Read lumasaaba Isaaya 6 Bible Online

Isaaya 6 - lumasaaba bible

Isaaya 6

¹Yaba mu mwiiko kweesi umuyiinga Uziya aafwiilakho, isi ise nafunila khuubonekhelwa khukhwaama isi Umukasya. Umukasya aaba wekhaale khu shitsoloŋo shishaba nga shili angaaki luukali, ni shiikwaaro sheewe shaba shiitsula Lisaayilo Likhulu lyoosi.

²Aabawo Baseraafi[2] babaaba nga baamwibotokheleele tsimbeka tsoosi, buli mutweela nga ali ni tsindaaha tsisesaba. Nga tsindaaha tsibili batsibiimba mu moni mwaabwe, ni tsitsiindi tsibili nga batsibiimba khu bikyele byaabwe, ni tsitsiramile tsibili nga batsiraambisa khuupamburukha.

³Baseraafi bano baaba nga balikho balaangilila ni kamakono ke angaaki, nga buli mutweela alookha isi uwashe, nga baloma bari, “Umukhosefu, Umukhosefu, Umukhosefu, Umukasya uwe kamahe, Umunyali wa byoosi, ali Umukhosefu! Shiibala shoosi shetsuulemwo shiiriifwa sheewe.”

⁴Ni baaba nga benyusa kamakono kaabwe angaaki baryo, liiyoombo lyaabwe lyaakila Lisaayilo Likhulu lyayeŋaana khukhwoola aasi khu musiingi kwalyo, ni shishoombekhe shoosi shetsulamwo lisuusi.

⁵Lwanyuma kila ise nilomela samweene ndi, “Kumutaambo kwaanyoolile! Lwekhuuba ise ndi umuundu umwoonaki. Ise ndi umuundu uwe kiminwa kikiikanikha bibikhaakhila ta, naluundi imenya akari mu baandu babaakanikha biibi byonyene. Ne ate bona ise naboone Umuyiinga, Umukasya uwe kamahe, Umunyali wa byoosi!”

⁶Lwanyuma kila mutweela khu baseraafi apaamburukha weetsa isiindi, nga waasutile lilyaanda lye kumulilo mukhono mweewe, lyeesi aabukula nga araambisa luwani khukhwaama khu sheeso.

⁷Aryo waatiila lilyaanda lye kumulilo lino khu minwa kyase, lwanyuma waaloma ari, “Bona lilyaanda lino lyaatiilile khu minwa kyoowo. Ari buumoyaani bwoowo bwaarusibwilewo, ni bibyoonako byoowo byoosi naakhwiiyakhiile.”

⁸Lwanyuma naawulila Umukasya tsana nga aloma ari, “Ari naanu isi intsya khurumana nga umurume wase? Naanu umweene ukane akhutsiile?” Kila ise niilamwo ndi, “Ise niyooyu. Indumane ise, kane intsye!”

⁹Kila aloma ari, “Tsya uboolele babaandu bano uri, ‘Khuurekeeresa kane mureekerese, ne singene mumanye ta. Khuulola kane mulole, ne mbaawo sheesi kane mwiyikemo ta.’

¹⁰Tsya ukhunise naabi kimyoyo kye babaandu bano. Ubakhole bafuundise kamaru kaabwe ke khuuwulila, baabiimbilile tsimoni tsaabwe. Musaambo iyo, singene babone ni tsimoni tsaabwe ta, naluundi singene bawulile ni kamaru kaabwe ta, namwe bamanye ni kimyoyo kyaabwe ta. Siinga bakhola baryo, banyala baashuukha, baakobola isiindi, nio bawone.”

¹¹Kila imureeba ndi, “Umukasya, ne shino kane shibe shiryo khukhwoolesa liina?” Naye waantsilamwo ari, “Khukhwoolesa nga biriimba byaaramile busa, nga mbaamo babaandu ta, tsiintsu tsaabwe nga tsili kamakubili busa, ni liinaambo lyaabwe lyoosi lyapaŋaalile awo busa.

¹²Shino shikhaakholikhe nga naasiindikhilisile babaandu bano boosi khuutsya mu shibala she aleeyi naabi, nio liiswa lyaabwe lirame awo busa nga mbaawo ulimo ta.

¹³Abe mu shibala isho mwakhaliramamwo umuundu mutweela khu likhumi, umweene uyo baliitsya bamuhese. Ne nga n'ubona sitsikhi she kuusaala ni shiramawo nga baamalile khuurema kuusaala, batweela khu baandu baase baarobore bakhaaramewo.” Shitsikhi shino shookesanisa indakikha imbyaakha iye babaandu ba Wele.