Read lumasaaba Isaaya 51 Bible Online

Isaaya 51 - lumasaaba bible

Isaaya 51

¹Umukasya waaloma ari, “Ni mundekeerese inywe babaandu mweesi babaloondelela bukwalaafu, inywe mweesi babaweentsa Umukasya. Ni muwunguuse tsimoni tseenywe khu lwaanda lweesi babaabeetsamwo, mu malowo ke mu lwaanda keesi baabayabamwo.

²Ni mukhebulile Iburayimu kuuka weenywe, ni Sara uwabasaala inywe nga linaambo. Iburayimu aaba mutweela yenyene khu mbuka isi ise namulaangilamwo, ne ndyo naamuwa tsikhabi, waamamwo babaandu baakali busa.

³Ilala Umukasya umweene akhawooyawooye Sayuuni, aryo emikhe mu shisa sheewe aloleleele biifwo byamwo bibyoonakisibwa. Lwanyuma ekyelise liiswa liliili lilyoomu busa libe nga Edeni, ni kumubiimbi kwayo kufwaane nga inimiro y'Omukasya. Kumwikhoyo ni sangaalo bikhaabonekhele mu Sayuuni. Khuyiliimba khwe kimyeenya kye khusiima khukhaawulilikhe.

⁴Ni mundekeerese ise, inywe babaandu baase. Ni mumbuliilise ise, inywe linaambo lyase Isiraeli: Lwekhuuba likaambila likhaarure khukhwaama isiindi, ni khuukhala khwase khwe kimisaango khwa ŋali khukhekyele buwaanga isi kamanaambo.

⁵Bona ise ndi aambi khukhwiitsa imbarusekho inywe kumusaango. Buwonesi bwase bwarurire buli khu ntsila bwiitsa. Kumukhono kwase kwe kamaani kukhaawule kamanaambo mu bwaŋali. Biibala bye aleeyi byoosi bikhaaniindilile ise, biryo bibe nga byeyikinile bunyala bwe kumukhono kwase kwe kamaani.

⁶Ni mwinyuse tsimoni tseenywe mulole mu ngaaki, lwanyuma mwinamise kimirwe kyeenywe aasi khu shibala mwimenielese buulayi. Likulu ilyo likhataamuukhe busa nga lisuusi, ni shiibala shino shikhaawunukhe busa ingubo ikorere naabi. Baryo babaandu be khu shiibala shoosi bakhaafwe busa nga tsisame. Ne buwonesi bwase bukhaaramewo imbuka yoosi, ni bukwalaafu bwase sibukhaawewo nakhari ta!”

⁷Umukasya alooselakho ari, “Ari ni mundekeerese inywe mweesi babaamanyile bye bukwalaafu, inywe mweesi babaali ni kamakaambila kaase mu myoyo kyeenywe. Mukharya lwe khuulekelesa khwe babaandu ta, naluundi mukheyembelela lwe khuukhoma khwaabwe ta.

⁸Lwekhuuba tsisilili tsikhaabalumake busa nga ni tsilumaka ingubo, ni tsinyeende tsikhaabalye nga ni tsilya bubwooya. Ne bukwalaafu bwase bukhaabewo imbuka yoosi; Ni buwonesi bwase bukhaamenyewo biilo ni biilo.”

⁹Siisimukha! Siisimukha! Niwisabikhe ni kamaani koowo, O Umukasya. Yookesanisa kumukhono kwoowo kwe kamaani! Sisimukha ushikhole nga ni washikholatsaka mu bifukhu bye khaale, mu miboolo kikyabira. Akhuba iwe niye uwakhoonya kuusolo Rahabu[17], iwe niye uwawunaka kuusolo ukwo, waakukhalakamwo biipatu ta?

¹⁰Akhuba iwe niye uwaakila kuyaantsa kwomelela kwawamo kameetsi, ate nga niko kaaba kameetsi kamaleeyi naabi? Shiili iwe niye uwatimisa kameetsi kaawawo, waakholamwo intsila nio babaandu babaawonesebwa baabiriramo baakhalisa baatsya?

¹¹Ni babaandu beesi Umukasya umweene ekulila balikobola. Bakheetse benjile mu Sayuuni nga beemba kimyeenya, bakhaabe bakwaarisibwile ni kumwikhoyo kukukhawawo ta khu mirwe kyaabwe. Kumwikhoyo ni sangaalo bikhaababiririrekho naabi, shikile kumutaambo ni khuulila byantsukhe biwewo.

¹²Iseese, ilala ise samweene, niye ubeesamwo inywe kamaani. Nashiryo lwashiina inywe murya abo babaali babaandu buundu busa? Lwashiina murya babaandu babasaalikhana nga babaandu busa, babaali nga bunyaasi?

¹³Isho shabareerera khukhwibilila Umukasya Umubuumbi weenywe, niye uwabalaayisa likulu, waarawo ni kumusiingi kwe shibala. Ari inywe kane mwiloosele muryo buli shifukhu khuuba ni khuurya isi uyo ubamiinikhilisa, buli lweesi kane etsile nga wehaaniileyo ilala khuubahesa? Ne ari buurafu bwooyo umiinikhilisa buli waheena?

¹⁴Mu mbuka njeekhe naabi, abo babaali baabowe bakhaabe baakaangulule; sibakhaafwiile iyo mu kulowo kuleeyi abe kweesi balimwo ta, naluundi sibakhaataambe she khuulya ta.

¹⁵Lwekhuuba ise ndi Umukasya Wele woowo, niye utumbuusa inyaantsa, waakila kameetsi kelyebula luukali. Lisiina lyase ndi Umukasya uwe kamahe, Umunyali wa byoosi.

¹⁶Iseese naareere bilomo byase mu khanwa mwoowo, naluundi nakhubisile mu shiniini she kumukhono kwase. Ise samweene uwabalaayisa likulu, nakhwiikha kumusiingi kwe shibala. Samweene inomela babaandu be mu Sayuuni indi, “Inywe muli babaandu baase.”

¹⁷Siisimukha, siisimukha, yinyukha aasi iwe Yerusalemu! Iwe wanywa khukhwaama mu shikopo she buurafu shishiili mu mukhono kw'Omukasya. Wanywa woolela ilala khu lirima lye aasi abweene, liliikila babaandu baatilyaata busa.

¹⁸Mu basooleli boosi beesi wasaala, mbaamo na mutweela unyala wakhwookesa intsila ta; mu basooleli boosi beesi watsowesa, mbaawo na mutweela unyala waakhuwaamba khu mukhono ta.

¹⁹Biwaangafu bino bibili byaakhukwiilekho, ari naanu ukane akhuwooyawooye? Biwaangafu bino nibyo: khuulekhebwa wenyene ni khuuhela, kumweekho ni busoolo. Ilala naanu umweene ukane akhuwooyawooye?

²⁰Basooleli boowo bakwiile baayengukhakile busa, baakwiile aasi mu nguudo. Bafwaanile busa nga ikhisi iwaambikhiile mu mureko. Umukasya waabatsukhiliilekho burafu bweewe; Wele woowo waabekiitsile.

²¹Ari ni muwuliilise shino inywe babafunile shitaambiso, inywe babaameelile, ne akhuba bari khuumeela lwe viini ta.

²²Wulila sheesi Umukasya Umunyali wa byoosi, Wele woowo, luundi niye uliinda babaandu beewe, aloma ari: “Ari bona, nakhurusilekho shikopo she khutilyaata khukhwaama mu mukhono kwoowo. Simuliilayo luundi munywekho khukhwaama mu shibuumba she burafu ta.

²³Indyo intsya khushira mu makhono kaabo babaali khuubataambisa inywe, abo babaabalomela inywe bari, ‘Ni mukwe aasi khubakyeendelekho.’ Nio muryo inywe mwekyelisa kimikoongo kyeenywe khuuba busa nga liloba, mwafwaana busa nga kumukhoosi khweesi bakyeendelakho.”