Read lumasaaba Isaaya 57 Bible Online

Isaaya 57 - lumasaaba bible

Isaaya 57

¹Babaandu bakwalaafu bahela, ne mbaawo na mutweela ushambaasakho mu mwoyo kweewe ta. Babaandu babaarya Wele bayilibwa baawawo, ne mbaawo ushimanyakho ari, Wele umweene niye uyila bakhosefu beewe bano khuubawonesa kumutaambo kukwiitsa ta.

²Umuundu ukyeendela mu khurya Wele aliitsya mu lukoosi, nga weetsile khufwa, alinjila mu shiwolelo shiilayi.

³Ne inywe yiitsa ano, unywe baboonaki boosi, bubwoonaki bweenywe buli nga bwe baalosi, baayeyani, ni bamalaaya.

⁴Naanu umweene isi muli khukhwinyayisa muryo? Naanu isi mutsintsiina luundi mwarusila lulimi ibulafu? Inywe muli babaana be bubwoonaki luundi lisaaye lye buwombesi.

⁵Inywe babaali ni lihefu lilikana bari mwisaayile aasi e kuusaala kumuruumba, ni khukhwikhala aasi a buli kuusaala kukwesyebeeba ni kamasaafu kamakali. Mutsya mwawaanayo basooleli beenywe mu matila, bafwaana busa nga tsisaayilo, ni khuubawaanilayo mu matila kakaali khu ndulo khwe tsinjiinji.

⁶Bifwaani bibiili akari mu mabaale kakaamiliya kakaali mu matila, nibyo kumukabo kweenywe, bibyeene ibyo nibyo byeesi inywe mweroborera. Mutsya mwaabisaaya nga mubireerera biwaanwa bye khuunywa naluundi mwaabiwaanayo bilimwa byeenywe. Inywe mwambaasa muri byeesi mukhola bino binyala byantsikhoyesa ise?

⁷Inywe mwatsya mwaala bulili bweenywe khu lukiingi luleeyi luundi lulweyiinga naabi. Khu bweenekhwo mwaatsya mwawaanayo tsisaayilo.

⁸Mwaabiikha bifwaani byeenywe bye kamanaambo inyuma we kimihaango ni kimilyaango kyeenywe. Muryo nga nimwaandura khusiise mwaba mwaasakulakile bulili bweenywe, mwaniina khu shitaanda sheenywe, mwaashilekha nga shili khwaasye busa. Mwatsya mwaakhola indakaano nga mwiwaanayo isi abo beesi mukana. Mukana naabi khuulolelela bukhuna bwaabwe.

⁹Mwakyeenda mwaatsya nga muyila kamafura isi Moleki, nga muyila biwaanwa biikali bye kamafura kakawunya buulayi. Mwarumana baarume beenywe khuutsya i aleeyi naabi, mwaaba nga mumwiikha aasi i makoombe ibweene.

¹⁰Mwakyeenda lukyeendo luleeyi naabi mwaaluwa, ne simwalomakho muri, “Ne lukyeendo lukhuluwisa busa ta.” Khuukana khuukali khweesi mwaba nakhwo mu buulamu bweenywe khwaakila mwelamo kamaani kamashaakha, nashiryo simwafifitsikha mwaakwa aasi ta.

¹¹Umukasya areeba ari, “Naanu isi murya naabi luundi mweyembelela, shaakila mwaalekha khuba baŋali isiise ta? Naluundi naanu niye ukila mwaalekha khukhuushebulila ise ta, ni shishiindi ndi mwaalekha khukhuuntsibaasakho nakhari ta? Namwe shili ndi lwekhuuba ise nasila busa imbuka indeeyi, kila mukhaabakho ni khuurya khwoosi isi ise ta?

¹²Ari ise kane nokesanise byeesi mulaanga muri bukwalaafu bweenywe ni bikholwa byeenywe, ne nga mbaawo sheesi binabayeetakho ta.

¹³Ari nga mwaaliliile angaaki lwe khuukana buyeeti, khayo bifwaani byeenywe byeesi mwebuusanisila bibayeete khubone! Imbewo busa ikhaabiwuutse ibitamuuse, ni kumuukha busa kukhaabifuure bitamuukhe. Ne umuundu yeesi uwukhola ise khuuba bubwilukhilo bweewe, akhaabe umusikha we shiibala, naluundi niye akhaabe usikhila lukiingi lwase lukhosefu.”

¹⁴Ikhaabewo umuundu uloma ari, “Yoombekha, yoombekha, luundi mutereese kumukhoosi! Ni murusewo byoosi bibiituyisa khu mukhoosi khweesi babaandu baase bakyeendela.”

¹⁵Lwekhuuba sheesi uyo uuli angaaki, luundi uweyiinga aloma nisho shino ndi: Ise imenya mu shifwo shisheyiinga luundi shikhosefu, nga ndi atweela ni naabo babaali ni kimyoyo kikibiiyisa luundi babaali bawolu. Kane ingobosemu kamaani bushaakha mu myoyo kye babaandu bawolu, ni khukhwisamo baandu babebiiyisa kamaani.

¹⁶Lwekhuuba ise singene ikhusoolanisa iwe bifukhu byoosi ta, namwe singene imbelelele awo bari naakhalaale ta. Lwekhuuba ni shiba shiryo, kumwoyo kwa buli muundu kuwamo kamaani, lwekhuuba buli umuundu yeesi ise niye uwamukhola.

¹⁷Iseese naakhalala naabi, indyo naawa umuundu we kumuluungo yuno shitaambiso. Ise nebisa naamururakho, ne niye weloosela busa khuutsya mu ntsila tseewe tse bubwoonaki.

¹⁸Iseese naabona sheesi niye akhola, ne kane imuwonese. Kane imuraangilile imuwooyawooye, intsye mu moni ni khukhwiisamwo abo babaalila kamaani.

¹⁹Isho kane ishikhole nga indeerawo biilomo bye khuruuya mu khanwa mwaabo babaalila mu Isiraeli. Khali ibeelewo Lukoosi, lukoosi isi abo babaali aleeyi ni naabo babaali akhuumbi. Shino Umukasya umweene ubawonesa nibo niye ushikanikha.

²⁰Ne abo babaali bamoyaani bali busa nga inyaantsa iyilyebula ni khuutumbuukha khwe kameetsi, lwekhuuba niyo sinyala yawoleela ta, yikhala nga yiwuutsa eyi ni neeyi nga ihaanya litosi ni bukyaafu khu ndulo.

²¹Siiliwo lukoosi lwoosi isi abo babaali baboonaki ta. Shino Wele wase umweene niye ushiloma.