Read lumasaaba Isaaya 66 Bible Online

Isaaya 66 - lumasaaba bible

Isaaya 66

¹ Sheesi Umukasya aloma nisho shino: Likulu nilyo indebe yase, ne shibala nikho khaarebe khweesi inaambisa bikyele byase. Intsu ili waheena isi inywe munyala mwaantsombekhela ise? Shifwo mweesi ise inyala naawumulila shili waheena?

²Kumukhono kwase nikwo kukwakhola bibiindu bye mu shibala bino byoosi, samweene niye uwakila byaabawo. Iseese Umukasya samweene niye ubikanikhile. “Umuundu isi ise nikhoyela afwaana ari: Uyo uuli umuwolu luundi uwibiiyisa mu mwoyo kweewe, luundi anikina naabi naaba nga waawuliile ilomo yase.

³Ne abo babaakhalawo khuutsya tsintsila tsaabwe busa, baatsya bakhola bye bumoyaani byeesi kimyoyo kyaabwe kisangaalila, biwaanwa byaabwe singene bifukiilisibwe ta. Buli muundu yeesi ukhoonya iwuunwa khuukiwaanayo nga isaayilo, kane afwaane busa nga ukhoonyile umuundu. Ni nooyo uwaanayo likheese, kane afwaane busa ufuniaakile likosi lye mbwa. Ni nooyo yeesi ureera isaayilo iye bilime byeewe, kane afwaane busa nga uwaanileyo kamalasile ke mbiitsi. N'umuundu uwoosha bubaani, akhaafwaane busa nga uyo uutsya khukhwisaaya bifwaani.

⁴Ikhaabakhalilewo shitaambiso shirafu shisheene, indyo imbareerere bibiindu bibibariisa luukali lulweene. Lwekhuuba nga ni nabekhuunga nibo, mbaawo na mutweela uweelamwo ta. Ise ni nakanikha isi bali, mbaawo uwawuliilisa ta. Baakhalawo khuukhola bye bumoyaani byonyene mu moni tsase, baryo baakhalilawo ilala khukhukhalasa ise.”

⁵Wulila ilomo iyaama isi Umukasya, inywe mweesi babaanikina nga mwaawuliile ilomo yeewe: Babaandayeenywe babeene babaabiyila inywe, lwanyuma baabaromboola, lwekhuuba mwiyikina lisiina lyase. Nibo baalomile bari, “Lekha Umukasya aweebwe shiriifwa, nio khunyale khuubona kumwikhoyo kwoowo.” Ne shonyene ndi nibo babaaliswaala naabi.

⁶Ni muwulile luwuungu luukali mu shiriimba! Wulila liyoombo liikali khukhwaama mu Lisaayilo Likhulu! Nilyo lili likono ly'Omukasya nga eliyaasa baasiku beewe, nga abawa isho shishiibaakhila nibo.

⁷“Nga ashiili khufuna biisa bye khusaala ta, Sayuuni aasaala umwaana, nga butsiina bwe khusaala bushiili khukhwiitsa ta, aasaala umwaana umusiinde.

⁸Naanu uwawulilakho shishiindu shishifwaana shiri? Manya naanu abe uwashibonakho? Manya yaabatsakawo linaambo lilinyala lyasaalikhila mu shifukhu shitweela? Namwe yaabatsakawo shiibala shishibawo mu mbuka ifwiiti iri? Ne bona mu mbuka ifwiiti iri isi biisa byarakikhila khuulya Sayuuni, babaana beewe basaalikhila khu mbuka nyene iyo.

⁹Abe ise manya inyala noolesa khu mbuka iye khuusaala, naalekha khusaalisa khuurusa ibulafu ta?” Shino nisho sheesi Umukasya alikho ereeba. “Manya ise nga noolisile khuusaalisa, injelaasawo nekalawo umwaana waalekha khusaalikha ta?” Shino ndi Wele niye ushiloma.

¹⁰Nimwikhoyele atweela ni Yerusalemu, musangaale khulweewe, inywe mweesi babaamukana niye. Nimwikhoyele atweela ni naye, inywe mweesi babaalila khulweewe.

¹¹Muryo mukhafwaane nga baŋaalye munuune khu mabeele keewe mwikure, mwikhoyesebwe lwe kamabeele ako. Mukhaanuune luukali lweene mwitsusibwe ni kumwikhoyo, muryo mwikhoyele mu bukali bwe shiriifwa sheewe.

¹²Sheesi Umukasya umweene aloma nisho shino ndi, “Ise ndimutsukhiliila inywe lukoosi lufwaane busa nga luluutsi lwe kameetsi, ni buyiindifu bwe kamanaambo bukhaasalasale bufwaane nga kameetsi kaketsuule. Babaana beewe bakhaanuune bekure, lwanyuma abameeme khu koongo, aryo abasutake mu ngaaki nga muli khu bikyele byeewe.

¹³Nga n'ubona umwaana isi maayi weewe awaambakho waamwikhoyesa, nase indyo ikhaabekhoyese inywe. Ikhaabekhoyesele inywe mu shiriimba Yerusalemu.”

¹⁴Nga mweetsile khubona bibiindu bibifwaana biri, kimyoyo kyeenywe kikhaasangaale, muryo munere mumiliye mufwaane nga bunyaasi. Shikhaamanyikhe lubuula shiri kumukhono kw'Omukasya kuli khu bakaanisi beewe, naluundi shimanyikhe shiri lirima lyeewe litindiimila khu baasiku beewe.

¹⁵Bonakho luundi, Umukasya ali khukhwiitsa ni kumulilo, ni kamakaali keewe keetsa ni kamaani kamakali nga imbewo iye shishafuusi. Akhaareere shitaambiso atweela ni lirima lyeewe nga litindiima busa, ni khuureewula khweewe khwiitse ni tsinimi tse kumulilo.

¹⁶Lwekhuuba Umukasya akhaakhalile babaandu boosi kumusaango nga aboosha ni kumulilo, naluundi nga araambisa lurima lweewe. Bakhaabe babaandu baakali naabi babaakheeribwe n'Umukasya.

¹⁷“Abo boosi babepyeluusa babeene, bekhosesa nio batsye mu mukuunda iyo, khuutsya khuuloondelela bifwaani bibiili akari aakwo, nga batsya ni khuulya inyama iye tsimbiitsi, ni khuulya tsimbeba, na buli shiindu shoosi shinyaalu, bakhaaweelewo ilala kumuluundi mutweela atweela ni bibiindu byeene byoosi.” Shino Umukasya umweene niye ushikanikha.

¹⁸Ni nase ndyo, khulwekhuuba ise naamanya bikholwa byaabwe ni intsambaasa yaabwe, indi aambi khukhwiitsa, imbuusanise atweela kamanaambo ni tsinimi, nio beetse babone shiriifwa shase.

¹⁹Ikhaabareerewo khaabonelo akari mu nibo, nio lwanyuma indumanise batweela khu baandu babaaramawo nga baalamu, babe baarume baase isi kamanaambo, nga Tarushishi, Pulu, ni Ludi (nibo baaba babaandu babalasa buyiingo), ni Tubali, atweela ni Javani, ni khuutsya khukhwoola mu bibala bye aleeyi abe bibikhaawulilakho namwe byabonakho shiriifwa shase ta. Babeene bano nibo babaakhaatsye barumbule shiriifwa shase isi kamanaambo kakaandi.

²⁰Babeene bano nibo babaakhaareere baalebe boowo boosi khukhwaama mu manaambo. Baryo bakhaabareere khu lukiingi lwase lukhosefu Yerusalemu, babe nga shiwaanwa isi Umukasya. Bakheetse nga bakyeendela khu ŋwaaŋwa, ni mu makaari, ni bikaari, atweela ni khu nyuumbu ni tsiŋamila. Shino Umukasya umweene niye ushiloma. Bakhaabareere inywe nga n'ubona ba Isiraeli ni bareera biwaanwa bye biilime mu Lisaayilo Likhulu ly'Omukasya, nga baabisutiile mu sutilo tseesi baamala khupyeluusa.

²¹Luundi ndi Umukasya aloma ari, “Ise ikhaarobore batweela khu nibo khuuba basaayi baase atweela ni ba Levi.”

²²Umukasya umweene ndi aloma ari, “Nga likulu lishaakha ni shibala shishaakha byeesi ise samweene indi aambi khubuumba ni bikhaaramewo, liryo lisiina lyeenywe atweela ni lisaaye lyeenywe ni bikhaabewo biilo ni biilo.

²³Khukhwaama khu mweesi kumushaakha khuutsya khwoola khu mweesi kumushaakha kukuundi, ni khukhwaama khu shifukhu sha Sabato shitweela khuutsya khwoola khu shifukhu sha Sabato shishiindi, babaandu boosi bakheetse bakwe aasi baantsisaaye ise.” Shino Umukasya umweene niye ushiloma.

²⁴Baryo bakhaarure batsye balole khu milaambo kye babaandu babaaminyaalila ise. Ni tsinyeende tsitsikhaabalye sitsikhaafwe ta, ni kumulilo kukukhaabooshe nibo sikukhaasime ta. Ni babaandu babaakhaakyeende nga babirawo, bakhaashibone ni khuurya khuukali naabi.