Read lumasaaba Isaaya 58 Bible Online

Isaaya 58 - lumasaaba bible

Isaaya 58

¹Umukasya aloma ari, “Khupa luwuungu ni kamaani keene koosi, ukhaakamisa ta. Kuukuula ni kamaani keene liyoombo lifwaane nga lye khoombi. Kuukuula uboolele babaandu baase buubi bwaabwe, urumbulile be lisaaye lya Yakobo bubwoonaki bwaabwe.

²Ate nga buli shifukhu nga ni bitsya nga biloondekhana, baba baameentsa ise, bafwaana nga babaakana khuumanya tsintsila tsase. Nibo babonekha nga linaambo lilikana khuukhola bye bukwalaafu, nga baloondelela kamakaambila ka Wele waabwe. Bakana ise imbakholele bibiindu byaŋali, baryo bafwaana nga babaandu babaakana khuuba aambi ni nase.”

³Nibo baloma bari, “Lwashiina ifwe khwabuyile intsala, ne iwe waakhwiinaanayo ta? Lwashiina ifwe khwewosele mu moni tsoowo, ne iwe ufwaana nga ukhaaboone ta?” Umukasya naye aloma ari, “Ne bona nase imbeelamwo ndi, Inywe khu shifukhu khweesi mubuyila intsala, muba mwiweentsela busa bibibasangaasa mwabeene, mweelayo mwaatsya mwaamiinilisaka baraambi beenywe!

⁴Ne shiyaangisa ndi khuubuya intsala khweenywe khuli busa khwe khuulomana ni khuusokosana mwabeene, muryo mwaakhupana bifuusi. Nashiryo mukhubuya ntsala khweenywe nga ni mukhola khu mbuka yino muryo, likono lyeenywe silinyala lyawulilikha mwikulu ta.

⁵Ari yireeba, khuno nikhwo khuubuya ntsala khweesi ise narobora, shifukhu khweesi umuundu erusilayo wewosa nga wewunamiile? Mwambaasa muri shili busa shifukhu khweesi umuundu ewunamila kumurwe kweewe wafwaana nga lukholo nilwiwunamila nga imbewo iwuutsa? Namwe shili busa khuukona aasi khu sawu tsa makoongwe nga mwewakhile likokhe? Inywe shino nisho sheesi mulaanga muri khuubuya intsala? Mwambaasa muri shifukhu nga isho shinyala shekhoyesa Umukasya?”

⁶Indi luundi waaloma ari, “Khuubuya intsala khweesi ise narobora nikhwo khuno: Khuukaangulula abo babaabowebwa akhali bwaŋali ta, Khuukaangulula kimikosi kimisiro abe kikyababowa. Khuulekhuula baabowe babe baakaangulule, ni khuurusawo kiminyololo abe kikyabowa babaandu.

⁷Khuubuya intsala sikhuli nikhwo khuukabanana biilyo byoowo ni naabo beesi intsala ilya, Sikhuli nikhwo khuuwa buukono isi abo babaakhali ni ekhukona ta, namwe nga waaboone umuundu uuli bukhuna, waamuwa she khuukwaara ta? Naluundi siwaakha khukhwiibisa khu balebe boowo waalekha khuubawa buyeeti ta.

⁸Nio isho shikile buwaanga bwoowo bukhose bufwaane nga antsye ni bubuluukha kumutikhinyi, ni khuwona khwoowo kane khwiitse khaangu naabi. Bukwalaafu bwoowo kane bukhaakhuraangilile iwe, ni shiriifwa sha Wele kane shikhuloondekho nga shikhwaama inyuma.

⁹Nio lwanyuma kane wikhuunge, n'Umukasya kane akhwiilemo, kane wilootse, ni naye kane akhwiilemo nga aloma ari, ‘Ise niyooyu, indi ano.’” “Iwe uli ni khuurusawo shisutwa shiisiro she khuumiinilisa babaandi, naluundi waakamise khukhwookeselela babaandi lulwaala, ni khuukanikha bye kamakuto.

¹⁰Iwe nga wewaanileyo wamweene lwe khuuliisa abo babaali ni ntsala, ni khuuyeeta abo babaataambisibwa; Buwaanga bwoowo bukhaamulikhe mu shiilima, ni shishiilima shishikhwibotokheleele iwe, shikhaakhose shifwaane busa nga kumuumu kwe mwihaangilwe.

¹¹Aryo Umukasya umweene akhaakhuraangilile iwe biilo byoosi, akhwikuse iwe nga akhuwa bibiindu bibyaakhila n'uba nga ukyeendela mu shibala shishoomu, naluundi akhuwaangase kamakuumba koowo. Iweewe ukhaafwaane busa nga kumukuunda kweesi baatsukhiliila kameetsi buulayi, ufwaane nga isebele iye kameetsi iyikhala irubura kameetsi.

¹²Batweela khu baandu boowo babeene nibo babaakhoombekhe bushaakha biifwo bye kamawuumbu abe bibyasiimbamo bunyaasi, mukhoombekhe muniinise kimisiinji abe kikyamenyawo khuumala kimiboolo kimikali. Uryo ulilaangibwa khuuba uwoombakha bushaakha wesawo kamatikiiyi kakaafuniaakikhaka, naluundi umuundu uwisawo bushaakha kimikhoosi kye mu shiriimba atweela ni bumenyo bwamwo.”

¹³Umukasya weloosela waaloma ari, “Siinga iwe ushuukhakho buulamu weliinda, waalekha khufuniaaka bye shifukhu sha Sabato ta, naluundi waalekha khukhola nga wamweene niwikanila busa khu shifukhu shikhosefu ta; Naluundi iwe siinga uyila shifukhu sha Sabato khuuba she sangaalo, ni shifukhu sh'Omukasya khuuba she shiriifwa; Naluundi siinga iwe ushiisamwo lukoosi waalekha khuutsya mu ntsila tsoowo busa, uryo waalekha khukhola nga niwikanisa busa ta, namwe khuukanikhaka bilomo byeesi unyoola ta;

¹⁴Uryo kane unyoole kumwikhoyo mu Mukasya, ni nase kane ikhukhole iwe ube uwe shiriifwa nga n'ukyeendela angaaki khu shibala; naluundi kane ikhwikuse ni bye buusikha bweesi nasuubisa kuuka woowo Yakobo.” Bino byoosi Umukasya umweene niye ubikanikha.