Read lumasaaba Isaaya 61 Bible Online

Isaaya 61 - lumasaaba bible

Isaaya 61

¹ Umwoyo w'Omukasya Wele ali khusiise, lwekhuuba waayindobora ise khuureera kamakhuuwa kamalayi isi abo babaali bataambi. Waayinduma ise khuukobosamwo babaawetsekheleele kamaani, ni khuukuukuula khuulekhuulibwa isi abo babaali baabowe, ni khuukhwikulilawo abo babaali mu mapuusu.

²Niye waayinduma ise khuukuukuula kumwiiko kw'Omukasya kwe khuufukiilisibwa isi ali, ni khuulaangilila shifukhu sha Wele she khuukhalilakho baasiku beewe kumusaango, ni khukhwiisamwo kamaani abo boosi babaali mu mutaambo.

³Isi abo boosi babaali mu mutaambo be mu Sayuuni, akhaabawe liyabi lye bumiliwu mu shifwo she khuuba mu likokhe, abawe kamafura ke kumwikhoyo mu shifwo she kumutaambo, abawe shikwaaro she khuruuya mu shifwo she khuutaambataamba. Baryo nio balaangibwe kimisaala kye bukwalaafu, kyeesi Umukasya umweene aabyaala khukhwookesanisa shiriifwa sheewe shiikali nga ni shili.

⁴Babeene bano nibo babaakhombekhe bushaakha biifwo bye khuumenyamwo biikhale bibyafunikhaka, ni khuuŋoona bushaakha biriimba byeesi baafuniaaka, abe yakhaba nga byaayonakisibwa mu miboolo kimikali.

⁵Babaandu banaambo nibo babaakhaayise bibyaayo byeenywe. Babeene abo nibo babaakhaalime kimikuunda kyeenywe baakile ni tsinimilo tseenywe tse kimisabibu.

⁶Ne inywe mukhaalaangibwe basaayi b'Omukasya, babaandu bakhaabalaange khuuba babaakaanisi ba Wele weefwe. Inywe mukhaalye buyiindifu bwe kamanaambo, naluundi mwikanile naabi mu buyiindifu bwaabwe bubweene.

⁷Mu shifwo she khuuwaambibwa tsisoni ni khuuswaala, babaandu baase bakhaafune shiriifwa she kimiluundi kibili. Mu shifwo she kumutaambo bakhaafune kumwikhoyo mu busikha bwaabwe, baryo bakhupisemo kimiluundi kibili bye buusikha bwe liiswa lyaabwe, ni kumwikhoyo kukukhawawo ta kukhaabe kukwaabwe.

⁸“Lwekhuuba ise Umukasya sheesi ingana nibwo bwaŋali. Imbiyila naabi bunuuli ni khuukhola bubwoonaki. Mu bwaŋali bwase, ikhaasasule babaandu baase lwe khuubonabona khwaabwe, indyo ikhole ni nabo indakaano iye biilo ni biilo.

⁹Babetsukhulu baabwe bakhaamanyikhane naabi mu manaambo, ni lisaaye lyaabwe likheesibwemwo lukoosi mu baandu baakali. Buli muundu yeesi ukhaababonekho akhaabamanye ari nibo babaandu beesi Umukasya aawa tsikhabi.”

¹⁰Ise netsuule kumwikhoyo kumukali naabi mu Mukasya! Kumwoyo kwase kwikhoyela mu Wele wase. Lwekhuuba niye wangwaarisile ise ni bikwaaro bye buwonesi, waamiimbakho ni kaanzu iye bukwalaafu, nga n'ubona umusaani uutsya khukhwa umweeha ni esabikha bikwaaro biimiliwu, namwe nga umweeha ni esaaha bubuuma bwe lisuno.

¹¹Lwekhuuba nga liloba nilirusa bilime khukhwaama aasi, naluundi nga kumukuunda nakwo nga ni kukhola byeesi bamiitsilemwo byaarura, Umukasya naye aryo akhaakile bukwalaafu bweewe bwirurukhilile isi kamanaambo ke mu shibala, ni khuuruuyibwa khweewe khukheyokeselele isi kamanaambo koosi.