Read lumasaaba Isaaya 53 Bible Online

Isaaya 53 - lumasaaba bible

Isaaya 53

¹Kila babaandu beelamwo bari, “Naanu uwafukiilisakho buurume bweefwe? Naanu isi Umukasya aarumbulilakho kumukhono kwe buunyala bweewe?

²Umwakaanisi weewe aatsowa nga afwaana nga shisaala shishitsowa nga shiteembu buulayi, afwaana nga kumuli kukulaanda mwiloba lilyoomu. Niye s'aabakho ni bumiliwu bwoosi, namwe imbonekha iyikoombekha ikila ifwe khwaamulolayo ta, namwe bari waabakho ni buumiliwu bubuukila ifwe khwaamwikoomba ta.

³Niye babaandu baamulekelesa luundi baamwikaana, aaba umuundu we kumutaambo, namutaambo umweene uwamanyiila kumutaambo kweewe. Babaandu baamukhupa kumukoongo baalekha khukana khuumulolakho ta. Aryo aalekelesebwa naabi, ifwe khwalekha khwinaanayo ta.

⁴Ilala niye aayila butsiina bweefwe bwoositsana, aasuta kumutaambo kweesi khwaba nakwo. Ne shonyene ndi ifwe khwambaasa khuri kumutaambo kweewe shaba shitaambiso khukhwaama isi Wele, nga akhupibwa luundi nga afuna khuutaambisibwa khuukali.

⁵Niye baamukhupa kamakuma lwe khuuborokha khweefwe, baamukhupa waaŋuukhaka lwe buubi bweefwe. Khuukhupibwa khweesi baamukhupa khwakhureerera ifwe lukoosi. Baamukhupa tsiinga nio ifwe khunyale khuuwona.

⁶Abe ifwe fweesi, khuli nga kamakheese kakaaborokha kaatsya tsintsila tsitsiindi busa. Ifwe khwaborokha buli mutweela wawaamba kumukhoosi kukweewe busa. Ate nga Umukasya aasuta bubwoonaki bweefwe bwoosi waabumurakho khu niye.

⁷ Baamuminaka luukali luundi baamubirisa buubi naabi, ne niye s'enyusakho kumunwa kweewe waalomakho ilomo yoosi ta. Aafwaana busa nga likheese lyeesi bayila khuutsya khusala, naluundi aasila busa wafwaana nga likheese lyeesi bali khuubekakho bubwooya bwalyo, niye s'enyusakho kumunwa kweewe waalomakho ilomo yoosi ta.

⁸Baamumiinilisaka, baamuyila nga baakhumuwotsesakho ta. Manya iliwo umuundu unyala waalomakho ari niye aabakho ni lisaaye? Lwekhuuba baamwawulakho baamurusa mu shibala she babaandu baalamu. Baamukhupa buubi naabi waakwa ni aasi lwe bubwoonaki bwe babaandu baase.

⁹Baamusiikha mu ŋani nga babaandu baboonaki boosi ni basiikhibwa, aasiikhibwa n'umuundu umuyiindifu mu ŋani yeewe. Abe yakhaba nga mbaawo biituluungu byoosi byeesi aakhola ta, naluundi nga mbaawo bubeeyi bwoosi bweesi niye aakanikha khukhwaama mu khanwa mweewe ta.

¹⁰Ne shonyene ndi khwaba khuukana khw'Omukasya niye khuukhupibwa luundi eŋululuukhe, shiryo shaamureerera kumutaambo kumukali naabi. Ne abe yakhaba nga Umukasya niye uwakhola buulamu bweewe khuuba isaayilo iye bibyoonako, akhaabe ni lisaaye lye babetsukhulu liikali. Niye akhawangaale biifukhu biikali naabi, ni khuukana khw'Omukasya khukholelele mu makhono keewe.

¹¹Niye nga weetsile khubonakho biwaanwa bibyaamile mu khutaambisibwa khwe buulamu bweewe, akhewulile buulayi. Ni lweebyo byoosi byeesi aabiramwo, umwakaanisi wase umukwalaafu akhaanyalisise babaandu baakali khuubalibwila bukwalaafu, niye musaambo iyo, akhaasute bubwoonaki bwaabwe bwoosi.

¹²Ni nashiryo, ikhaamuwe kumukabo kweewe atweela ni babaandu baakhulu. Naluundi aakha akabanane biilayi byoosi atweela ni be kamaani, lwekhuuba aawaanayo buulamu bweewe, waabalibwila atweela ni banabumiinyi. Naluundi lwekhuuba aafukiilisa khukhwitwiikha bubwoonaki bwe baakali, aryo welootsela abo boosi babaaborokha bawonesebwe.”