Read lumasaaba Isaaya 5 Bible Online

Isaaya 5 - lumasaaba bible

Isaaya 5

¹Kane nimbile umukanwa wase kumweenya kukuwaamba khu mukuunda kweewe: Umukanwa wase aaba ni kumukuunda kweewe nga kuli khu lukiingi luteembu buulayi.

²Niye aatsya waalima kumukuunda kweewe ukwo buulayi bubweene, waarusakamwo kamabaale kakaabamwo, lwanyuma waabyaalamwo kimisabibu kikifuura buulayi. Lwanyuma akari mu mukuunda umwo, woombekhamwo kumunaala, waalima lilowo lye khuusuuriramwo iviini. Aryo wekhala waaliinda imbuka iye khuukyesa kimisabibu kikyatokota buulayi yoole, ne sheembi ndi kimisabibu kyeesi aanyoolakho kyaba kyaaluluwa.

³Ari inywe babekhali be mu Yerusalemu, ni babaandu be mu Yuda mweesitsana, ni mukhukhalilewo akari aase ni kumukuunda kwase kwe kimizabibu.

⁴Manya iliwo shishiindu shoosi sheesi ise naakhasikha khuukholela kumukuunda kwase kwe kimizabibu? Ise ninekhala naasuubila indi lwaanisekho kimisabibu kimitokota, shiina shishakila lwaanisakho kimisabibu kikyaluluwa?

⁵Ari lekha imbaboolele sheesi intsya khuukhola kumukuunda kwase kwe kimizabibu kuno: Intsya khufuniaakaka lumako luluulikho, nalwo lukhaaweelewo ilala. Intsya khumenyula kuutikiiyi kwakhwo, lwanyuma indekhuule tsisolo tse mwirome tsikukhaandaakilile.

⁶Intsya khukulekha busa awo kusiimbemwo buunyaasi, nga mbaawo ukukhalila, namwe khuukulimamwo ta. Kukhaabe kumukuunda kukuutsowamu buunyaasi bwa buli saambo ni kamawa. Naluundi kane indakile namufweeli alekhe khuukuroonyesakho ifula ta.

⁷Kumukuunda kwe kimizabibu kw'Omukasya umunyali wa byoosi kuno nikwo liinaambo lya Isiraeli. Babaandu be mu Yuda nibo kimizabibu kikifuura buulayi kyeesi umweene ebyaalila. Niye aasuubila ari baanekho kamatuunda ke bwaŋali, ne waanyoola nga babaandu batsukha busa kamafuki shonyene. Naluundi waasuubila ari kane anyoolekho buukwalaafu, ne waanyoola nga babaandu balila bulili lwe khuukana khuuyeetebwa mu bwaŋali ne nga mbaawo ta.

⁸Nga kumutaambo kwaabanyoolile inywe mumuutsya mwaakula intsu khuuloosela khu ntsu ikiindi, ni liiswa khuuloosela khu liindi! Mushikhola muryo khukhwoolesa ni muwoonamwo babaandu babaandi, mwarama mwenyene mu shibala.

⁹Ne ise naawuliile nga Umukasya uwe kamahe Umunyali wa byoosi akhola shishitsubo, nga aloma ari, “Tsiintsu tsimboofu luundi tsiimiliwu itso, tsikhaabe kamakubili busa, nga mbaawo n'umuundu na mutweela utsilolelela ta.

¹⁰Tsi eeka liikhumi tse kumukuunda kwe kimizabibu kukhaamemwo tsi lita shinaane tse viini tsonyene. Bibiipo liikhumi tse bumiitso tsikhaamemwo shishiipo shitweela shonyene she biikhupake.”

¹¹Nga kumutaambo kwaabanyoolile, abo babenyukha kumutikhinyi bawuuna khuutsya khuweentsa inguuli, lwanyuma baamala bubwiile bwaabwe bwe angoloobe khukhwoolesa mu shilo nga betuukha bibimeesa byonyene.

¹²Mu bifwo byaabwe mweesi banyweela basaahamwo bibimeesa biikali, ni bibikhupa kimyeenya nga kamatuungu, ni tsiindingiti, ni bibisakayisa, atweela ni kimilele; ne nga sibenaanayo khu Mukasya ta, namwe khuumanya shiina sheesi alikhuukhola ta.

¹³Nashiryo babaandu baase batsya mu bubowe, lwekhuuba sibaayimanya ise ta. Babaandu baabwe babaali baakhulu luundi be biriifwa, bakhaafwe intsala, ni babaandu boosi baabusheele bakhaafwe lwe buulesa.

¹⁴Karyo kamakoombe nako kaasamiliile busa, kaaliindiliile khuumila. Abo boosi babaali baakhulu mu Yerusalemu, ni naabo babaali be aasi, ni naabo boosi babemeesameesa, batsya khumilikhila mu bweenemwo bawewo.

¹⁵Babaandu boosi batsya khumiinikhila aasi, na buli muundu yeesi atsya khwiinamilila busa aasi, ni naabo babeyiingayiinga batsya khuswaala busa.

¹⁶Ne Umukasya uwe kamahe Umunyali wa Byoosi aruuyibwa mu bwaŋali. Ni Wele Umukhosefu okesanisa buukhosefu bweewe mu bukwalaafu.

¹⁷Khu shifukhu isho, kamakheese kamaana kalinyoola buunyaasi, ni tsimbusi tsinere ni tsinyana tseene tsilyaayila mu bifwo byeesi baalekhaawo busa.

¹⁸Nga kumutaambo kwaabanyoolile abo babebowelela bibyoonako byaabwe, baabikhweesa ni kimikosi kye buwombesi, abo babaakhweesa bubwoonaki bwaabwe nga babaakhweesa shikaari!

¹⁹Baashuukha baaloma na khulomela Umukasya bari, “Yuubakho khaangu ubekho ni sheesi ukhola khubone! Ifwe khukana khubone sheesi unyala waakhola. Khayo Umukhosefu wa Isiraeli olelese isho sheesi aaŋoonaŋoona khuukhola, lwekhuuba ifwe khukana khumanye nga nishili.”

²⁰Nga kumutaambo kwaabanyoolile abo babalaanga shiibi khuuba shiilayi, ni shiilayi khuuba shiibi! Naluundi balaanga shishiilima khuuba buwaanga, ni buwaanga khuuba shishiilima! Ni khuulaanga isho shishiili shiilulu khuuba shitokota, ni shitokota khuuba shiilulu!

²¹Nga kumutaambo kwaabanyoolile abo babebona babeene khuuba be kamakhula mu moni tsaabwe, baryo bambaasa bari bali bakyesi naabi.

²²Nga kwaabanyoolile abo babaali baarafu naabi mu khunywa bibimeesa, naluundi baaba nga bebuyila musaambo iye khu khuuteekha inguuli.

²³Baryo balya iwoongo baalekhuula umuundu ulikho ni shiibi waatsya, lwanyuma baabirisa buubi uyo ukhalikho ni kumusaango ta.

²⁴Ni nashiryo nga n'ubona kumulilo kwilyebula nga kwoosha buunyaasi, ni buunyaasi bweene bubwoomu nga bwimemula lwe kumulilo, kiryo kimili kyaabwe kikhaabole, ni biimuli byaabwe biniaale biwululukhe.

²⁵Shisheene isho nisho shishiikila lirima ly'Omukasya lyaatindiima luukali isi babaandu beewe, wenyusa angaaki kumukhono kweewe khuubawa shiitaambiso. Tsinjiinji tsitengaasibwa, ni kimilaambo kyaabo babaafwa kisalanisibwa mu nguudo nga n'ubona kamaandu busa. Ne abe yakhaba nga bili biryo, lirima ly'Omukasya siliwawo ta. Bona ashinyusa kumukhono kweewe mu ngaaki akana khukhupa luundi.

²⁶Aryo enyusa likono lyeewe angaaki khuukuukuula kamanaambo ke aleeyi, afuura ifiriimbi khuukalaanga ari keetse khukhwaama ibwaakamilo we shiibala. Nashiryo kane kamanaambo kano keetse nga keruuna busa mu khaangu naabi!

²⁷Mbaawo na mutweela khu nibo uluwa, namwe wetilyaatisa ta. Naluundi mbaawo khu nibo uwungukhila namwe waakona liilo ta. Abe yakhaba ni kimisipi kyaabwe sikikaangulukha ta, ni tsikhoba tse tsingaato tsaabwe sitsikhalikha ta.

²⁸Bufumo bwaabwe bwe mu buyiingo bwamema, ni buyiingo bwaabwe baaburekekhile khaale lwe buusoolo. Bibuutusi bye tsiŋwaaŋwa tsaabwe byahangala busa nga shishuuma, ni kimipiila kye bikaari byaabwe kibotokhelela busa nga imbewo iye shishafuusi.

²⁹Luutiri lweesi beetsa ni nalwo luli lwe kamaani nga n'ubona khubuutsa khwe talanyi. Baryo beetsa baakutuumile busa, baakulukhila tsisaanyi tsaabwe baabayila nga mbaawo umuundu yeesi uunyala waabawonesa ta.

³⁰Shiifukhu isho nga sheetsile khwoola, bakhenyusile khu Isiraeli luwuungu lwe kamaani nga n'ubona khuuwuuma khwe nyaantsa. Umuundu yeesi ulinyusa tsimoni tseewe khuulola shanjelekha, mbaawo shiindu shiindi sheesi alibona ta, khuurusakho shishiilima ni ngunyi; abe yakhaba buuwaanga bulimaliyisibwa lwe kamafuumbi kamamali.