Read lumasaaba Isaaya 45 Bible Online

Isaaya 45 - lumasaaba bible

Isaaya 45

¹Umukasya aloma ari, Wulila sheesi Umukasya alomela Sayiraasi, isi umweene aatsukhakho kamafura, isi awaambile khu mukhono kweewe kumulayi, nio atsye awule kamanaambo kakaali ibweeni weewe, ni khuutsya khwabulakho bayiinga byeesi bebowelela, barye luukali. Aryo akhekulakewo kimilyaango, ni bilibwa bilekhe khurama nga bili bibikale ta.

²Umukasya waalomela Sayiraasi ari, “Iseese samweene kane ikhuraangilile intsye ibweeni inimake biifwo bye bitikwi imbikwalaase. Indifuniaakaka tsintsitsi tsitsakholebwa mu buroonzi, ikhalakake ni kimibya kye bibyuuma.

³Samweene ikhaakhuwe iwe bibiindu bye lisuno bibyabisibwa mu shiilima, bye buyiindifu byeesi babuunga mu bifwo bibyeebisa. Kane ikhole shino nio nawe umanye uri, Iseese niye Umukasya, Wele wa Isiraeli, ukhulaanga iwe lisiina lyoowo.

⁴Lwe buulayi bw'omwakaanisi wase Yakobo, naluundi niye Isiraeli isi samweene narobora; Indi khuukhulaanga iwe lisiina lyoowo, ikhurekho shiifwo she shiriifwa, abe yakhaba nga iwe waakhumanya ise ta.

⁵Iseese niye Umukasya, mbaawo ukuundi ta; akhali ise, mbaawo Wele ukuundi ta. Ise ikhukwaarisa iwe kamaani lwe buusoolo abe yakhaba nga iwe waakhumanya ise ta.

⁶Shiba shiryo nio babaandu boosi bamanye bari, mbaawo wele ukuundi ta, khukhwaamila ilala ibwaamanyaanga ni khukhwoola ibukwanyaanga. Iseese niye Umukasya, mbaawo ukuundi ta.

⁷Ise niye ureerawo buwaanga, naluundi naarawo shishiilima, indeerawo imbuka iye biilayi, ne alala naarawo imbuka iye biikosi. Iseese ndi Umukasya, samweene niye ukhola bibiindu bino.”

⁸“Iwe likulu liliili angaaki luukali, yiikulawo utsukhiilile aasi bukwalaafu, lekha namufweeli abutsukhiilile khukhwaama mu ngaaki. Ari khayo shiibala shiyikule shibalaayise, nio buwonesi bumele, ni bukwalaafu bururire atweela ni nabwo. Iseese Umukasya samweene niye ushikholile.”

⁹Kumutaambo kwaanyoolile umuundu ukhaandisana n'umubuumbi weewe. Shibuumbe she liloba busa khuukhaabisana n'umubuumbi washo! Manya liloba linyala lyaareeba umubuumbi uuli khuliroka liri, Iwe nawe uli khuukhola shiina? Namwe inyuungu yaaloma iri, Shibuumbe sishilikho kamakhono kakawaamba ta?

¹⁰Nga kumutaambo kunyala kwanyoola umwaana umuŋaalye unyala waareeba paapa weewe ari, Shiina shino sheesi wasaala? Namwe waareeba maayi weewe ari, Shiina shishakilile waaba mu butsiina bwe khuusaala?

¹¹Sheesi Umukasya, Umukhosefu wa Isiraeli, luundi Umubuumbi weewe aloma nisho shino ndi: “Inywe munyala mwandeeba ise khu biindu bibiwaamba khu baana baase? Inywe muumba ise biilakilo bibilooondekhana ni kumulimo kwe kamakhono kaase?

¹²Iseese niye uwakhola shiibala, indyo naabuumba babaandu babaashimenyakho. Naraambisa kamakhono kaase kameene khuutsaanuusa liikulu, naluundi naalakila ni liiye lye bibiilimwo byoosi.

¹³Nenyusile Sayiraasi khukhwoolelesa bukhosefu bwase, indyo kane imutsalaasile tsintsila tseewe. Umweene uyo niye ukhoombekhe shiriimba shase bushaakha, alekhuule babaandu baase abe babaali baabowe, nga abalekhuula busa akhali lipeesa lyoosi namwe shiwaanwa shoosi ta. Ise samweene Umukasya, uwe kamahe, umunyali wa byoosi niye ulomile.”

¹⁴Sheesi Umukasya aloma nisho shino ari: “Bye buyiindifu bye ba Misiri, ni bye buukusi bya Esiyopiya byoosi, ni bye ba Sabeya, babaali babaandu be kamaani, bikhareerebwe isi muli, biikyele bibyeenywe. Babaandu bano bakheetse bafulyaamila busa aasi nga babaloondelela inywe, bakheetsile mu minyololo nga n'ubona baabowe, beetse babaafukhamilile inywe. Baryo bakheetse nga bekoontselela busa, nga baloma bari, Ilala Wele ali ni nanywe mwenyene, mbaawo ukuundi ta, mbaawo wele ukuundi akhali niye ta.”

¹⁵Ilala, O Wele wa Isiraeli, iwe umuwonesi weefwe, uli Wele uwibisa s'umanyikhana ta.

¹⁶Boosi babaabeetsa bifwaani bakhaswaale busa, luundi bawaambisibwe tsisoni. Boosi atweela bakhaatsye nga baswaalile naabi.

¹⁷Ne Umukasya akhaawonese babaandu ba Isiraeli, ni buwonesi bubukhawawo ta. Khuubira mu miboolo ni kimiboolo kikikhali mitweela ta, sibakheeleyo luundi mu khuswaala, namwe bawaambisibwe tsisoni ta.

¹⁸Umukasya niye Wele, naluundi niye uwabuumba likulu (Lwekhuuba niye Wele), uwaakhola shiibala, waaramwo buli shiindu, waashimiliisila ilala, niye s'ashibuumba khuurama awo nga shekoyakoyile busa ta, ne aashirawo ari babaandu bashimenyemwo. Niye Umweene aloma ari, “Iseese niye Umukasya, mbaawo ukuundi akhali ise ta.

¹⁹Iseese singanikhila mu shimoonyo na khafwiiti khari ta, ise sinimoonyelesela mu shifwo she shishiilima ta. Ise sinalomelakho lisaaye lya Yakobo ndi, ‘Ni muumeentsele mu shiilima busa ta.’ Iseese niye Umukasya, inganikha ibyo bibiili byaŋali, naluundi inganikha ibyo bibiili biituufu.”

²⁰Umukasya alooselakho ari “Nimubuusane atweela mwiitse, yisyeenda aambi, inywe bawoolayo, babaawona khu baandu be kamanaambo! Nga bali baasilu babaandu babaasuta bifwaani byeesi baabeetsa khukhwaama mu misaala, baryo baloomba isi wele ukhanyala waawonesa ta!

²¹Laangilila isho shishiitsya khubawo, ni mushireere, lekha babaandu bano beetse atweela baboolanile. Naanu umweene uwakanikha khu shiindu shino khukhwaama khaalekho? Naanu uwashikuukuula mataayiko? Siyaba ise Umukasya, samweene ta? Lwekhuuba mbaawo Wele ukuundi, akhali ise senyene, uuli Wele umukwalaafu luundi Umuwonesi. Mbaawo ukuundi ta, khuurusakho ise senyene.

²²Inywe biibala bibiili i aleeyi mweesi, Shuukha mukobole isi ise, muwonesebwe! Lwekhuuba ise ndi Wele; mbaawo ukuundi ta akhali ise senyene.

²³Iseese neetsubile nga inaambisa lisiina lyase lilyeene, biilomo khukhwaama mu khanwa mwase birura mu bukwalaafu bwonyene, ate nga naakanikhile sishuusamwo luundi ta. Buli liliisikamo lyoosi likhaafukhamile aasi isi ise na buli lulimi lulirumbula khukhuuntsisamwo ise shiriifwa.

²⁴Babaandu boosi baliloma bibimaambakho khusiise bari, ‘Mu Mukasya yenyene, nimwo mumunyoolekhana bukwalaafu ni kamaani.’ Ni babaandu boosi abe babaamukhalalila bakheetse is'ali, baswaale busa.

²⁵Ne mu Mukasya, lisaaye lya Isiraeli lyoosi likhaaniinisibwe angaaki, luundi linyoole shiriifwa.”