukasya waakaanguluule Yakobo, wokesanisile shiriifwa sheewe mu Isiraeli.

²⁴Sheesi Umukasya, Umuwonesi woowo, uwakhubuumbila muunda mwa maayi woowo, aloma nisho shino ari, “Ise ndi Umukasya, uwakhola bibiindu byoosi. Ise samweene senyene niye uwatsaanuusa likulu lyoosi, naluundi samweene naabalaayisa shiibala, mbaawo na mutweela uwaba ni nase ta.

²⁵Naanu umweene ukhaasikhanisa bubonelo bwe baŋoosi be bubeeyi? Naanu niye ukhola baafumu bekyela baasilu busa? Naanu ilala ukila bakyesikyesi bawamwo kamakyesi, aryo wekyelisa kamakyesi kaabwe khuuba bye busilu busa?

²⁶Ne waamala wahaangasa ilomo iye babaakaanisi beewe, aryo woolelesa byeesi baarume beewe balaangilila. Nibo beesi araambisa khuulaangilila isi Yerusalemu bari, ‘Babaandu bakheeleyo luundi khuumenya mu shifwo shino,’ ni khuulaangilila isi biriimba bya Yuda bari, ‘Inywe mukhombekhebwe luundi, mukhaakobosebwe bushaakha khukhwaama mu mawuumbu kano.’

²⁷Niye ulomela biifwo bibiilimwo tsintsitsi tse kameetsi aasi mwiloba ari, ‘Yoomelela,’ natso tsoosi tsoomelela.

²⁸Niye ukanikha isi Sayiraasi ari, ‘Niye umwaayi wase, ilala niye ukane olelese shitsilililwa shase sheesi imulomela khuukhola.’ Niye ukane akanikha khu Yerusalemu ari, ‘Lekha Yerusalemu shoombekhebwe bushaakha,’ naluundi akanikhe khu Lisaayilo Likhulu ari, ‘Kumusiingi kwoowo kwombakhibwe luundi bushaakha.’ ”