Read lumasaaba Isaaya 56 Bible Online

Isaaya 56 - lumasaaba bible

Isaaya 56

¹Sheesi Umukasya aloma nisho shino ndi: “Ni mukhalatsake kimisaango kya ŋali, luundi mukhole bye bukwalaafu. Lwekhuuba buwonesi bwase isi muli buli aambi, indyo indi aambi khukhwookesanisa bukwalaafu bwase isi muli.

²Buli muundu yeesi ukhola shishiindu shishifwaana shiri ali ni tsikhabi, uyo yeesi ushiwaamba washoomisila ilala. Naluundi uyo yeesi uliinda shifukhu shase sha Sabato nga shikhosefu, nga s'ashoonakisa ta, aryo nga aliinda kumukhono kweewe khuulekha khukholakho shiibi shoosi ta.”

³Mukhafukiilisakho umuundu umunaambo uweekyela umufukiilisi mu Mukasya khuuloma ari, “Umukasya s'anyala waafukiilisa ise khuuba mutweela khu baandu beewe ta.” Namwe umwomole yeesi khuuloma ari, “Ise ndi kuusaala kukwoomu busa, ukhalikho ni baana ta.”

⁴Lwekhuuba sheesi Umukasya aloma nisho shino ndi, “Isi babaandu babomole babaliinda bifukhu byase bya Sabato nga bikhosefu, abo babaakhalawo khuukhola bibiindu bibiisangaasa ise, luundi baaliinda indakaano yase,

⁵kane imbawe nibo shishebuliso ni lisiina lilifuurira ilala lye basooleli ni bakhaana, mu mukari mu Lisaayilo lyase likhosefu. Lisiina lyeesi ise intsya khubawa lili lisiina lilikhawawo ta, lyeesi umuundu yeesi akhalinyala khuumalawo ta.”

⁶Ni babaandu banaambo boosi babewaanayo babeene isi Umukasya, baaba nga bamwakaanisa niye yenyene, luundi nga bakana naabi lisiina lyeewe, ni khuuba nga bamwisaaya niye yenyene, naluundi baaba nga baliinda shifukhu sha Sabato, nga sibashoonakisa ta, ate nga bali babaandu babaliinda indakaano yeewe,

⁷bano boosi samweene indibareera khu lukiingi lwase lukhosefu Sayuuni, indyo imbawe kumwikhoyo mu ntsu yase iye khuloombelamwo. Ikhaafukiilise tsisaayilo tsaabwe tsintsoshe atweela ni tsisaayilo tsaabwe tsoosi tseesi bareera khu sheeso shase. Lwekhuuba Lisaayilo lyase Likhulu likhalaangibwe liri Intsu iye khuuloomba isi babaandu be kamanaambo koosi.

⁸Sheesi Umukasya Wele, uutsya waabuusilisa waakobosa baamuli ba Isiraeli, aloma ari, Kane imbuuse babaandu babaandi khuutubaasa khu baandu ba Isiraeli.

⁹Inywe tsisolo tsindafu tse mwirome, ni mwiitse mutukhuunye! Ni mwiitse inywe tsisolo tse mu shisaali!

¹⁰Lwekhuuba baaliindi be babaandu baase bali baabofu busa, boosi sibalimo kamakyesi ta, bali nga tsiimbwa tsitsasila busa, sibanyala ni khuubookola ta. Nibo bakana busa khukona aasi nga bafuura liilo nameyirira lilyeene, naluundi nga bali mu khuroora khwonyene.

¹¹Bali busa nga tsiimbwa tse kumuluungo kwe kamaani, baakhalya biilyo sibekura ta. Bali babaayi babaakhamanya ta, bashuukha bakyeenda nga batsya mu ntsila tseesi babeene bekanila, buli mutweela nga aweentsa sheesi anafunamwo.

¹²Buli mutweela akuukuula isi uwasheewe nga aloma ari, “Yiitsa, khwifunileyo iviini khunywe khumeele. Indi nga bwasheele kumukaamba, khukhole nga ni khukholile shaleelo shino, khubeyo ni kamayiiya kakaafuurakho ke shaleelo.”