Read lumasaaba Isaaya 52 Bible Online

Isaaya 52 - lumasaaba bible

Isaaya 52

¹Siisimukha, siisimukha, iwe Sayuuni; niwikwaarise kamaani wamweene. Kwaara bikwaaro byoowo bibibonekha buulayi, O iwe Yerusalemu, shiriimba shikhosefu. Lwekhuuba babaandu babaakhali babeenjile be mbalu luundi babaali banyaalu sibakhaakhwinjilemo bakhwiibwakale luundi ta.

²Yinyukha aasi, wisisakulekho lifukhuulu abe liliikhulikho, O iwe Yerusalemu abe shishabowebwa, wikhale mu shifwo she shiriifwa. Yikaangululakho kiminyololo abe kikyakhubowa khukhwaamila ilala imumilo, O iwe umukhaana wa Sayuuni.

³Lwekhuuba sheesi Umukasya aloma nisho shino ndi; “Baakhukulisa iwe mu bubowe busa nga mbaawo sheesi baakhusasulakho ta. Ni nase indyo intsya khukhulekhuula busa nga mbaawo tsinusu tse khuukhusasulila ta.”

⁴Lwekhuuba shino nisho ndi sheesi Umukasya Uwe angaaki aloma ari: “Makiboole khaalekho babaandu baase baatsya i Misiri khuumenyayo. Ne ari babaandu ba Asiriya balikho babamiinilisa nibo busa.”

⁵Ari Umukasya umweene alaangilila ari, “Ari shiina shisheene sheesi indi nasho ano? Lwekhuuba babaandu baase baayilibwa busa akhali shishiindu shoosi ta, ni naabo babaabawula nibo babatsekhelela busa. Liryo lisiina lyase lyekyela she khuutsekhelela busa buli mbuka yoosi.

⁶Nashiryo babaandu baase bakhaamanye lisiina lyase. Shisheene isho shikhaakile bamanye bari ise samweene niye ukanikha isi bali bibiindu bino byoosi. Ilala ise samweene niyooyu.”

⁷Nga bibonekha buulayi bikyele by'omurume ureera kamakhuuwa kamalayi, nga eetsa khu njiinji! Bikyele byooyo ureera kamakhuuwa kamalayi ke lukoosi, kamakhuuwa kamalayi kakaalomela Sayuuni kari, “Wele woowo niye Umuwuli!”

⁸Wuliilisa! Baliindi boowo benyusa kamakono kaabwe, nga beembela atweela ni kumwikhoyo, lwekhuuba khu moni tsaabwe khu bweene, babona Umukasya nga akobola mu Sayuuni.

⁹Ari inywe biifwo bya Yerusalemu abe bibyasiimba kumusiru, nimwinyukhile atweela mwiimbe kumweenya kwe sangaalo, lwekhuuba Umukasya weesilemo babaandu beewe kamaani. Umweene waakaanguluule Yerusalemu.

¹⁰Umukasya wokesanisile bunyala bwe kumukhono kweewe kumukhosefu, mu moni tse kamanaambo koosi. Biibala byoosi bibiili aleeyi bikhaabone buwonesi bubwaama isi Wele weefwe.

¹¹Rura! Rura mutsye ibulafu iyo! Ne mukhawaambakho khu shiindu shoosi shishiili shinyaalu ta. Ngana murure akari mu nisho, mwipyeeluuse mwabeene, inywe babaasuta bibiindu by'Omukasya bibiraambisibwa.

¹²Ne simukhaarure nga muyubakilisa ta, naluundi simukhaarure nga mutimaka bari nio muwonese buulamu bweenywe ta. Lwekhuuba Umukasya umweene niye ukhaabaraangilile, naluundi Wele wa Isiraeli umweene niye ukhaabe umuliindi weenywe nga abaloondakho khukhwaama inyuma.

¹³Bonakho, umwakaanisi wase akhaabe buulayi, niye akhaaniinisibwe angaaki, luundi abonekhele angaaki luukali.

¹⁴Ne baakali beyaanga naabi nga ni baamubonakho. Imbonekha ye mu moni mweewe yaba nga yonakisibwile naabi, nga s'ashibonekha luundi nga umuundu ta, abe nga waaloleleele mu moni mweewe, mbaawo umuundu abe unyala khuumanya ari ali umuundu ta.

¹⁵Niye akheyaangise kamanaambo makali. Khu lweewe, bayiinga baakali bakhemikhe nga baasilile busa, bataambe sheesi bakanikha. Lwekhuuba bakhaabone abe sheesi umuundu yeesi akhaababoolelakho ta, naluundi abe sheesi bakhaawulilakho ta, bakhaashimanye buulayi.