Read lumasaaba Isaaya 47 Bible Online

Isaaya 47 - lumasaaba bible

Isaaya 47

¹“Iwe umukhaana wa Babulooni uuli indungubaasi; yiitsa wikhale aasi mwifukhulu. Iwe umukhaana we Bakaludaaya, yiikhala aasi akhali shitsoloŋo ta! Sibalilayo luundi khuukhulaanga bari umukhaana umulayi, uwawolawola, luundi umuteembu ta.

²Bukula tsisisi tsimboofu, usye buufu. Yirusakho shiitaambaala shoowo she khu murwe, lwanyuma wiyabulemo bikwaaro byoowo, ulekhe biikyele byoowo bukhuna busa, uryo ukyeende nga ubira mu ntsitsi tse kameetsi.

³Buukhuna bwoowo bukhaabonekhe lubuula, witsule kamaŋaanyu kamakali. Samweene ikheliyaase, mbaawo umuundu na mutweela isi ikhasaasile ta.”

⁴Umuwonesi weefwe, ulaangibwa bari Umukasya uwe kamahe, umunyali wa byoosi, niye Umukhosefu wa Isiraeli.

⁵Iwe umukhaana umumuliwu uwe Bakaludaaya, yiikhala ari mu shiilima, nga waasililikhanile busa. Iwe s'uliilayo luundi khuulaangikha uri nabakyelama we kamanaambo ta.

⁶Iseese naakhalalila babaandu baase, indyo naakhomyaasa busikha bwase bubweene. Naamala naabawaanayo mu mikhono kyoowo, ne iwe Babulooni waalekha khubokesanisa shiisa shoosi ta. Wababirisaka buubi naabi, abe yakhaba ni khu baasakhalu beene, waabarakho bisutwa bisiro luukali.

⁷Uryo welomela wamweene uri, “Kane ise imbatsake nabakyelama we kamanaambo.” Iwe waalekha khwambaasakho khu bikholwa byoowo ta, namwe khuukhwimenielesa ibyo bibinyala byaamamwo lwanyuma ta.

⁸“Nashiryo, ari wuliilisa shino, iwe Babulooni umukani we bibisangaasa, iwe umenya mu lukoosi lwoowo, lwanyuma weelomela mu mwoyo kwoowo uri, ‘Ise senyene niye uliwo, mbaawo ukuundi ta. Ise siindibakho namulekhwa, namwe ifwiisekho babaana ta.’

⁹Ne bibiindu bino bili bibili, bibikheetse isi uli mu mbuka njeekhe iri, khu shifukhu shitweela: ukhaafwiilwe babaana boowo, naluundi wikyele namulekhwa. Bibiindu bino byoosi bikheetsile ilala mu bukali bwabyo, abe yakhaba nga iwe wiyikina bye bulosi, ni kamaani koowo kamakali ke khuulakula.”

¹⁰“Iwe wewulila lukoosi luukali naabi mu bwoonaki bwoowo, shishakila weelomela uri, ‘Mbaawo umuundu na mutweela uwumboone ise ta.’ Ne manya uri, kamakhula koowo ni kamakyesi koowo ako byaakhuborosa naabi, byaakila weelomela mu mwoyo kwoowo uri, ‘Ise senyene niye uliwo, mbaawo ukuundi ta.’

¹¹Isho shikhaakile buukosi bukhukwiile, bweesi ukhaalekhe khunyalisa khukhwiwonesakho ta. Buwaangafu bukhaakhukwekho, bweesi ukhaalekhe khunyalisa khukhwiwoma ta. Khuuhela khukhaakhusunekho busa, abe khweesi ukhamanyatsakakho ta.

¹²Ari yinyukha wiloosele ni bye khuulakula byoowo, atweela ni bye buulosi byoowo bibikhali bitweela ta, byeesi ubeele nga uraambisa khukhwaamila ilala mu miiko kyoowo kye busooleli. Manya kane unyale khuubiramwo ukhole buulayi, manya binyala byareerera babaandu babaandi khuukhurya iwe naabi.

¹³Khuuboolelelwa khweesi ubeele nga ufuna khwaakhuluwisile busa. Lekha babaamanya bye tsinieniesi beetse bakhuwonese khubone. Lekha abo babaalolelesa bye mu ngaaki, baalolelesa tsinieniesi, beemenielesa bye kumweesi kumushaakha, beetse barumbule bibiili mu khanwa mwaabwe. Lekha nibo benyukhe angaaki bakhuwonese iwe isi ibyo bibiili khukhwiitsa iburaangisi khubone.

¹⁴Ne bali busa nga bunyaasi bubwoomu, bweesi kumulilo kwoosha kwaamalawo. Nibo sibanyala ni khukhwiwonesa babeene isi kumulilo kwe kamaani kukuutindiima ta. Kano sikali kamaanda ke kumulilo kweesi unyala khukhwoorera ta, namwe nikwo sikuli kumulilo kweesi unyala khukhwikhala aambi ta.

¹⁵Babafwaana bari nibo basaale boowo, beesi ubeele nga ukholakana ni nabo khukhwaamila ilala mu miiko kyoowo kye busooleli. Buli mutweela akyeenda waatsya busa mu khuborokha khweewe. Nashiryo mbaawo na mutweela khu nibo unyala waakhuwonesa iwe ta.”