Read lumasaaba Isaaya 64 Bible Online

Isaaya 64 - lumasaaba bible

Isaaya 64

¹Iwe uba nga utyenuula likulu ne weekha aasi, tsinjiinji tsoosi tsitsiiliwo tsaandinikinile busa.

²Nga n'ubona kumulilo ni kuwaambisa kamasakari kaaburukha, karyo kaakila kameetsi kaakyemukha, ari niwiikhe aasi lisiina lyoowo limanyikhane isi baasiku boowo. Shisheene isho shikile kamanaambo koosi kanikine mu moni tsoowo.

³Iwe nga ni wakhola bibiindu bibiyaangisa abe byeesi khukhaasuubila ta, weekha aasi, ni tsinjiinji tsoosi tsaanikina luukali busa mu moni tsoowo.

⁴Khukhwaama mu miboolo kye khaale ni khaale, mbaawo umuundu na mutweela uwawulilakho, naluundi mbaawo khukhuru khwoosi khukhwemenieelesakho, namwe imoni na ndweela iyabonakho Wele ukuundi uuli nga iwe ta; iwe Wele ukhola bikholwa biikali khulwaabo babaakhuliindilila iwe.

⁵Iwe wiitsa waakaanila luundi waayeeta babaandu babaakhola bye bukwalaafu ni kumwikhoyo, uyeeta abo boosi babaaloondelela tsintsila tsoowo. Ne shonyene ndi iwe wakhalala naabi lwekhuuba ifwe khweloosela busa khukhwooneka is'uli. Ifwe khuli baboonaki ba buli mbuka, ari khunyala khuryeena khwaawonesebwa?

⁶Ifwe ari feesitsana khwaayikyela busa nga babaakhali bakwalaafu ta. Ni buraambi bweefwe bwe bukwalaafu nga khwaabureerire is'uli, bufwaana busa nga bitsina bibiili binyaalu. Khuryo khuwululukha busa nga kamasaafu, nga n'ubona imbewo nikhola, bibyoonako byeefwe bikhutamuusa busa khwawawo.

⁷Ate nga mbaawo umuundu na mutweela ukuukuula lisiina lyoowo ta, namwe yabawo uwisuluusa khukhwiitsa waakhwihaambakho khwiiwe ta. Lwekhuuba iwe webisile mu moni mwoowo wamweene isi ifwe khuli, uryo waakhuyengulakiile ifwe mu bwoonaki bweefwe.

⁸Ne ate shonyene ndi iwe, O Umukasya, uli Paapa weefwe. Ifwe khuli liloba busa, ne iwe uli umubuumbi. Ifwe feesi khuli busa buraambi bwe kamakhono koowo.

⁹O Umukasya, iwe ukhakhukhalalila ifwe naabi uryo ta. Ukhashebulilatsaka bibyoonako byeefwe biilo ni biilo ta. Ari khulole ubone, ifwe khuli babaandu boowo babeene.

¹⁰Biriimba byoowo bikhosefu byaayoonakisibwa byaayikyela busa kumubiimbi. Abe yakhaba ni Sayuuni shisheene nasho shaayikyela shishoomu busa, Yerusalemu shaayikyela kamawuumbu busa.

¹¹Lisaayilo lyoowo Likhosefu luundi lye shiriifwa mweesi bakuuka beefwe baakhuruuyila iwe lyaayookhebwa ni kumulilo, ni bibiindu byoosi bibyaba bye lisuno byaayikyela likubili busa.

¹²Mu biindu bino byoosi, O Umukasya, iwe kane usile busa uryo, ulekhe khuukhuyeeta ifwe ta? Iwe kane usile busa uryo wiloosele khuukhuwa ifwe shitaambiso she kamaani?