Read lumasaaba Isaaya 48 Bible Online

Isaaya 48 - lumasaaba bible

Isaaya 48

¹Wuliilisa buulayi, inywe lisaaye lya Yakobo, inywe mweesi babalaangibwa lisiina lya Isiraeli, naluundi inywe babaasaalikhana mu lisaaye lya Yuda. Nimuwuliilise inywe babaakhola bibitsubo byeenywe mu lisiina ly'Omukasya, naluundi mwekhuunga lisiina lya Wele wa Isiraeli, ne mwalekha khwoolelesa bwaŋali namwe bukwalaafu ta.

²Inywe babelaanga lisiina lye shiriimba shiikhosefu, naluundi mwekanikhakho khuuba babaandu babeyikina Wele wa Isiraeli. Lisiina lyeewe bamulaanga bari Umukasya uwe kamahe, Umunyali wa Byoosi.

³Khukhwaama khaale ni khaale, ise nababoolela bibiindu bibyakholekha liina na liina. Kumunwa kwase kumweene nikwo kukwakanikha biilomo bino, indyo naabirumbula byaamanyikhana, lwanyuma khaangukho naabikhola, byoosi byoolelela.

⁴Lwekhuuba ise nabamanya ndi muli babaandu baamiinyi luukali, ni kimikotyo kikiili khu makosi keenywe kyaahangala nga shishuuma, ni bubweeni bweenywe bwaakuma nga buroonzi.

⁵Isho nisho shishakila naabikuukuula nga bushiili khaalekho; ise nabibaboolela inywe byoosi nga bishiili khwoola ni khuukholikha ta. Awo nio mulekhe khuloma muri, “Bifwaani byase nibyo bibikholile shino ta. Namwe bifwaani byase bye liloba ni neebyo bibyakholebwa khukhwaama mu shuuma, nibyo bibyalakila bibiindu bino byakholekha ta.”

⁶Inywe mwawulila bibiindu bino nga imbikanikhakho, ari ni mubone nga byooleleele; inywe singene mubilaangilile ta? Ari khukhwaama ni shaleelo shino, kane imbaboolele inywe muwulilatsake bibiindu bishaakha, bibiindu bibyebisa abe byeesi mushiili khumanya ta.

⁷Bibiindu bino bili bishaakha bilibuumbibwile alunaari, sibili bye khaale ta. Abe khukhwoolesa ni shaleelo shino, mwaakhubiwulilatsakakho ta; nio buli mutweela khwiinywe alekhe khuloma ari, “Ise ibyo abe naabimanya khaale.”

⁸“Ilala bibiindu byeesi mukhaawulilatsakakho ta, namwe mwaamanyakho ta, khukhwaama khaale bibiindu byeesi khukhuru khwoowo khukhaawulilatsakakho ta. Lwekhuuba naamanya buulayi ndi inywe muli babaandu be tsimbomelo. Inywe mwaabatsaka baaminyi muryo khukhwaama mu bwaana.

⁹Ne mu byoosi, lwe buulayi bwe lisiina lyase, nasilisa lirima lyase, ni lwe buulayi bwe khuubuyilisa lisiina lyase, singene indilekhuule ta, nio manya indekhe khukhumalilawo ilala ta.

¹⁰Bona ari ise ndi khuukhupyeeluusa iwe, ne siindi khuushikhola nga nibapyeeluusa ifeetsa ta. Ne shonyene ise nakhukhaka iwe nga ikhubirisila mu mulilo kwe khuutaambisibwa.

¹¹Lwe buulayi bwase, ilala lwe buulayi bwase, intsya khubawonesa inywe! Ise sinyala nalekha lisiina lyase lyaakhomebwa ta! Naluundi ise sinyala naakabanana shiriifwa shase ni wele kuundi ta.

¹²Ni mundekeerese buulayi inywe lisaaye lya Yakobo, iwe Isiraeli isi ise samweene narobora. Iseese niye Wele, Iseese niye Unyoowa, luundi Ise niye Uwaakamayo.

¹³Mu bunyala bwe kumukhono kwase, ise narawo kumusiingi kwe shiibala, ni kumukhono kwase kumulayi nabalaayisa liikulu mu ngaaki. Indyo nga nekhuungile bifwaani bye mwikulu byoosi, biryo biitsa byabuusana atweela.”

¹⁴Nimwibuuse mweesi atweela, mwiitse muwulile shino: Manya naanu khu ba wele beenywe uwababoolelakho khu biindu bino? Umukasya waarobora Sayiraasi khuuba umusaale weewe. Niye akhaabe nga olelesa kumulimo kweewe mu Babulooni, ni kumukhono kweewe kwe buunyala kukhaasoolanise Bakaludaaya.

¹⁵“Iseese, ilala Iseese samweene naakanikhile luundi naalaangile Sayiraasi. Samweene namurumaane khuuraamba, aryo kane olelese byeesi imurumile.

¹⁶Yisyeenda aambi isiindi muwuliilise shino: Khukhwaamila ilala maakiboole, iseese nakhukanikhakho mu shimoonyo ta. Khukhwaamila ilala khu mbuka isi shabeelawo, iseese samweene imbeelatsakilewo.” Ni khu mbuka yino, Umukasya Wele waandumanile iseese atweela n'Umwoyo weewe.

¹⁷Sheesi Umukasya, Umuwonesi woowo, Umukhosefu wa Isiraeli aloma nisho shino ndi: “Iseese ndi Umukasya Wele woowo, niye ukhuuleekela iwe binaanu bibikhwaakhila iwe, aryo waakhuraangilila khuutsya khu mukhoosi kweesi waakhiile khuutsyakho.

¹⁸Inywe muba nga mumwarekeeresa buulayi, muwuliilisa kamakaambila kaase! Ari khali muli ni lukoosi lulufeela busa nga luluutsi lwe kameetsi, ni bukwalaafu bweenywe khali bubamilile busa nga n'ubona kameetsi nikelyebula.

¹⁹Khali lisaaye lyeenywe lyaabalaaha lifwaana busa nga kumuyekhe khu ndulo khwe nyaantsa, baandibeele baakali nga sibanyalikha ni khuubalikha ta! Khali lisiina lyeenywe silinyalikhile khuuwawo na khari, namwe bari khuuhela mwawawo mu moni tsase ta.”

²⁰Ari rura khukhwaama mu Babulooni, mutitukhe khu Bakaludaaya! Tsya mulaangilile ilomo yino ni kumwikhoyo, mukikuukuule isi shiibala shoosi! Tsya mulome muri, “Umukasya waakaanguluule umwakaanisi weewe Yakobo[16].”

²¹Buulesa sibwabalyakho ta, abe yakhaba nga aabaraangilila khuukyeendela mu mubiimbi. Niye umweene aaraaka lulwaanda lwaamamwo kameetsi khu lwaabwe, waaraaka lulwaanda kameetsi kaatsukhiliila khuulwaamamwo.

²²Umukasya aloma ari, “Mbaawo lukoosi isi babaandu baboonaki ta.”