Read lumasaaba Isaaya 55 Bible Online

Isaaya 55 - lumasaaba bible

Isaaya 55

¹Umukasya aloma ari, “Isi inywe mweesi babaali ni buulesa, ni mwiitse isi kameetsi kali. Na buli muundu yeesi ukhalikho ni tsinusu ta, yiitsa wiikulile bya busa luundi ulye. Yiitsa wiikulile iviini atweela ni kamabeele bya busa, sibilikho inusu yoosi namwe buukusi bwoosi ta.

²Lwashiina mumalila tsinusu tseenywe khu biindu bibiikhali kumukaati kumweene ta? Lwashiina mumalila kamaani keenywe khu biindu bibikhanyala byabekusa ta. Ni mundekeerese buulayi nio mulye ibyo bibiili biilayi. Naluundi buulamu bweenywe kane bwikhoyele khu bilyo bibibaŋaayila.”

³Umukasya alaangilila ari, “Ni mureke khukhuru khweenywe buulayi bubweene, mwiitse isi ndi. Ni mundekeerese buulayi nio mubewo nga muli baalamu. Indyo nase kane ikhole indakaano yase ikhawawo ta ni nanywe, naluundi kane imbawe inywe khuukana khwase khukhweene, khukhuukhawawo ta, khweesi nasuubisa Dawudi.

⁴Bonakho, naamureerewo niye khukhwookesanisa buunyala isi babaandu baakali, naamukholile niye khuuba umuraangilisi uwe babaandu be kamanaambo.

⁵Bonakho ndi, nawe uryo ukhekhuunge kamanaambo abe keesi ukhaamanyatsakakho ta, ni babaandu be kamanaambo abe babaakhakhumanyakho iwe ta, bakheetse nga batimaka busa khukhwiitsa isi uli, lwekhuuba Umukasya Wele woowo, nga niye Umukhosefu wa Isiraeli, waakhuweele iwe kuriifwa kuukali.

⁶N'uweentse Umukasya nga ashinyalikha khuunyoolekhana, n'umwikhuunge nga ashiili aambi.

⁷Umuundu umubi n'alekhe tsintsila tseewe tsiimbi, ni nooyo ukhali umukwalaafu ta naye alekhe bibyambaaso byeewe bye bumoyaani. Lekha buli mutweela akobole isi Umukasya, ni naye aryo kane abawaambile shiisa. Ilala niibakobole isi Wele weefwe, lwekhuuba niye kane abeyakhile.”

⁸Umukasya umweene aloma ari, “Bibyambaaso byase sibili nibyo bibyambaaso byeenywe ta. Ni tsintsila tsase sitsili nitso tsintsila tseenywe ta.

⁹Nga ni mubona liikulu nga nilyeeyinga mu ngaaki khuufuura shiibala, tsintsila tsase tsiryo tsaayiyiinga khuufuura tsintsila tseenywe, ni bibyambaaso byase biryo bili angaaki naabi khuufuura bibyambaaso byeenywe.”

¹⁰“Mubona ifula ni kamararara nga byaamile mu ngaaki, bikwa khu shibala byaarama khu bweene byaanyirisa liiloba, sibiilayo mu ngaaki ta. Nibyo bibiikila biilime byaarura, byaatsowa buulayi, shaakila byaamakho bumiitso isi umulimi, byaamamwo kumukaati isi uyo uuli intsala khuulya.

¹¹Ni lomo yase irura mu khanwa mwase ifwaana iryo. Ingirumana khuutsya yaakhola, siikobolaka busa iryo ta, ne yoolelesa isho sheesi ingana khuukholebwa, naluundi ibalaaha nga yoolelesa sheesi imba naakirumanile khuukhola.

¹²Inywe mukhaarure ibulafu ni kumwikhoyo, mukyeende nga babaraangilila ni lukoosi. Tsinjiinji atweela ni tsingoongo tsikhaaraangile ibweeni, nga tseemba kimyeenya, ni kimisaala kye mwirome kikhaakhupake mukhono mwakyo!

¹³Mu shifwo she kamawa, kimisaala sayipuraasi nikyo kikikhaarure, mu shifwo she kamarakalu khuurura, kimisaala kikikhawululukha kamasaafu ta nikyo kikikhaarure. Bino byoosi bikhaakholebwe lwe khuureerera khuumanyikhana khuukali isi Lisiina ly'Omukasya, lwekhuuba bikhaabe khaabonelo khakhaabawo biilo ni biilo, kheesi bakhanyala baarusawo ta.”