Read lumasaaba Isaaya 49 Bible Online

Isaaya 49 - lumasaaba bible

Isaaya 49

¹Rekeeresa buulayi inywe biibala bye aleeyi. Wuliilisa buulayi inywe babaandu babaamenya i aleeyi. Umukasya aanaanga ise nga ishiili khusaalikha ta, niye umweene aanaanga lisiina lyase nga ishiili ni muunda mwa maayi.

²Niye umweene aakhola biilomo bye mu khanwa mwase byafwaana nga lurima lulwooki. Aryo waayimbisa ise mu shiniini she kumukhono kweewe. Niye waayikhola ise nafwaana busa nga khaafumo khakhokiya, kila ambiikha mu sutilo yeewe iye buufumo.

³Aryo anomela ise ari, “Iwe uli umwakaanisi wase Isiraeli, musiiwe nimwo mweesi ifunila shiriifwa.”

⁴Ne ise naaloma ndi, “Naarekaniile busa! Naaraambisile kamaani kaase, ne nga mbaawo she kumukaso sheesi ifunilemo, naluundi mbaawo shiitsilililwa nakhari ta. Ne shonyene ndi, byoosi bibimaamba khusiise bili mu mukhono kw'Omukasya, ni shiwaanwa shase shili isi Wele.”

⁵Ne ari Umukasya umweene uwaamuumba ise mu shisoombo sha maayi wase, khuuba umwakaanisi weewe, khuurumanibwa khuutsya khukobosa Yakobo is'ali, nio ba Isiraeli boosi bakobole babusane is'ali. Umukasya umweene waambeele ise lukoosi, naluundi Wele wase umweene wekyelile kamaani kaase.

⁶Niye aloma ari, “Shili shishiindu shikyeekhe naabi iwe khuuba umwakaanisi wase uutsya khwiisawo bikuuka bya Yakobo, ni khuukobosa abo babaaramawo nga baalamu khu baandu ba Isiraeli. Iseese intsya khuukhwikyelisa iwe khuuba buwaanga isi kamanaambo, naluundi iwe niye isi intsya khuraambisa khuuyila buwonesi bwase isi biibala byoosi byaakama.”

⁷Umukasya nga niye Umuwonesi luundi Umukhosefu wa Isiraeli, aboolela uyo isi balekelesa luukali naluundi isi kamanaambo kekaana, niye uuli umwakaanisi we bawuli, nga amulomela ari, “Bayiinga kane beemikhe khu ngaaki, nikane bakhubone iwe nga ubirawo, Baaraangilisi babaaramile nabo kane beename aasi, lwekhuuba Umukasya, uuli umwiyikinwa, ate nga niye Umukhosefu wa Isiraeli, umweene niye ukhuroboore iwe.”

⁸Sheesi Umukasya aloma nisho shino ari: “Mu mbuka inyene isi samweene ifukiilisa iyaakhila, kane ikhwiilemo. Khu shifukhu shisheene she buwonesi, samweene ikhaakhuyeete. Samweene ikhaakhuliinde, luundi ikhuwaaneyo iwe khuuba ikwangwaani yase isi babaandu. Khuubirira mwiiwe, ikheesewo bushaakha shiibala shino abe shishoonekha, niileyo ishikabile babaandu baasho luundi.

⁹Ikhaalomele baabowe boosi ndi, ‘Rura ibulafu,’ ni isi abo boosi babaali mu shiilima ndi, ‘Rura mubonekhe.’ Nibo bakhaabe kamakheese kaase, baayile bunyaasi khu ndulo khwe kimikhoosi, baryo banyoole bunyaasi buulayi khu ngoongo abe tsitsooma busa.

¹⁰Nibo intsala sikhaabalyekho namwe buulesa khuubalya ta. Ni bukhafu bwe mu mubiimbi, namwe inyaanga sikhaabookhekho ta. Lwekhuuba uyo uwe shiisa shiikali isi bali akhaabaraangilile, aryo abayile aboolese khu sebele tse kameetsi.

¹¹Ikhaakaluse tsinjiinji tsikyele kimikhoosi kye khuukyeendelakho isi bali, Ni kimikhoosi kyase kimibalaayi kikhesutisibwe angaaki e kamatila.

¹²Bona babaandu baase baalala bakheetse khukhwaama aleeyi luukali, ni babaandi bakhaamile kwe ngaaki, babaandi nabo baamile kwe bukwanyaanga, ni babaandi baamile kwe lubeka lwa Sinimu.

¹³Iwe liikulu, niwiimbe kimyeenya lwe kumwikhoyo! Sangaala iwe shiibala! Ni nanywe tsinjiinji tooloosa kimyeenya! Lwekhuuba Umukasya ali khukhwiisamwo babaandu beewe kamaani, naluundi akhaawaambile shiisa abo boosi babaali khuutaambisibwa.”

¹⁴Ne Sayuuni weelamwo ari, “Umukasya waayindekha ise, Umukasya wase waayintsibilila.”

¹⁵Umukasya weelamwo ari, “Ne manya iliyo umukhasi unyala webilila umwaana weewe isi anuunisa? Ilala waalekha khuwaambila shiisa umwaana weewe isi aasaala? Ne abe yakhaba nga bano banyala beebilila babaana baabwe, ne Ise singene ikhwibilile iwe ta!

¹⁶Ne bona ise naaronile lisiina lyoowo mu bikalabo bye kamakhono kaase; na buli imbuka yoosi, shifwaani she kamatikiiyi ka Yerusalemu shaarama mu byambaaso byase.

¹⁷Babaana boowo balikho bayubakilisa khuukobola, ni naabo boosi babaakhakakho khuukhuhesa iwe, bakhaakyeendake bakhururekho.

¹⁸Yinyusa tsimoni tsoowo unyukanyuke ubone, bona basooleli boowo balikho bakobolaka is'uli.” Umukasya aloma ari, “Nga iseese samweene niindi umulamu, ukhaabakwaare bafwaane busa nga bubuuma bwe khukhwisaaha, uryo ukhaabebowelele busa ufwaane nga umweeha nafwaana.”

¹⁹“Abe yakhaba nga shiibala shoowo shaayoonakisibwa luukali naabi, luundi shaalekhebwa awo busa, ilala shikhaabe shikyeekhe naabi lwekhuuba babaandu boowo bakhaabe baakali naabi. Ni baasiku boowo abe babaakhubowa iwe, bakhaakhubeele aleeyi naabi.

²⁰Babaana boosi babaasaalikha nga iwe uli mu mutaambo kumukali mu bubowe, bakheetse bakhulomele iwe mu khuru mwoowo bari, ‘Shiifwo shino shili shikyeekhe naabi, sishikhumala ta, khubalaayisilekho nio khumenyemo buulayi.’

²¹Nio lwanyuma iwe wiyambaase mu mwoyo kwoowo uri, ‘Naanu uwasaalila babaandu bano boosi? Ise naba mu mutaambo kumukali, nga ndi umukuumba nataŋwaali, nayilibwa mu bubowe, naabeeyo senyene; ne naanu ilala uwatsowesa babaandu bano? Iseese naba iyo senyene busa, ne ari babaandu bano boosi bamiile khu mukhoosi shiina?’ ”

²²Ari sheesi Umukasya Wele aloma nisho shino ndi, “Bonakho! Indinyusa kumukhono kwase inaangilile isi kamanaambo, indyo isi babaandu baamwo imbawuutsile kamakhono. Nio nabo baryo benyukhilemo basute basooleli boowo mu bifuba byaabwe babareere is'uli, ni bakhaana boowo babasutile khu mabeka khwaabwe.

²³Bayiinga nibo babaakhaabe ba paapa boowo babaakhulolelela, ni ba nabakyelama baabwe nibo babaakhaabe ba maayi boowo babaakhunuunisa iwe. Nibo bakheenamise kimirwe kyaabwe aasi iburaangisi woowo, baryo bakhoombelese lifukhuulu liliili aasi mu bikyele byoowo. Nio abweene awo nawe umanye uri, Iseese niye Umukasya. Ni naabo babaali ni khuusuubila musiise, sibaliwaambikha tsisoni ta.

²⁴Naanu unyala waawutula khukhwaama mu mukhono kw'omusoolani uwe kamaani, bibiindu byeesi ayaayile khukhwaama mu busoolo? Namwe naanu unyala waamulakila ari alekhuule baabowe beesi awaambile?”

²⁵Ne sheesi Umukasya aloma nisho shino ndi, “Ilala baabowe beesi baasoolani be kamaani abo baawaamba, boosi bakhaalekhuulibwe, ni bibiindu byeesi baarafu baayaaya khukhwaama mu busoolo bikhaakobosebwe. Iseese samweene ikhaasoolane ni naabo babaakhusoolanisa iwe, indyo imbonese babaana boowo.

²⁶Ni naabo boosi babaakhumiinikhilisa iwe, ikhaabakhole beelye tsinyama tse khu mibili kyaabwe babeene. Naluundi bakhaanywe kamafuki kaabwe kabameese nga iviini. Awo nio babaandu boosi bamanye bari iseese niye Umukasya, Umuwonesi woowo, naluundi Umukayi woowo, Ufuurira ilala kamaani uwa Yakobo.”