Read lumasaaba Isaaya 54 Bible Online

Isaaya 54 - lumasaaba bible

Isaaya 54

¹“Yeemba kumweenya, iwe umukhasi umukuumba, iwe umukuumba nataŋwaali, ukhasaalatsakakho babaana ta! Tooloosa kumweenya luukali lulweene, ukhupe liyoombo liikali, iwe ukhaawulilatsakakho butsiina bwe khuusaala ta! Lwekhuuba babaana b'omukhasi namutaambo kane babe baakali naabi, khuufuurisakho b'omukhasi umenya n'umuseetsa weewe.” Isho Umukasya umweene niye ushikanikha.

²Ari balaayisa buubalaayi bwe lisari lyoowo, looselakho ubalaayise shiifwo shoowo mweesi umenya. Iwe ukheesisibasa ta, tsaanuusa tsisoonda tsoowo, luundi uwaangase ibyo bibiibowa.

³Lwekhuuba uli aambi khuubalaaha utsye lubeka lwe kumukhono kumulayi ni khu mukhono kumunyeletsi. Lisaaye lye babaandu boowo likhaatsye liwaambe kamanaambo, batsye bamenye mu biriimba abe bibikhalimo babaandu ta.

⁴Iwe ukharya ta; lwekhuuba s'ukhawaambikhe tsisoni ta. Ukheyembelela ta, lwekhuuba sikhaabeyo luundi khuswaala is'uli ta. Iwe ukhebilile tsisoni tsoosi tsitsakhuwaamba mu busooleli bwoowo, atweela ni kumutaambo kwe bwanamulekhwa kweesi waba nakwo, s'ukhaakushebulilekho na khafwiiti khoosi luundi ta.

⁵Lwekhuuba Umubuumbi woowo niye umuseetsa woowo; Lisiina lyeewe bari Umukasya uwe kamahe ke Mwikulu, umunyali wa byoosi! Uyo uwakhusikula iwe niye Umukhosefu wa Isiraeli, bamulaanga bari Wele uwe shibala shoosi.

⁶Wele aloma ari, “Lwekhuuba Umukasya waakhulaanga iwe khuukobola, nga n'ubona umukhasi uwalekhebwa n'umuseetsa weewe, weetsula kumutaambo mu mwoyo kweewe; nga umukhasi uwakhwaalikha nga ashiili, lwanyuma baamuloba.

⁷Mu mbuka ifwiiti iri, nakhwaantsukha naakhulekha, ne ari ni shiisa shikali naabi, indi khuukhubuusilisa ikhukobose.

⁸Mu lirima liikali lilyaba litindiima nga kumulilo, ise nakhwaantsukha naakhulekhakho imbuka ifwiiti iri. Ne ari mu khukana khwase khukhuukhawawo ta, naakhuwaambiile shiisa.” Shino Umukasya, uwakhusikula iwe, niye ushiloma.

⁹“Bino byoosi biifwaanila ise busa nga bifukhu bya Nowa: Nga ninetsuba ndi kameetsi sikaliilayo luundi keetsule kamile shiibala shoosi ta, indyo ari ikhwitsubila ndi siindilayo luundi khuukhukhalalila iwe ta, naluundi siindilayo luundi khuukhwikiitsa iwe ta.

¹⁰Abe yakhaba nga tsinjiinji tsinyala tsyaasyuukha tsaawawo, ni tsingoongo tsaakoraanawo, khuukana khwase khukhuukhawawo ta singene khukhururekho ta. Ni indakaano yase iye lukoosi ikhaaramewo biilo ni biilo.” Bino Umukasya umweene uwakhuwaambila iwe shiisa niye ubiloma.

¹¹Iwe shiriimba shishabona kumutaambo kumukali, shishabakho mu khuungu ingali, nga mbaawo umuundu na mutweela ukhuwooyawooya ta! Ari bona ise intsya khukhwoombekha iwe bushaakha ni kamabaale ke buukusi bwe angaaki naabi, naluundi noombakhe kimisiingi kyoowo nga inaambisa kamabaale safaya.

¹²Intsya khukhola bisuli byoowo bibyeyiinga mu ngaaki khuuba bye kamabaale kakaamulikhamulikha, ni biilibwa byoowo bibe bye bibyuuma bibinyenanyena, ni kamatikiiyi koowo koosi kabe ke kamabaale ke buukusi bwe angaaki.

¹³Umukasya umweene niye ukhaaleekele basooleli boowo, nabo baryo bakhaabe mu lukoosi lwe kamaani!

¹⁴Iwe ukhaakumisibwe uwaangaalile mu bukwalaafu: Sikhaabeyo luundi khumiinilisibwa khwoosi ta, nashiryo s'ukhaabekho ni she khuurya shoosi ta, khuuterema sikhukhaakhwooleyo na khafwiiti khoosi ta.

¹⁵Nga yeetsile khubawo linaambo lyoosi liliitsa khuukhwibwakala iwe, sishikhaabe ndi ise niye ubarumaane ta. Umuundu yeesi uwiitsa khuureera bituluungu ni nawe, ukhaamuwule buubi naabi.

¹⁶“Iseese niye uwabuumba umubasi we bibyuuma, uyo ufureerera kamaanda keseŋeeŋa kumulilo, lwanyuma waakhola bye busoolo bibyaakhila kumulimo kwabyo. Naluundi iseese niye uwabuumba kamahe kakeetsa khuuhesa.

¹⁷Ne mbaawo she busoolo shoosi shishiliitsa khuukhusoolanisa iwe shaakhunyala ta. Iwe ukhaasilise buli likono lyoosi liirura khukhwaama mu lulomo lulukhutsuntsumilisa iwe. Biilayi bino bili bye babaakaanisi b'Omukasya, ni khuulekhuulibwa khwaabwe khukhaame isi ise samweene. Iseese, Umukasya samweene niye ubiloma.”