Read lumasaaba Isaaya 65 Bible Online

Isaaya 65 - lumasaaba bible

Isaaya 65

¹Umukasya aloma ari, “Ise naba mwirekefu khukhwibuula isi abo babaakhakana khukhwiitsa khukhuuntsireebakho lwe buyeeti ta; ise naba mwirekefu khuunyoolekhana isi abo babaakhakana khukhuumeentsa ta. Ise nalomela linaambo lilikhaakana khuukuukuula lisiina lyase, ndi ‘Ise niyooyu, indi ano.’

²Khuumala shifukhu shibuufu, ise natsaanuusile kamakhono kaase isi babaandu babaali bamiinyi, ne nibo baaba nga beloosela busa khukyeendela mu ntsila tsaabwe tsitsiikhali tsindayi ta, naluundi nga bekholakholanisa musaambo tsaabwe tsiimbi.

³Buli mbuka babaandu bano bekhala nga baakhalasa mu moni mwase, nga bawaanayo tsisaayilo mu mikuunda, naluundi nga boosha bubaani khu byeeso be kamatofwaali.

⁴Batsya bekhala aasi mu bifwo bye tsiŋani isi basiikha baafu, baamala mu bifwo bye shimoonyo ibyo shiilo shibuufu. Batsya baalya inyama iye mbiitsi, bateekha ni bibiindu bibiindi bibiikhafukiilisibwa khuulya ta mu biteekhelo byaabwe.

⁵Ate nga balomela babaandi bari, ‘Ni mube aleeyikho iyo, mukheetsa aambi isiindi ta, lwekhuuba ise indi umukwalaafu khuubafuurakho inywe.’ Babaandu babafwaana baryo bali nga lisuusi mu moolu mwase, kumulilo kukwikhala nga kwaaburukha shifukhu shoosi nga sikusima ta.”

⁶“Bonakho khane, shiilakilo sharonebwa iburaangisi wase shiri; Ise singene imbe nga neemikhile awo naasilile busa ta, ne kane niiliyaase mu bwitsufu. Ilala kane imbasasulile khu bikyele byaabwe bibyeene;

⁷khu byoonako byaabwe babeene atweela ni neebyo bye ba kuuka baabwe.” Shino Umukasya umweene niye ushikanikha. Alooselakho ari, “Lwekhuuba baatsya bawaanayo tsisaayilo mu njiinji, baryo bakhomyaasila ise mu ngoongo iyo. Indyo kane ise imbapiimile shipiimo shaabwe mu bikyele byaabwe, imbasasule mu bwitsufu lwe bubwoonaki bwaabwe bweesi baakhola khaale.”

⁸Umukasya aloma luundi ari, “Nga n'ubona iviini isi bakhamula ne ikiindi yaaramaka mu bikala bye kimisabibu, nio babaakikholakho baaloma bari, ‘Mukhakyoonakisa ta, lwekhuuba ishiilimwo indayi,’ ni nase indyo singene imbahese boosi ta, khulwe buulayi bwe babaakaanisi baase.

⁹Indilekhawo lisaaye mu baandu ba Yakobo, ni khukhwaama mu Yuda ilibawo abo babaalisikhila tsinjiinji tsase. Abo beesi indirobora nibo babaalisikhila, naluundi babaakaanisi baase nibo balimenya ibweene iyo.

¹⁰Awo nio Sharoni shikyele kamaayilo ke bibyaayo biikali, nga nibyo bye babaandu baase babaantsiyikina ise, ni litila lya Akori nilyo libe shiifwo she kamataala mweesi bibyaayo ibyo bitsya khuuwolelamwo.”

¹¹Umukasya waalooselakho ari, “Ne inywe mweesi babaantsukha Umukasya, luundi mweebilila Lukiingi lweewe Lukhosefu, luundi inywe babaatsya mwaŋoonaŋoona kamayiiya lwe khuuwa shiriifwa isi wele we Tsikhabi[23], naluundi mwawaanayo iviini indabule lwa wele Meni,

¹²indyo ari intsya khubarakho khaabonelo mufwe ni lurima. Ni naywe mweesi mukhaakwe aasi mwiwunamile isi uyo uwiira. Lwekhuuba ise nga ni nabalaanga, simwelamwo ta. Ise ni nakanikha, inywe simwawuliilisa ta. Mwaakhalawo mwaatsya mwakhola bye bubwoonaki mu moni tsase, mwakhalawo khuukana khukhukhalasa ise.”

¹³Nashiryo shisheene isho nisho shishikila Umukasya aloma ari, “Ari babaakaanisi baase nibo babaakhaalye, ne inywe mukhaabe ntsala. Babaakaanisi baase bakhaanywe, ne inywe mukhaabe bulesa. Babaakaanisi baase bakhekhoye, ne inywe mukhaabe mu mutaambo luundi muswaale busa.

¹⁴Babaakaanisi baase bakheembe kimyeenya lwe kumwikhoyo mu myoyo kyaabwe, ne inywe mukhaabe nga mulila kamasika lwe kumutaambo kumukali mu myoyo kyeenywe, muryo mwantsuwe lwe butsiina bwe mu mwoyo.

¹⁵Lisiina lyeenywe likhaarame busa nga lye shitsubo isi babaandu baase baarobore. Umukasya Umunyali wa byoosi umweene niye uulibakhoonyaka inywe, ne isi babaakaanisi beewe alibatwiikha lisiina liliindi.

¹⁶Umuundu yeesi uwilaangilila tsikhabi isi niye umweene mu shibala, alishikhola shoolelele khulwa Wele uwe bwaŋali. Umuundu yeesi uwitsubila mu shibala, akhetsube khulwa Wele uwe bwaŋali. Lwekhuuba kumutaambo kukwanyoowa kwoosi mbaawo unakushebulila luundi ta, naluundi kwatuumibwile aleeyi khukhwaama mu moni tsase.”

¹⁷Bonakho, ise ndi khuutsya khubuumba likulu lishaakha ni shibala shishaakha. Mbaawo ulishebulila bibiindu biikhale ibyo luundi ta, namwe bari ibewo umuundu ubyambaasakho luundi ta.

¹⁸Ne shonyene indi, ni musangaale, mwikhoye khulwe bibiindu bishaakha byeesi intsya khubuumba. Lwekhuuba ari bona indi khuutsya khubuumba Yerusalemu shibe shiifwo she khukhwikhoyelamo. Ni babaandu baasho bakhaabe be khuusangaala.

¹⁹Ise samweene ikhekhoyele mu Yerusalemu, indyo nikhoyesebwe ni babaandu baase. Siikhaabeyo luundi likono lye khukhwilootsa ta, mbaawo umuundu uuliwulila luundi khulila khwoosi ta.

²⁰“Siilibayo luundi babaana baŋaalye babaafwa nga boolesele bifukhu bikyeekhe biri ta. Namwe siilibayo luundi umusakhulu ulifwa nga wakhwoolesa bifukhu biikali bye buulamu bweewe ta. Umuundu yeesi ulifwiila khu miiko shitoondo shitweela alibonekha busa nga umusooleli, n'umuundu yeesi ulilekha khukhwoolesa kimiiko shitoondo shitweela, alibalibwa khuuba uwatsubibwa.

²¹Babaandu bakhoombekhe tsiintsu tseesi babeene bakhaakonemwo, naluundi babyaale kimisabibu kyeesi babeene bakhaalye kamatuunda kaamwo.

²²Sibaliilayo luundi bombekhe tsiintsu, babaandu babaandi beetse batsikonemwo ta, namwe babyaale kimisabibu babaandi beetse balye kamatuunda kaamwo ta. Nga kimisaala ni kihangala, babaandu baase baryo nabo bakhaahangale nga nikyo. Babaandu baase baarobore bakhekhoyele mu biindu byaabwe biilayi, byeesi babeene baraambilila ni kamaani khuubifuna.

²³Nibo sibaliraambila busa baryo kimilimo luundi ta, namwe basaale babaana babaatsya khubona kumutaambo ta. Lwekhuuba nibo kane babe babaandu beesi Umukasya umweene aawa tsikhabi, nibo babeene atweela ni lisaaye lyaabwe.

²⁴Kane imbeelemo nga bashiili na khuntsilootsela ta. Ni kane babe nga bashikanikha, ise kane imbawulile khuulila khwaabwe.

²⁵Khaatsuutse ni likheese bikhaaliile atweela. Italanyi ikhaalye bunyaasi nga n'ubona ikhaafu. Ne indemu niyo ikhaalye lifukhuulu. Mu bifukhu ibyo, sikhaabeyo uulitsiinisibwa namwe bari ibeyo khuhela khwoosi khu lukiingi lwase lukhosefu ta.” Bino byoosi Umukasya umweene niye ubikanikha.