Read lumasaaba Isaaya 60 Bible Online

Isaaya 60 - lumasaaba bible

Isaaya 60

¹Yinyukha aasi, yaaburukha! Lwekhuuba imbuka iye buwaanga bwoowo yoolile. Ni shiriifwa sh'Omukasya ari shilikho shikhwaaburukhila iwe.

²Lwekhuuba ari lola ubone shishiilima nga ni shibiimbiliile shiibala shoosi, naluundi shishiilima namukoto sheetsiile babaandu boosi. Ne isi iwe, Umukasya kane akhwaaburukhile, ni shiriifwa sheewe kane shibonekhele khusiiwe.

³Kamanaambo koosi kane keetse isi buwaanga bwoowo; ni bayiinga nabo bakheetse isi bukhose bububonekhela khusiiwe.

⁴Yinyusa tsimoni tsoowo, unyukanyuke ubone, babaandu boosi baabuusaane atweela balikho beetsa is'uli. Basooleli boowo balikho beetsa nga baama aleeyi, ni bakhaana boowo bakheetse nga baabameemile khu koongo.

⁵Nio lwanyuma nga waababoone, umweemweekhe busa, ni kumwoyo kwoowo kukhaasangaale luundi kuniinaniine kumwikhoyo, lwekhuuba buyiindifu bwe khu nyaantsa tsimboofu, bukhaareerebwe is'uli. Bakhaakhureerere iwe buyiindifu bwe kamanaambo kamakali.

⁶Tsiŋamila tsingali tsinyene tsikheetse khu shaalo shoowo, tsiŋamila tsisooleeli khukhwaama i Midiani ni Efa. Bakhaatsireere is'uli khukhwaama i Sheba nga tsaasutile izaabu ni bubaane, nga babaatsireera balaangilila bye khuruuya Umukasya.

⁷Bibyaayo byoosi bye mu Kedari bikhaareerebwe is'uli, ni tsimiiku tse Nebayoosi tsikhaawaanibweyo khulwoowo khu byeeso byase. Ise ikhaabifukiilise nga biwaanibwayo, indyo ikhole Lisaayilo lyase Likhulu khuuba lye shiriifwa.

⁸Ne banaanu bano beesi imbona batima nga namufweeli mu ngaaki, naluundi bapamburukha nga kamawuusi kakaatsya mu biswi byako?

⁹Lwekhuuba bibala bye aleeyi bikhaandoleleele ise lwe buyeeti, ni tsimeeri tse Tarushiishi nitso tsitsikhaabe iburaangisi ibweene, nga tsireera basooleli boowo khukhwaama i aleeyi, nga tsaasutile ni feetsa atweela ni zaabu. Bino bikhaabe lwe shiriifwa sh'Omukasya Wele woowo, uuli Umukhosefu wa Isiraeli, lwekhuuba niye ukhukwaarisile iwe shiriifwa shiikali.

¹⁰Babaandu banaambo nibo babaalikhwoombekhela biriimba byoowo, ni bayiinga baako nibo babaakhaabe babaakaanisi boowo. Lwekhuuba abe yakhaba nga nakhukhupa naabi naakhuhesa mu lirima liikali, ne ari mu bweela bwase buukali, intsya khukhwookesanisa shiisa shase.

¹¹Biilibwa byoowo bikhaarame nga bili khwaashe kumuusi ni mu shilo, nga sibiikalibwawo ta, lwekhuuba babaandu bakhaabe nga bakhureerera buyiindifu bwe kamanaambo. Bayiinga baako bakheetse nga baabaraangiliile busa khukhwiitsa.

¹²Lwekhuuba linaambo namwe buyiinga bubuukhaalobe khuukhwakaanisa iwe, bukhaahele; kamanaambo kakaafwaana karyo kakhoonakisibwile ilala.

¹³Shiriifwa sha Lebanooni shikhaakhwiitsile iwe shibe shishoowo, Kimisaala sayipuraasi, ni payini, nikyo kikikhaamiliise Lisaayilo lyase; kikhaaweese shiifwo mweesi isaamba bikyele byase lukoosi.

¹⁴Basooleli be babaandu babaakila iwe waabonabona, bakheetse nga bewunamiile busa kimirwe kyaabwe mu moni tsoowo. Ni naabo boosi babaakhulekelesa iwe bakheetse bakwe aasi mu bikyele byoowo. Bakhaakhulaange lisiina bari Shiriimba sh'Omukasya, Sayuuni uw'Omukhosefu wa Isiraeli.

¹⁵Abe yakhaba nga baakhulekelesa luundi baakhubiyila, nga mbaawo umuundu na mutweela ukyeenda waabirira mu bifwo byoowo ta, ikhaakhumiliise iwe ube umumiliwu myu biilo byoosi, wikyele kumwikhoyo kwe kimiboolo ni kimiboolo.

¹⁶Iwe niye ukhaanywe kamabeele khukhwaama mu manaambo kakaandi, ufwaane nga umwaana unuuna khu mabeele ke ba nabakyelama be mu buyiinga. Nio lwanyuma iwe wiitse umanye uri Iseese Umukasya niye Umuwonesi woowo, naluundi niye Uwakhusikula iwe, Umunyali uwa byoosi uwa Yakobo.

¹⁷Ikhaashuusanisemwo mu shifwo sha buroonzi, ikhaareere izaabu, mu shifwo sha ayoni ikhaareere ifeetsa. Mu shifwo she kimisaala, ikhaareere buroonzi, ni mu shifwo she kamabaale, ikhaareere ayoni. Ikhekyelise lukoosi khuuba umuraangilisi woowo, ni bukwalaafu bukhaabe nibwo umuwuli woowo.

¹⁸Bituluungu sibililayo luundi khuuwulilikhakho mu shibala shoowo ta, kumutaambo ni khuubonabona khwe buusoolo sikhulibakho luundi mu linaambo lyoowo ta. Buwonesi bukhaakhwibotokhelele nga kamatikiiyi, ni khu bilibwa byoowo ilibawo khuruuya khwonyene.

¹⁹“Inyaanga shiili niyo ikhaakhuwe buwaanga kumuusi ta, namwe kumweesi khukhuuwa bukhose shiilo ta. Lwekhuuba Umukasya umweene niye ukhaabe buwaanga bubukhawawo ta, naluundi Wele woowo niye ukhaabe shiriifwa shoowo.

²⁰Inyaanga iye buwaanga bwoowo sikhaakwe ta, namwe kumweesi kukuukhuwa bukhose sikukhaamaliye ta. Lwekhuuba Umukasya umweene niye ukhaabe buwaanga bwoowo bubukhawawo ta. Bifukhu byoowo bye kumutaambo bikhaakame.

²¹Nio lwanyuma babaandu boowo babe bakwalaafu, babe baasikha be shiibala biilo ni biilo. Nibo bali shisina she kuusaala sheesi samweene nabyaala, ni kamakhono kaase kameene nio bakile ise ifune shiriifwa.

²²Babaandu bakyeekhe musiinywe bakhekyele bikana ni bikana, babaandu babaali bakyeekhe bari bakhekyele linaambo lye kamaani. Khu mbuka inyene indayi nga yoolile, samweene ikhaakile shishiindu shino shikholebwe mu bwaangu naabi.”