Read lumasaaba Isaaya 46 Bible Online

Isaaya 46 - lumasaaba bible

Isaaya 46

¹“Beli afukhama aasi, ni Nebo[14] naye enamisa kumurwe kweewe, bifwaani byaabwe bisutibwila khu bikaari bibikhweesibwa ni bisolo atweela ni tsiyeeyi. Bisolo bibikhweesa bikaari bino biluwa byakyeenda nga bifulyaama busa lwe busiro buukali.

²Bifwaani bino atweela ni naabo babaabiloolelela, beenamilila aasi, ba wele bano sibanyala baarusawo busiro bwe bisutwa ta. Ni nabo babeene bayilibwa mu bubowe.”

³“Inywe be lisaaye lya Yakobo, ni mundekeerese buulayi, inywe mweesi babaaramawo khu baandu ba Isiraeli. Ise samweene niye uwabaloolelela inywe khukhwaama khu khusaalikhana khweenywe; Ilala ise nabasuta khukhwaama isi mwasaalikhila.

⁴Abe yakhaba khuutsya khwoola mu miiko kyeenywe kye busakhulu, ise niye Wele, ni khukhwoolesa nga litsuune lyeenywe lyakhosile, samweene niye ukane abenaanekho. Ise samweene niye uwabarawo, indyo samweene niye ukane abaloolelele; Samweene niye ukane abasute imbakyeese, naluundi imbawonese.”

⁵“Naanu umweene isi munyala mwaafwaananisakho ise, luundi mwaalekhaanisa ni nase? Naanu niye isi munyala mwaafwaananisa ni nase muri khufwaanana?

⁶Babaandu baalala batsukha aasi i zaabu khukhwaama mu wootswa tsaabwe, baryo baapimaka i feetsa khu kilo, lwanyuma baafunayo umubasi we bibyuuma, khuubikhola byaamemwo wele. Nio lwanyuma lwayo baakwa aasi khukhwiisaaya!

⁷Babaandu basuta shifwaani isho, baashira khu mabeka kaabwe, bashisuta baatsya ni nasho; lwanyuma baatsya baashikhwiikha mu shifwo shasho, sharama nga shemikhile mu bweene imwo. Lwekhuuba sishinyala shaarura mu shifwo isho ta! Nga umuundu yeesi waashililiile kamasika, sishinyala shamwiilamwo ta, namwe sishinyala shaamuwonesa nga ali mu bukosi ta.”

⁸“Shebulila shishiindu shino inywe baboonaki, mushibaalusekho buulayi! Mukhashibilila ta, inywe babaandu baboonaki.

⁹Ni mushebulile bibiindu bye khaale, ibyo bibyanyoowa khuubawo. Lwekhuuba iseese niye Wele, mbaawo ukuundi ta! Iseese niye Wele, mbaawo ukuundi ufwaana nga ise ta.

¹⁰Iseese niye umanya intsakamwo nga nio shishiindu shirakikha, ni khukhwaamila ilala mu biseela bye khaale imanya ibyo bibiili khukhwiitsa. Samweene nilomela ndi: Sheesi ingana nisho shishiitsya khukholekha, naluundi nikholela isho sheesi imba naakanile.

¹¹Ise niye ulaanga kamanywiinywi namuturu khukhwaama ibwaamanyaanga, umuundu uwitsuule kamakhula kaase khukhwaama mu linaambo lye aleeyi. Iseese samweene naashikanikhile, indyo kane ishoolelese; Isho sheesi iŋoonaŋoonile, kane ishikhole.”

¹²“Nimundekeerese buulayi inywe babaandu be kimirwe kimiboofu, inywe babaali aleeyi naabi ni bukwalaafu.

¹³Iseese ndi khuureera buukwalaafu bwase aambi, sibulikho aleeyi ta; Buwonesi bwase singene bukyelewekho na khakyeekhe khoosi ta! Indi khuureerera Sayuuni[15] Buwonesi, ni lubuyi lwase lumalatane isi Isiraeli yeesi.”