Read lumasaaba Isaaya 59 Bible Online

Isaaya 59 - lumasaaba bible

Isaaya 59

¹Ilala kumukhono kw'Omukasya sikwaayimbiya nio bari kukhaasikhe khuuwonesa ta, namwe niye s'ali umumiinyi we mu maru nio waalekha khuubawulila ta.

²Ne bibyoonako byeenywe nibyo bibiibaawukhanisile inywe ni Wele weenywe. Naluundi lwe bibyoonako byeenywe ibyo, shaakilile waabeebisilekho, singene abawuliilise nakhakyeekhe ta.

³Kamakhono keenywe kaayitsulakho kamafuki lwe bubwiiri, ni tsintsala tseenywe tsetsuulekho bumoyaani. Kiminwa kyeenywe kyaayitsulamwo buwombesi bwonyene, ni tsinimi tseenywe tsikanikha biilomo bibiikhali byaŋali ta.

⁴Mbaawo umuundu na mutweela uwinaanayo lwe bwaŋali mu misaango ta, naluundi mbaawo utsya khuuwaaba kumusaango mu ŋali ta. Boosi beyikina tsikhaando tsitsikhalimwo ta, bakanikha bye bubeeyi byonyene. Baahesa bisoombo bye buraambi buubi, lwanyuma basaala shishoonako.

⁵Nibo bakoneleela kamaki kaalula tsindemu, naluundi babowelela tsimbubi tse kamabubi. Buli muundu yeesi uulya matweela khu kamaki kaabwe afwa bufwi, na buli litweela khu maki ako lilyatikha, mwaamamwo indemu.

⁶Tsimbubi tsaabwe tseesi babowelela sitsaamamwo shikwaaro she khukhwibiimba ta, babaandu sibanyala bebiimba bibyaamamwo ta. Buuraambi bwaabwe buli buraambi bwe bubwoonaki bwonyene, naluundi baamanyikhana lwe bituluungu byonyene.

⁷Bikyele byaabwe bitimiilila khaangu naabi khuutsya khukhola bibiindu bye bubwoonaki, baryo batsya baanguyilisa naabi khuukhoonya babaandu babaakhalikho ni kumusaango ta. Bibyambaaso byaabwe bili bye bubwoonaki bwonyene. Kumutaambo ni khuuhela bibaloondelela mu ntsila tsaabwe.

⁸Nibo sibamanyakho kumukhoosi kwe lukoosi ta, naluundi mu ntsila tsaabwe mbaamo bwaŋali bwoosi ta. Tsintsila tsaabwe baatsikyelisa kimikhoosi kikyaborokha, mbaawo umuundu na mutweela ukikyeendelakho uulifuna lukoosi ta.

⁹Nashiryo khuukhala khwe kumusaango khukhuuli khwa ŋali, khuli aleeyi naabi ni nafwe, naluundi sikhumanyatsakakho bukwalaafu nga ni bufwaana ta. Khukhakakho naabi khuuweentsa buwaanga, ne khunyoola shishiilima shonyene. Khuweentsa buukhose isi buli, ne khukyeendela mu biniini bye kumutaambo byonyene.

¹⁰Khuryo khwabaaba khu matikiiyi nga babaandu babaabofwaala tsimoni, nga khuweentselesa e khuubirira nga babaandu babaakhali ni tsimoni ta. Khukyeenda khuruukaruka busa mu nyaanga tse mwihaangilwe khwafwaana uri khukhuuli mu shiilima. Akari mu baandu baalamu khufwaana busa uri babaali baafu.

¹¹Fweesi khukyeenda khubuutsa busa nga bibulukhu, khwewuumila busa ni kumutaambo kumukali nga kamawuusi. Khuweentsa ikhala iye kumusaango iya ŋali ne nga sikhukinyoola ta. Khuweentsa isi buwonesi buli, ne nga buli aleeyi naabi ni nafwe.

¹²Lwekhuuba bibyoonako byeefwe byebuungile naabi byetsuule mu moni tsoowo, naluundi bubwoonaki bweefwe bubweene bukhwookesanisa busa. Lwekhuuba bumoyaani bweefwe buli ni nafwe, ifwe khwaayimanyila ilala buubi bweefwe.

¹³Ifwe khwaaminyaala luundi khwaayikaana Umukasya. Khwashuukha khwakhupa Wele weefwe kumukoongo, nga khwikhala khuyiiya luundi khukhola bye khuumiinikhilisa. Lwanyuma khwaaba nga khukanikha biilomo bye bubeeyi byeesi kimyoyo kyeefwe kiyiiya.

¹⁴Babaandu bakhaandisa ikhala iye kimisaango iyaŋali, ni bukwalaafu babubona nga bubali aleeyi naabi. Bwaŋali bwaakwa aasi mu mikhoosi kye mu shiriimba, ni butsalaafu sibunyala bweenjilamwo ta.

¹⁵Ilala bwaŋali bwaakoraana bwaaweelawo ilala, n'umuundu yeesi ukhakakho khuulekha buubi bamusoolanisa. Shino Umukasya aalola, ne nga waashiboone shamukhalasa naabi, ne ate nga mbaawo isi bwaŋali bubonekhela ta.

¹⁶Shamwiyaangisa naabi khuubona nga mbaawo umuundu na mutweela unyala khukhwiitsa ayeete ta. Isho shaakila waraambisa kumukhono kweewe kumweene khuureera buwonesi, ni bukwalaafu bweewe bubweene bwaamutikiya.

¹⁷Umweene aakwaara bukwalaafu nga she khukhwikhiinga mu shifuba, ni ikuutwa iye buwonesi khu murwe kweewe. Aryo wakwaara ni bikwaaro bye khukhwiliyaasa, wokesanisa lirima liikali.

¹⁸Aryo akheliyaase baasiku beewe khusiintsila khu buraambi bwaabwe buubi. Lirima lyeewe likhaakwiile baasiku beewe ni naabo boosi babaamubiiyila niye. Akhaaliyile ni bisiintsa bye shibala bibiili i aleeyi byeene.

¹⁹Khukhwaama ibukwanyaanga, babaandu bakhaarye lisiina ly'Omukasya lye shiriifwa; ni bwaamanyaanga shiriifwa sheewe shikhaabonekhe. Lwekhuuba akheetse alyebukha busa nga kameetsi kaketsuule, kakaali khuutimisibwa ni mbewo y'Omukasya inyene.

²⁰“Aryo nio lwanyuma uyo Usikula eetse isi Sayuuni, abakule abeeseyo, isi babaandu ba Yakobo babebiiyisa baalekha bibyoonako byaabwe.” Shino Umukasya umweene niye ushikanikha.

²¹Umukasya waaloma ari, “Ne khu lwase eyino niyo indakaano yase ni nabo. Umwoyo wase uuli khusiinywe s'akhaabarurekho ta, ni biilomo byase byeesi indeere mu khanwa mweenywe sibikhaabaruremo ta. Biryo bikhaarame ni khu minwa kye babaana beenywe, ni kye babaana be babaana beenywe, biloosele biilo ni biilo.”