Read lumasaaba Isaaya 63 Bible Online

Isaaya 63 - lumasaaba bible

Isaaya 63

¹Naanu uyo uwiitsa khukhwaama mu Edomu, khukhwaama mu shiriimba sha Bozira, nga wakwaarire bikwaaro byeesi baawakha ni raangi imbesemu? Naanu umweene uyo uwiitsa nga wakwaarire bikwaaro bye shiriifwa, nga eetsa akhuumba ni kamaani keewe kamakali? “Niye ise, Iseese Umukasya ukanikhila mu bukwalaafu, naluundi uuli ni kamaani ke khuuwonesa!”

²“Lwashiina bikwaaro byoowo byarandaalile naabi, byafwaana nga by'omuundu uwaama khusuura iviini?”

³Umukasya elamo ari, “Ise mbeele nga isuura iviini samweene senyene, nga mbaawo umuundu na mutweela khukhwaama mu manaambo unyala wanjeetakho ta. Mu lirima liikali nakhaandakiliile baasiku baase, naabamiinile aasi ni burafu buukali; shaakila kamafuki khukhwaama mu nibo kaatuumakila bikwaaro byase. Shino nisho shishikilile tsingubo tsase tsarandaala tsiryo ni kamafuki.

⁴Lwekhuuba mbeele nambaasakho naabi khu shifukhu she khukhwiliyaasa shino mu mwoyo kwase, kuryo kumwiiko kwe khuulekhuula babaandu baase kwoolile.

⁵Iseese nanyukanyuka indi imbone, ne nga mbaawo umuundu na mutweela uweetsa khuuyeeta, ise neyaanga naabi khubona nga mbaawo na mutweela uwaanayo khuyeeta khwoosi nakhari ta. Indyo samweene nakhola shisaani nereerera buwonesi ni kumukhono kwe kamaani. Buurafu bwase bubweene nibwo bubwakila ise naaramawo.

⁶Nakhaandakilila kamanaambo mu lirima lyase liikali; samweene niye uwaakila mu lirima lyase baanywa bameela, indyo naatsukha kamafuki kaabwe aasi khu shibala.”

⁷Ise ikhaakanikhatsake khu khukana khw'Omukasya khukhuukhaweelela ta, ni buraambi bweewe bubuukila khwaabuyilisa Umukasya, khusiintsila khwiibyo byoosi byeesi niye akhukholeele ifwe. Ilala iliwo bibiindu biilayi biikali busa byeesi akholeele intsu ya Isiraeli, khulwe shiisa sheewe shiikali, ni bubweela bweewe bubuukhabalikha ta.

⁸Umukasya niye aaloma ari, “Ilala bano bali babaandu baase babeene. Bali basooleli babaakhanyala baamoombesa ise ta.” Aryo niye wekyela Umuwonesi waabwe.

⁹Mu khutaambisibwa khwaabwe khwoosi, naye umweene aataambisibwila atweela ni nabo, aryo malayika uwe khuubawo khweewe weetsa waabawonesa.

¹⁰Ne nibo baamumiinyaalila, baryo baakhalasa Umwoyo weewe Umukhosefu. Isho shaakila niye waashuukha wekyela umusiku waabwe, waabasoolanisa nibo.

¹¹Ne lwanyuma baashebulila bifukhu bye khaale, bifukhu bya Musa atweela ni babaandu beewe. Kila shilomekha shiri, “Ali eena uyo uwareera babaandu bano, waababirisila mu nyaantsa, nga bali ni babaayi be bibyaayo byaabwe? Ali waheena uyo uwarumana Umwoyo weewe Umukhosefu khukhwiitsa khuumenya akari mu baandu beewe?

¹²Naanu uwarumana kumukhono kwe shiriifwa kwe kamaani, khuutsya khuraambisa kumukhono kwa Musa kumulayi? Niye uwaawukhanisamwo kameetsi kakaaba iburaangisi waabwe, nisho shaakila niye wefunila khuumanyikhana khukhuukhawawo ta.

¹³Ali waheena uyo uwabaraangilila waababirisa mu buleeyi bwe aasi wa naleme? Nibo baafwaana busa nga tsiŋwaaŋwa tsitsikhuunila tsiindimo mu mubiimbi nga sitsituya ta.

¹⁴Nga n'ubona tsikhaafu tsitsikyeenda tseekha aasi khu musaleela kwe mu litila, nibo baaweebwa Umwoyo w'Omukasya khuubawa shiwolelo. Iwe wamweene niye uwaraangilila babaandu boowo, nio wifunile lisiina lyoowo shiriifwa she angaaki.”

¹⁵O Umukasya, niwisheenge ulole aasi nga uli iyo mwikulu ubone; lola nga uli iyo mu bumenyo bwoowo bukhosefu luundi bwe shiriifwa. Khuumalilila khwoowo atweela ni kamaani koowo ari bili waheena? Khuukana khwe mu mwoyo kwoowo ni shiisa shoowo bibonekhana byakhuwakho.

¹⁶Lwekhuuba ilala iwe uli Paapa weefwe. Abe yakhaba nga Iburayimu waakhukhumanya ifwe ta, ni Isiraeli nga s'akhufukiilisa ifwe ta, iwe O Umukasya, uli Paapa weefwe. Iwe niye ukhukaangulula ifwe, khukhwaama liina na liina, ilyo lisiina lyoowo.

¹⁷O Umukasya, lwashiina ukhulekha ifwe khwaakaraangarana busa khwaarura mu ntsila tsoowo? Lwashiina iwe ukhunisa kimyoyo kyeefwe shaakila ifwe khwalekha khukhwiisamwo iwe shiriifwa ta? Ari n'ukobole khulwe buulayi bwe babaakaanisi boowo, lwe bikuuka bibiili busikha bwoowo bwa buraawa.

¹⁸Mu mbuka ifwiiti iri, babaandu boowo bakhosefu baayila shiifwo shoowo shikhosefu khuuba shishaawe, ne ari bona baasiku baashifuniaaka baashikwiisa aasi.

¹⁹Ifwe khwabawo khukhwaama khaale naabi, ne iwe waakhubatsakakho umuwuli waabwe ta, nibo baakhutyuukhibwatsakakho lisiina lyoowo ta.[22]