Read lumasaaba Isaaya 62 Bible Online

Isaaya 62 - lumasaaba bible

Isaaya 62

¹Lwe khuukana khuukali isi Sayuuni singene isile busa ta, ni khulwa Yerusalemu, singene isililikhane busa ndyo ta. Singene isile busa ta khukhwoolesa nga bukwalaafu bweewe bwaakhoseleele nga n'ubona antsye nibubuluukha kumutikhinyi, ni buwonesi bweewe butsase nga lumuli lwe kamaani.

²Kamanaambo koosi kakhaabone bukwalaafu bwoowo, ni bayiinga boosi be shiibala bakhaabone shiriifwa shoowo shiikali isho. Awo nio iwe utyuukhibwe lisiina lishaakha lyeesi kumunwa kw'Omukasya umweene kulirumbula.

³Uryo wikyele liyabi lye shiriifwa mu mukhono kw'Omukasya, ube ikuutwa iye bukhulu nga uli mu shikalabo sha Wele woowo.

⁴Mbaawo umuundu uuli khulaangakho luundi ari “Iwe uli shiriimba shishalekhebwa ta[18]”. Namwe mbaawo uuli khulaanga ari “Shibala shishasiimba bunyaasi ta[19]”. Ne lisiina lyoowo balikhulaanga bari, “Shiriimba shishikhoyesa Wele[20]”, ni shibala shoowo bashilaange bari “Umweeha wa Wele[21]”, Lwekhuuba ari Umukasya umweene akhwikhoyela iwe, ni shibala shoowo shikhaabe umweeha weewe

⁵Nga n'ubona umusaani umuhele ni eyilila umukhaana indungubaasi, ni basooleli boowo baryo nabo bakhewaanileyo ilala is'uli. Nashiryo Wele akhwikhoyele iwe shifwaane nga n'ubona umuseetsa ni ekhoyela umweeha weewe.

⁶Iwe Yerusalemu, ise naareere baaliindi khu matikiiyi koowo; babeene bano kumuusi kwoosi ni shiilo shoosi, sibakhaasile busa ta. Inywe babeyikina mwashebusa Umukasya, mukhasila busa mwawolakho ta.

⁷Mukhalekha Umukasya waawola ta, khukhwoolesa nga waamaliilisile khukhwiimisawo Yerusalemu buulayi, ni khuumukhola ekyele she khuruuyibwa khu shibala.

⁸Umukasya wetsubile nga wenyusile kumukhono kweewe kumulayi mu ngaaki, ni bunyala bwe kamaani keewe, nga aloma ari, “Sikheeleyo luundi khuuwaanayo biilime byeenywe khuuba biilyo bye kamanaambo ta, naluundi banaambo sibalinywakho luundi iviini yeenywe ishaakha isi murekanile khuufuna ta.

⁹Ne inywe mweesi mumuulikyesa biilime byeenywe, mwabeene mulibilya, lwanyuma muruuye Umukasya. Ni nanywe mweesi mumuulibuusa kimisabibu kyeenywe, mwabeene mukhaanywe iviini yamwo nga mukinyweela mu lwaanyi lwe Lisaayilo Likhulu.”

¹⁰Ari ni murure mutsye, mutsye mubirire mu bilibwa! Muŋoonaŋoone kumukhoosi lwe babaandu baase. Ni mwoombakhe, yoombekha mumilise intsila, murusemo kamabaale koosi. Lwanyuma mwinyuse ibendela nio kamanaambo koosi kabone.

¹¹Ari bona Umukasya walaangilile buurume bweewe isi shiibala shoosi nga buloma buri, “Boolela Umukhaana wa Sayuuni uri, ‘Bonakho, Umuwonesi woowo ali khukhwiitsa. Mubone, ali khukhwiitsa nga waasutile shiwaanwa nga shili mu mukhono kweewe, ni khukhwiliyaasa isi baasiku khuli ni naye.’ ”

¹²Bakhaalaangibwe bari “Babaandu bakhosefu, luundi Bakaangulule b'Omukasya.” Ni nanywe mukhaalaangibwe muri, “Isi Baaweentselesa luundi Shiriimba sheesi babaandu bakhanyala baaruramwo ta.”