Read lumasaaba Isaaya 50 Bible Online

Isaaya 50 - lumasaaba bible

Isaaya 50

¹Sheesi Umukasya aloma nisho shino ndi, “Ingana untsokese ibaluwa isi nawa maayi woowo nga imuwoona nio arekukhe? Ngana muntsokese babaandu beesi ise nabakulisayo? Shaŋali shili ndi, mwakulisibwa lwe bibyoonako byeenywe. Naluundi lwe bibyoonako byeenywe byeene ibyo, maayi weenywe aawoonebwa waarekukha.

²Lwashiina kila ikhaabawo umuundu yeesi nga ise ni neetsa isi muli? Lwashiina ikhaabawo umuundu uwuntsilamwo nga ni nekhuunga? Inywe mwambaasa muri kumukhono kwase kuli kumwiimbi naabi, sinyala naabawonesa ta? Namwe ise siindi ni kamaani kakaanyala kaabawonesa ta? Iseese indakila busa inyaantsa yoomelela, naluundi iseese niye ulakila tsintsitsi tse kameetsi tsoomelela kara, ni tsinyeeni tsitsiilimwo tsaafwa lwe khuutaamba kameetsi.

³Iseese niye ukwaarisa likulu lyaamaliya ni khuumaliya ukhwo, naluundi naalibiimbakho ni shikwaaro she khuubona kumutaambo.”

⁴Umukasya Wele waambeele ise biilomo byaabo babaali be buuleekele bwe angaaki, nio nase inyale khuumanya isaambo iye khuwooyawooya abo babaaluwile. Umweene niye uwuntsinyusa ise buli kumutikhinyi, waakila naarekereesa naafwaana nga uyo isi balikho baleekela.

⁵Umukasya Wele umweene waantsikuule ise mukhuru mwase, nase ndyo naarekeeresile buulayi naakhuminyaala ta; nashiryo naakhukobolayo inyuma ta.

⁶Ise nawaanayo kumukoongo kwase isi abo babaakhupa ise, nawaanayo ni tsisaya tsase isi abo babaakhweesaka bunwaanwa bwase. Iseese sinashuusa mu moni mwase nebisa isi tsisoni ni khufuutsila kamare ta.

⁷Ne lwekhuuba Umukasya Wele umweene niye uwunjeeta ise, singene imaambisibwe tsisoni ta. Nashiryo indyo ise newaanileyo naakhunisile mu moni mwase nga libaale, naluundi naashimanyiile ilala ndi, singene imaambisibwe tsisoni ta.

⁸Uyo uwukhalilawo ise byaŋali ali aambi ano. Naanu umweene ari ukane eetse khuulomana ni nase? Ari lekha khwiimikhe khulolelanile khubone! Naanu umweene uuli khukhwiitsa khukhuumbaabila ise kumusaango? Lekha eetse khwaakaanane!

⁹Bonakho khane, Umukasya niye uwunjeeta ise! Ari naanu umweene ukane akhalile ise kumusaango? Baasiku baase boosi kane batyenuukhake busa nga shikwaaro shishikorere, bafwaane busa nga beesi tsisilili tsilumakile.

¹⁰Naanu khusiinywe uulimwo khuurya Umukasya, uwuliilisa likono ly'omwakaanisi weewe? Lekha uyo yeesi ukyeendela mu shiilima, nga s'alikho ni buwaanga bwoosi ta, eyikine lisiina ly'Omukasya, naluundi eyikamilile khu Wele weewe.

¹¹Ne ari inywe mweesi babaasa kumulilo, mwekholela bibyaburusa byaakhosesa, mwakyeendela mu buwaanga bwe kumulilo kweesi mwabeene mwiyaburusiile! Sheesi mukhaafune khukhwaama mu mukhono kwase nisho shino: Mulikona aasi nga muli mutaambo kumukali naabi.